Inda koshikalimo

Inda koshikalimo

Eendombwedi daJehova

Hoolola elaka Oshikwanyama

“Onye mu dule oonamusheshe.” — MATEUS 10:31

Mbela Kalunga oku ku shii ngoo?

Mbela Kalunga oku ku shii ngoo?

OSHO HATU LIHONGO KESHITO

Meni lominute 60 eshi okahanana opo ka dalwa, olo olo efimbo hapa ningwa omalunduluko. Omolwashike mbela? Omolwaashi olo olo efimbo la fimanenena komudalakadi okukala e na ekwatafano nokaana kaye nohashi kwafele okaana ka kule nawa nokuxwepopaleka onghalonawa yako. *

Oshike hashi kwafele omudalakadi a kale ta file oshisho okahanana kaye? Omuprofesa umwe wedina Jeannette Crenshaw okwa yelifa membo The Journal of Perinatal Education kutya ope na oholomone oyo hai ifanwa oxytocin, “oyo hai linyengifa omudalakadi a kale ta kwata okahanana, oku ka yolifa noku ka nyamifa.” Natango ope na oholomone imwe oyo hai “kwafele omudalakadi a kale ta popi nokaana kaye,” naasho ohashi mu kwafele a kale e na ekwatafano liwa nako. Omolwashike osho shi didilikwedi?

Ekwatafano olo hali kala pokati komudalakadi nokaana ola totwa po kOmushiti wetu omunahole Jehova Kalunga. * Ohamba David oya li ya pandula eshi ya ‘pitifwa mo medimo’ noya li i udite ya amenwa eshi ya li moshidalelo shaina. Oya ilikana ya ti: “Nghee nda dalwa, okukalamwenyo kwange okwa tulwa mwoove; nghee nda dja moshidalelo shameme, Oove u li Kalunga kange.” — Epsalme 22:9, 10.

DILADILA KWAASHI: Ngeenge Kalunga okwe shi ninga tashi shiiva opo omudalakadi a kale ta konenene okahanana kaye noku ka wanifila po eemhumbwe dako, mbela osho itashi tu ulikile kutya Kalunga oku na ko nasha nafye, tu li “oludi laKalunga” ile tu tye ovana vaye? — Oilonga 17:29.

OMBIIBELI OTAI HONGO KUTYA KALUNGA OKU NA KO NASHA NAFYE

Jesus Kristus, oo e shii Omushiti e dulife keshe umwe, okwa ti: “Oonamusheshe vavali ihava landwa ngeno okapeni kamwe akeke? Ndele kaku na nande umwe ta wile poshi, oXo ngeenge ina hala. Ndele osho eexwiki deni adishe dokomutwe oda valwa yo. Hano inamu tila; onye mu dule oonamusheshe vahapu.” — Mateus 10:29-31.

Vahapu vomufye ihatu yandje elitulemo koudila vanini, noihatu shi didilike nokuli ngeenge va ‘wila poshi.’ Ashike Tate yetu womeulu oha didilike keshe kamwe. Jehova okwa lenga ovanhu shi dulife oudila. Osho otashi tu hongo kutya ino pumbwa okukala ‘wa tila’ kutya Kalunga ke ku shii. Mepingafano naasho, oku na ohokwe mwoove.

Kalunga oku tu hole, e na ko nasha nafye noha kala e tu wete

 Omishangwa odo tadi tu shilipaleke

  • “Omesho Omwene e li apeshe, ndele taa tale nokudidilika ava vai naava vawa.” — OMAYELETUMBULO 15:3.

  • “Omesho Omwene okwe a talifila ovayuki, nomatwi aye okwe a ameka kekwenauko lavo.” — EPSALME 34:15.

  • “Handi hafele nokunyakukilwa ouwanghenda woye, shaashi wa tala oudjuu wange, nowa dimbulukwa omatilifo omwenyo wange.” — EPSALME 31:7.

“ONDA LI DI UDITE KUTYA JEHOVA KE HOLE NGE”

Mbela osho itashi lundulula etaleko letu eshi tu shii kutya Kalunga oku tu hole, e na ko nasha nafye noha kala e tu wete? Vahapu ohava kala ve udite ngaashi Hannah * wokoEngland, oo a yelifa a ti:

“Omafimbo nomafimbo onda kala ndi udite kutya Jehova ke hole nge nosho yo kutya omailikano ange ihaa nyamukula. Onda li ndi wete kutya pamwe osheshi ndihe na eitavelo. Onda li ndi wete kutya onda handukilwa ile pamwe ote lidimbike nge molwaashi ame omunhu wongaho. Onda li ndi wete kutya Kalunga ke na ko nasha naame.”

Paife Hannah ke na vali omalimbililo ngeenge Jehova oku na ko nasha naye noku mu hole. Oshike she mu kwafela a kale e udite ngaho? Okwa ti: “Onda lundulula etaleko lange. Ohandi dimbuluka oshipopiwa shimwe shopaMbiibeli osho sha yandjelwe omido da pita, osho sha li tashi popi kombinga yekuliloyambo laJesus, naasho osha tomha nge ndi mone kutya Jehova omunahole. Eshi nda mona kutya omailikano ange okwa nyamukulwa, onda li nda lila nonda mona kutya Jehova oku hole nge. Okukonakona Ombiibeli nosho yo okukala pokwoongala kwopaKriste, nako okwa kwafela nge ndi lihonge shihapu kombinga yaJehova, omaukwatya aye nosho yo nghee ha kala e tu uditile. Paife onda tomhwa filufilu kutya Jehova oku tu hole nokwa halelela oku tu fila oshisho pauhandimwe.”

Osho Hannah a popya otashi tu tu omukumo. Ongahelipi to dulu okukala noushili kutya Kalunga oku wete noku udite ko omaliudo oye? Epulo olo ola nyamukulwa moshitukulwa sha shikula ko.

^ okat. 3 Ovadalakadi vamwe ohava hangika kepolimano olo hali hange omunhu oo opo a mono okaana, nohali shi ningifa shidjuu okukala e na ekwatafano nokaana kaye. Ashike nande ongaho, itava dulu okupewa ombedi omolwoshinima osho. She likolelela komakonakono oo a ningwa kEhangano lOpashiwana li na sha nOuhaku wopamadiladilo ola ti kutya “epolimano olo hali hange omunhu oo opo a mono okaana ohali mu kumu palutu nopamaliudo, ashike ihali etifwa kusha.” Opo u mone ouyelele muhapu, tala oshitukulwa “Understanding Postpartum Depression” mo-Awake! 8 Juni 2003.

^ okat. 5 Jehova edina laKalunga ngaashi tali hangwa mOmbiibeli. — Epsalme 83:18NW.

^ okat. 15 Omadina amwe oo e li moitukulwa ei ya pambafana hao ovanhu ovo lelalela.