Inda koshikalimo

Inda koshikalimo

Eendombwedi daJehova

Hoolola elaka Oshikwanyama

“Omesho oye okwa li taa shipununa nge, fimbo nda li engwili inandi tongoka.” — Epsalme 139:16

Mbela Kalunga okuudite ko omaliudo oye?

Mbela Kalunga okuudite ko omaliudo oye?

OSHO HATU LIHONGO KESHITO

Ovanhu ovo va dalwa eehamba, ohava kala ve na ekwatafano lopofingo mokuyelekanifa novanhu aveshe. Nohashi va ningifa va kale ve na ekwatafano la kola. Nacy Segal, omukulunhu wehangano lo-Twin Studies Center, oo naye a dalwa ohamba, okwa ti: “Vamwe ove shii kutya ovanhu ovo va dalwa eehamba ohava dulu okupopya nokuuda ko omaliudo amukwao noupu.” Omukainhu umwe okwa popya shi na sha nekwatafano olo ve na naao va dalwa naye eehamba a ti: “Keshe umwe oku shii mukwao nawa.”

Eendjovo odo otadi tu hongo shike ngeenge tashi uya pokuuda ko omaliudo avamwe? Omakonakono oo a ningwa otaa ulike kutya nonande omudingonoko omo va kulila nonghedi omo va tekulwa ohai dana onghandangala, oufyuululwakwatya wavo oo wa faafana oo unene hau dana onghandangala.

DILADILA KWAASHI: Omushiti oo e tu shita oku tu shii nawa pauhandimwe e dulife keshe umwe. Omupsalme David okwa ti: ‘Owa dutila nge medimo lameme. Oukipa vange kava li ve ku holekwa, eshi nda mewa meholeko. Omesho oye okwa li taa shipununa nge, fimbo nda li engwili inandi tongoka, nomembo loye omo omwa nyolelwa oitukulwa yange aishe.’ (Epsalme 139:13, 15, 16) Nonande Kalunga oku shii omaufyuululwakwatya etu, oku shii yo oiningwanima aishe oyo twa shakeneka monghalamwenyo. Osho otashi tu shilipaleke kutya ngeenge Kalunga oku shii omaufyuululwakwatya etu, osha yela kutya oku shii oshinima keshe kombinga yetu kondadalunde.

OMBIIBELI OYA TI KALUNGA OKU SHII KESHE SHIMWE

Ohamba David oya ilikana ya ti: “Omwene, Oove to konakona nge, ndele to koneke nge; nande ndi li omutumba, ile nda fikama, owe shi shiiva; omadiladilo ange ou a uditile kokule; osheshi fimbo etumbulo inali uya kelaka lange, Omwene, Ove we li koneka.” (Epsalme 139:1, 2, 4) Shikwao vali, Jehova oku shii omaliudo etu omeni “nediladilo keshe lomomwenyo ye e li shii.” (1 Omafimbo 28:9; 1 Samuel 16:6, 7) Eevelishe edi otadi holola shike kombinga yaKalunga?

Nonande ihatu dulu okuholola omadiladilo etu nomaliudo etu aeshe ngeenge hatu ilikana, Omushiti wetu iha kala ashike e shii osho twa hala okuninga, ndele oha kala yo e shii kutya omolwashike hatu shi ningile. Ashike nande ongaho, oha kala e shii kutya ohatu kala twa hala okulonga ouwa nonande omangabeko etu ohae tu imbi tu ninge ngaho tashi di komutima. Jehova okwa halelela okushiiva nokuuda ko omadiladilo nomalinyengotomheno etu nomolwaasho e tu shitila oukwatya wohole. — 1 Johannes 4:7-10.

Kape na osho tashi pitilile po Kalunga ehe shii wete. Oku wete nokuli nokumona oixuna oko tu li muko nonande vamwe inave shi didilika ile vehe shi udite ko filufilu

 Omishangwa odo tadi tu shilipaleke

  • “Omesho Omwene ohaa pashukile ovayuki nomatwi aye ohaa endekele komailikano avo.” — 1 Petrus 3:12.

  • Kalunga okwa udaneka a ti: “Onda hala ndi ku longe, ndi ku udikile ondjila, ei u nokweenda nayo; onda hala ndi ku twe omayele; eisho lange tali ku pashukile.” — Epsalme 32:8.

KALUNGA OMUNALUKENO

Mbela okukala tu shii kutya Kalunga oha kala e wete onghalo oyo tu li muyo noku udite ko omaliudo etu itashi tu kwafele tu lididimikile omaudjuu oo hatu shakeneke. Natu ka taleni keenghalo odo da li da shakenekwa kuAnna, wokoNigeria. Okwa ti: “Onda kala nokulipula omapulo mahapu omolweenghalo odo nda shakeneka. Nonande ondi li omufiyekadi, onda kala handi file oshisho okamonakadona kange, oko ka kala moshipangelo molwaashi oka dalwa ke na omeva mouluvi. Naame onda ka ya moshipangelo eshi nda monika okankela yokomavele. Onda li nda tandwa, handi kala handi ka xwikwa nokuya keshina ndi ka konakonwe. Osha li efimbo lidjuu kwaame okukala tu li moshipangelo pefimbo limwe nokamonakadona kange.”

Oshike sha kwafela Anna e lididimike? Okwa ti: “Onda dilonga komishangwa ngaashi Ovafilippi 4:6, 7 ovo tava ti, ‘ombili yaKalunga ei i dule eendunge adishe, otai ka amena omitima deni nomadiladilo eni.’ Efimbo keshe handi dimbuluka omushangwa oo, ohandi kala ndi shii kutya ondi na ekwatafano la kola naJehova nondi shii kutya oku udite ko onghalo yange e dulife nge. Ohandi mono yo etwomukumo kovamwatate novamwameme vomeongalo lopaKriste.”

Anna okwa weda ko a ti: “Nonande inandi veluka filufilu, onghalo yange noyokamonakadona kange oya xwepopala. Molwaashi Jehova oku li pamwe nafye, ihatu diladila oinima ii ngeenge twa taalela omashongo. Jakob 5:11 ote tu shilipaleke ta ti: ‘Ovo ve lididimika, ohatu va tale ovanelao. Elididimiko laJob olo mwe li uda, nomwa mona exulilo e li pewa kOmwene, osheshi Omwene Oye omunalukeno nomunamutimanghenda.’” Jehova okwa li e udite ko filufilu onghalo yaJob, nafye ohatu dulu okukala noushili kutya oku udite ko filufilu eenghalo odo hatu piti mudo.