Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshungonangelo  |  No. 1 2017

 OMBIIBELI OHAI LUNDULULA ONGHALAMWENYO YOVANHU

Kanda li nda hala okufya

Kanda li nda hala okufya
  • ODULA OMO A DALWA: 1964

  • OSHILONGO OMO A DALELWA: ENGLAND

  • ONAKUDIWA: OMUNYASHA OMUTANGALALI WOMIDO OMULONGO NASHA E NA OKAANA

ONGHALAMWENYO YANGE YONALE

Onda dalelwa moPaddington, oshitukulwa shi yadi ovanhu shi li moLondon, shaEngland. Onda kala nameme novamwamemekadona vatatu va kula. Tate otwa kala hatu mu mono omalufe molwaashi okwa li a pikwa komalodu.

Eshi nda li okaana, meme okwa li a honga nge ndi kale handi ilikana onguloshi keshe. Okwa li ndi na Ombiibeli inini i na ashike Omapsalme, nonda li nda tota po eengovela opo ndi dule oku a imba. Ohandi dimbuluka handi lesha etumbulo membo lange limwe lomounyuni olo la kala momadiladilo ange tali ti: “Fikulimwe itaku ka kala vali onghalamwenyo.” Eendjovo odo oda ningifa nge ndi nangale inandi kofa oufiku, handi diladila kombinga yonakwiiwa. Onda li handi diladila handi ti: ‘Oshoshili ope na shihapu shi na sha nonghalamwenyo.’ ‘Omolwashike ndi li momwenyo?’ Kanda li nda hala okufya.

Onda tameka okukala nda halelela okushiiva kombinga youmhulile. Onda li handi kendabala okupopya noonakufya, okuya pamwe nookahewa kange vokofikola komaendo nokutala pamwe navo eemuvi di tilifa. Otwa li tu shi odi hokwifa do odi tilifa.

Onda hovela okuninga omutangalali eshi nda li ndi na eedula omulongo. Onda tameka yo okushila omakaya nonda li nda pikwa diva. Konima yefimbo, onda ka kala handi shi li epangwe. Eshi nda li ndi na omido 11 onda li nda hovela okunwa omalodu. Nonande kanda li ndi hole omulyo womalodu, okwa li ndi hole ngeenge nda kolwa. Onda li yo ndi hole eemusika nokundanisha. Onda kala handi i koivilo nokeekalaba doufiku. Onda li yo handi livake mo meumbo oufiku nokulivakela mo fimbo eluwa ina li tenda. Nonande onda li handi kala nda loloka efiku la landula ko, onda li handi ka dana pandjikilile oudano kofikola hau ifanwa o-hooky. Ngeenge ndi li kofikola okwa li handi nu luhapu omalodu pokati keetundi.

Onda li nda mona oitwa i li pedu kexulilo lomudo kofikola. Molwaashi meme ka li a didilika kutya onda ninga omutangalali neenghono, okwa li a nyemata nokwa handuka. Okwa li twa tanguna nameme ndele handi di mo meumbo. Onda ka kala nomumati wange Tony oule wefimbo linini, oo a li Orasta. Okwa li ha longo oilonga yomunyonena nokulandifa oingangamwifi nokwa kala e hole omapove neenghono. Diva onda li nda ninga eteelelo ndele handi mono okaana eshi ndi na eedula 16.

 NGHEE OMBIIBELI YA LUNDULULA ONGHALAMWENYO YANGE

Onda li nda shakeneka Eendombwedi daJehova lwotete eshi nda li komuhandjo oko kwa li haku kala oomeme ovo ve na ounona inava hombolwa. Onda kala ndi na onduda yange oyo nda pewa kepangelo. Ovakainhu vavali Eendombwedi ova li hava talele po oomeme vamwe vovanyasha pandjikilile. Efiku limwe okwa li naame nde va waimina peenghundafana davo. Onda li nda hala okuulika kutya Eendombwedi kadi li mondjila. Ashike oda li da nyamukula keshe epulo lange da ngungumana nomonghedi ya yela okudja mOmbiibeli. Oda li di na onghenda neyavelelo, osho nda mona shihokwifa neenghono. Onghee hano, onda li nda dimina okukonakona Ombiibeli pamwe nado.

Diva onda li nde lihonga oshinima shonhumba mOmbiibeli osho sha lundulula onghalamwenyo yange. Okudja eshi kwa li ndi munini, onda kala handi tila okufya. Ashike paife onda shiiva ehongo laJesus li na sha nenyumuko. (Johannes 5:28, 29) Onde lihonga yo kutya Kalunga oku na ko nasha naame pauhandimwe. (1 Petrus 5:7) Onda li nde linyengifwa neenghono keendjovo odo di li muJeremia 29:11, tadi ti: “Osheshi omadiladilo ange nde e mu diladilila ondi a shii, Omwene osho ta ti, omadiladilo ombili, hao omupya. Ame ohandi mu pe efimbo lokomesho pamwe neteelelo liwa.” Onda hovela okukala ndi na eteelelo li na sha nomwenyo waalushe mOparadisa kombada yedu. — Epsalme 37:29.

Eendombwedi daJehova oda ulikila nge ohole yashili. Oshikando shange shotete eshi nda ya kokwoongala kwado, keshe umwe okwa li e na ohamu, a hafa noku na oukaume. (Johannes 13:34, 35) Opa li pe na eyooloko la kula okuyelekanifa naashi nda li handi ungaungwa naame kongeleka yomoshitukulwa shetu. Eendombwedi oda li da kwafela nge she likolelela konghalo yange. Oda li da pange efimbo, efiloshisho, elitulemo nekwafo tali wapalele. Okwa li ndi udite ndi li oshitukulwa shoukwaneumbo wa kula u na ohole.

Eshi nda hovela okukonakona Ombiibeli, onda li nda mona kutya ondi na okuninga omalunduluko monghalamwenyo yange opo ndi dulike komifikamhango daKalunga dopaenghedi. Kasha li shipu okweefa po okushila omakaya. Pefimbo opo tuu opo, onda li nda mona kutya eemusika dimwe oda li da kulika ehalo lange lokushila epangwe, nomolwaasho onda li nda lundulula eemusika odo nda li handi pwilikine. Molwaashi onda li nda hala okukala ndi li nawa, onda xulifa po okuya koivilo nokeekalaba doufiku oko handi ka kala nda hala okunwa. Onda mona ookaume vape ovo enwefe mo lavo liwa tali dulu okukwafela nge shi na sha nonghedi yange ipe yokukalamwenyo. — Omayeletumbulo 13:20.

Konima yefimbo, Tony naye okwa li a hovela okukonakona Ombiibeli nEendombwedi daJehova. Eshi Eendombwedi da kala nokunyamukula omapulo aye okudja mOmbiibeli, naye okwa li a tomwa kutya osho te lihongo oshili. Okwa li a ninga omalunduluko manene monghalamwenyo yaye ngaashi okweefa po okukala novanhu ovo ve hole elongifo leenghono, okulonga ominyonena nokushila epangwe. Opo tu hafife Jehova pauyadi, otwa li twa mona kutya otwa pumbwa okulundulula elihumbato letu lopaenghedi nokutekula okamonamati ketu moukwaneumbo wa hangana. Otwa li twa hombola mo 1982.

“Ihandi nangala vali inandi kofa oufiku handi diladila kombinga yonakwiiwa ile yefyo”

Ohandi dimbuluka handi kongo moshifo shOshungonangelo no-Awake! * oitukulwa oyo i na omahokololo avamwe ovo va pondola mokuninga omalunduluko oo naame nda hala okuninga. Onda li nda pamekwa neenghono koihopaenenwa yavo. Ohandi kala ndi udite nda pamekwa mokukendabala nopehe na okusholola. Onda twikila okwiilikana kuJehova opo aha efe okukwafela nge. Fye naTony otwa ninginifwa tu li Eendombwedi daJehova muJuli 1982.

OUWA OO NDA MONA

Okukulika ekwatafano lange naJehova Kalunga osha xupifa omwenyo wange. Fye naTony otwa mona ekwafo laJehova nomeenghalo odo didjuu. Otwe lihonga okukala twe lineekela muKalunga ngeenge tu li meenghalo didjuu, notu udite kutya ote ke tu kwafela nokuyambidida alushe oukwaneumbo wetu. — Epsalme 55:23.

Onda hafela okukwafela omonamati nomonakadona wetu opo va kale ve shii Jehova ngaashi ame. Paife onda hafa natango eshi ounona vavo navo va kula meshiivo lokushiiva Kalunga.

Ihandi nangala vali inandi kofa oufiku handi diladila kombinga yonakwiiwa ile yefyo. Fye naTony ohatu hafele okutalela po omaongalo Eendombwedi daJehova e lili noku lili oshivike keshe opo tu a twe omukumo. Ohatu a waimine mokuhonga vamwe kutya ngeenge ova kala ve na eitavelo muJesus, navo otava ka mona omwenyo waalushe.

^ okat. 17 Ya nyanyangidwa kEendombwedi daJehova.

Lihonga shihapu

Ino hala ekonakonombibeli loshali?

Omolwashike u na okukonakona Ombibeli?

Ombibeli otai kwafele ovanhu omamiliyona mounyuni aushe va mone omanyamukulo omapulo oo a fimanenena monghalamwenyo. mbela ino hala okukala umwe womuvo?