Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo  |  No. 1 2017

 OSHIPALANYOLE SHOKOMBADA | NGHEE TO DULU OKUMONA OUWA MUHAPU NGEENGE TO LESHA OMBIIBELI

Omolwashike wa pumbwa okulesha Ombiibeli?

Omolwashike wa pumbwa okulesha Ombiibeli?

Jovy okwa ti: “Onda li ndi shii Ombiibeli oidjuu okuudiwa ko.”

Queennie okwa ti: “Onda li handi diladila kutya kai hokwifa.”

Ezekiel okwa ti: “Eshi nda tala kounene wOmbiibeli, onda li nda fya ounye oku i lesha.”

Mbela ope na omhito imwe wa li wa diladila okulesha Ombiibeli, ndele to kala inoi lesha molwaashi owa li u udite ngaashi ovo va tumbulwa metetekelo? Okulesha Ombiibeli okwa kala kwa fa oshinima shitilifa oule womido dihapu. Ndele ongahelipi ngeenge owa mono kutya Ombiibeli otai dulu oku ku kwafela u kale wa hafa nou na onghalamwenyo tai ti sha neenghono? Ongahelipi ngeenge owa mono kutya ope na eenghedi dimwe odo to dulu okulongifa ngeenge to lesha Ombiibeli opo i kale i hokwifa neenghono? Mbela oto ka kala wa hala okutala kutya ouwa ulipi to dulu okumona mOmbiibeli?

Tala komatyekosha manini avamwe ovo va mona ouwa eshi va hovela okulesha Ombiibeli.

Ezekiel, oo e na omido 20 nasha, okwa ti: “Nale, onda li nda fa omunhu ta shingi ohauto ehe shii kutya otai peni. Ndele okulesha Ombiibeli okwa kwafela nge ndi kale ndi na onghalamwenyo tai ti sha. Oi na omayele taa kwafa oo handi dulu okulongifa efiku keshe.”

Frieda, oo naye e na omido 20 nasha, okwa ti: “Onda li handi katuka eenghatu nopehe na okudiladila koilanduliko. Ndele eshi nda lesha Ombiibeli, onde lihonga okulipangela. Osho osha kwafela nge ndi kale ndi na omaukwatya mawa, nomolwaasho paife ondi na ookaume vahapu.”

Omukainhu wedina Eunice womido 50 okwa popya kombinga yOmbiibeli a ti: “Oya kwafela nge ndi ninge omunhu muxwepo, ndi lundulule eenghedindjikilile dange dii.”

Ngaashi ovaleshi ovo nosho yo vakwao omamiliyona va didilika, okulesha Ombiibeli otaku dulu oku ku kwafela u kale u na onghalamwenyo ihafifa neenghono. (Jesaja 48:17, 18) Otaku dulu oku ku kwafela (1) u ninge omatokolo e li pandunge, (2) u pange oukaume washili navamwe, (3) u ungaunge noisho nosho yo (4) osho sha denga mbada, u lihonge oshili kombinga yaKalunga. Omayele Ombiibeli okwa dja kuKalunga, nomolwaasho oto ka mona ouwa ngeenge owe a tula moilonga. Kalunga ke na efiku a yandje omayele mai.

Osha fimana okuhovela okulesha Ombiibeli. Ndele mbela oinima ilipi tai dulu oku ku kwafela u hovele noupu nou i hafele?