Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 12no 2016

 Ovaleshi Tava Pula . . .

Oshike sha puka shi na sha neenghedindjikilile dOkrismesa?

Oshike sha puka shi na sha neenghedindjikilile dOkrismesa?

Ovanhu ohava ti kutya Okrismesa oshivilo shopamufyuululwakalo shopaKriste shokudana edalo laJesus. Ovanhu ohava longifa eenghedindjikilile dihapu ngeenge tava dana oshivilo osho, ashike oshe tu ningifa tu lipule kutya, osha enda ngahelipi di kale da pambafana nedalo laJesus?

Oshinima shimwe ongaashi omutotolombo u na sha naSanta Claus. Epopifa lokunena Santa olo li na omutwe u toka, eendjedi dihapu noshuta itilyana ola kala hali longifwa momashiivifo oipindi pOkrismesa kehangano loikunwa moAmerika lokolundume mo 1931. Mo 1950 lwaapo, Ovabrasilia vamwe ova li ve li pingena po nefano olo la shiivika nawa moshitukulwa shavo hali ifanwa Grandpa Indian. Osha eta oidjemo ilipi? Omuprofesa Carlos E. Fantinati okwa ti: “Santa Claus ka li ashike a pingenwa po kuGrandpa Indian ashike okwa li yo a pingena po okaana Jesus nosha tambulwa ko pambelewa shi lile po oshivilo sho 25 Desemba.” Ndele mbela omahokololo ngaashi Santa Claus oo ashike e na oupyakadi u na sha nOkrismesa? Opo tu mone enyamukulo, diladila kOukriste wopehovelo.

Embo lo-Encyclopedia Britannica ola ti: “Pehovelo lomafelemudo otete avali opa li eemhata da kwata moiti di na sha nokudana omadalo mwa kwatelwa nolaJesus.” Omolwashike mbela? Omolwaashi Ovakriste ova li va tala ko okudana omadalo ku li onghedindjikilile yoshipaani, nokwa li i na okuhenukwa. Ombibeli inai tumbula efiku omo Jesus a dalwa.

Nonande Ovakriste votete kava li hava kufa ombinga monghedindjikilile yokudana omadalo, ongeleka yaKatolika oya li ya tota po Okrismesa. Oya li ya hala okutamununa mo elongelokalunga layo mokukufa po omandangalati oo a li ta e va imbi ngaashi omalongelokalunga oshipaani Ovaroma noshivilo shopokufu shetango. Embo Christmas in America, laPenne L. Restad ola ti: “Okudja 17 Desemba fiyo 1 Januali, omudo keshe oivilo yOvaroma ihapu ngaashi omaudano, omalihafifo, ominyanyo ohave i danene mumwe noivilo ikwao eshi tava fimaneke oikalunga yavo.” Ovaroma okwa li yo hava dana edalo loshikalunga shetango mo 25 Desemba. Ongeleka oyo oya li ya xwaxwameka Ovaroma vahapu va dane edalo laJesus 25 Desemba ponhele yokudana edalo loshikalunga shetango. Embo Santa Claus, a Biography, laGerry Bowler ola ti: “Ovaroma ova kala yo hava dana oivilo yopokufu. Ova kala hava kwatakanifa omafiku mape neenghedi dikulu.”

Okrismesa oya kanghamena koudilo inau koshoka. Embo The Battle for Christmas laStephen Nissenbaum ola ti: “Okrismesa oshivilo shovapaani nonande osha talika ko shopaKriste.” Onghee hano, Okrismesa ihai fimanekifa Kalunga nOmona waye, Jesus Kristus. Mbela osha puka okudana Okrismesa? Ombibeli oya ti: “Osheshi ouyuki ou noukumwe washike nouhenouyuki? Ile ouyelele ou nekwatafano lashike nomulaulu?” (2 Ovakorinto 6:14) Ngaashi ashike efina lomuti wa ngolyoka itali dulu okweendamununwa, Okrismesa nayo ‘itai dulu okuyukililifwa.’ — Omuudifi 1:15.

Lihonga shihapu

Omolwashike Eendombwedi daJehova ihadi dana Okrismesa?

Ovanhu vahapu otava twikile okudana Okrismesa nonande ove shii oudilo wayo. Mona kutya omolwashike Eendombwedi daJehova iha di i dana.