Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 12no 2016

 OSHIPALANYOLE SHOKOMBADA | KALUNGA OHA TALE KO NGAHELIPI OITA?

Etaleko laKalunga li na sha noita kunena

Etaleko laKalunga li na sha noita kunena

Ovanhu kunena ohava fininikwa navahapu ohava ilikana kuKalunga va mone epepelelo nokulipula ngeenge onava ka mone ngoo epepelelo. Mbela Kalunga oha udu ngoo ekemo lavo? Ongahelipi shi na sha naavo hava kendabala okulwa opo va xulife po omafininiko? Mbela Kalunga oha yambidida ngoo eenghendabala davo nokutala ko oita yavo tai dulu okuyukifa oinima?

Harmagedon oita oyo tai ka xulifa po oita aishe

Shotete, tala eendjovo edi tadi hekeleke: Kalunga oku wete okumona oixuna oko ku li mounyuni kunena, nokwa hala okuninga po sha shi na sha na ko. (Epsalme 72:13, 14) Kalunga okwa udaneka mEendjovo daye, Ombibeli, kutya ‘ava va hepekwa, otava ka mona etulumuko.’ Mbela otashi ka ningwa naini? “Omokuholoka kwOmwene Jesus, fiku ta di meulu pamwe novaengeli vaye ovanaenghono, . . . fiku ta handukile ava inava shiiva Kalunga noitava dulika kevangeli lOmwene wetu Jesus.” (2 Ovatessaloniki 1:7, 8) Jesus ote ke uya monakwiiwa ‘mefiku linene laKalunga omunamapangelo aeshe,’ efiku olo la shiivika nawa Harmagedon. — Ehololo 16:14, 16.

Moita yomonakwiiwa, Kalunga ita ka longifa ovanhu ndele Omona waye, Jesus Kristus, pamwe novaengeli ovanaenghono opo va ka lwife ovakolokoshi. Etangakwaita lomeulu otali ka xulifa po omafininiko aeshe. — Jesaja 11:4; Ehololo 19:11-16.

Etaleko laKalunga li na sha noita nokunena inali lunduluka. Natango Kalunga oku wete sha wapala okweeta oita opo a xulife po omafininiko noukolokoshi. Ngaashi twe shi mona mondjokonona, Kalunga oye mwene ha tokola kutya onaini oita ina  okuluwa nonokutya oolyelye tava ka lwa. Kalunga okwa tokola nale kutya oita yomonakwiiwa oyo tai ka xulifa po oukolokoshi nokuhandukila ovafininiki otai ka luwa kOmona waye, Jesus Kristus. Osho otashi ulike kutya oita oyo tai luwa kombada yedu kunena Kalunga ine i hokwa, kashi na nee mbudi kutya otai eta oidjemo ilipi.

Oku shi faneka: Natu tye nee ngeno ounona vavali ova hovela okulwa omanga xe a dja po. Opo nee ova efa manga okulidenga ndele tava dengele xe ongodi. Umwe ota popi kutya mukwao oye a hovela oku mu denga, ofimbo mukwao ta ti okwa ningwa nai ku mukwao. Aveshe ova lombwela xe nelalakano va popilwe. Eshi xe a pwilikina kuvo, okwe va lombwela kutya inava lwa vali fimbo te uya keumbo a yukife oinima. Ounona ova teelela ashike okafimbo kanini, ndele tava hovele okulwa natango. Eshi xe a fika meumbo, ka li a hafela eenghatu davo nokwe va handukila aveshe molwaashi inava dulika kuye.

Kunena oiwana oyo hai lwifafana ohai pula ekwafo kuKalunga. Ashike Kalunga iha kufa ombinga moita oyo. Ponhele yaasho, Ombibeli otai ti: “Inamu alulila nande omunhu owii waye.” (Ovaroma 12:17, 19) Kakele kaasho, Kalunga okwa popya kutya ovanhu ove na ‘oku mu teelela’ a katuke onghatu, naasho ote ke shi ninga puHarmagedon. (Epsalme 37:7) Ngeenge oiwana oya dopa okuteelela Kalunga a katuke onghatu, ndele tai lu, Kalunga oha taleko oita oyo i li elongifo leenghono noine ihokwa. Onghee hano, puHarmagedon Kalunga ota ka ‘handukila oiwana aishe’ lumwe aluke ‘mokuxulifa po oita fiyo okeengaba dedu.’ (Epsalme 46:10; Jesaja 34:2) Oita aishe otai ka xulifwa po puHarmagedon.

Okuxulifwa po kwoita otaku ka kala limwe lomomanangeko noupuna Ouhamba waKalunga. Jesus okwa popya epangelo olo meilikano laye olo li shiivike nawa a ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:10) Ouhamba waKalunga itau ka xulifa po ashike oita ndele otau ka xulifa po yo ovakolokoshi ovo hava eta oita. * (Epsalme 37:9, 10, 14, 15) Onghee hano, itashi kumwifa eshi ovashikuli vaJesus va teelela nodjuulufi oku ka mona omanangeko noupuna Ouhamba waKalunga. — 2 Petrus 3:13.

Mbela otu na okuteelela oule wefimbo li fike peni Ouhamba waKalunga u uye u xulife po okumona oixuna akushe, omafininiko noukolokoshi? Omaxunganeko Ombibeli oo taa wanifwa otaa ulike kutya otu li ‘momafiku axuuninwa’ onghalelo ei yoinima. (2 Timoteus 3:1-5) * Ouhamba waKalunga otau ka xulifa po onghalelo yomomafiku axuuninwa diva noita yaHarmagedon.

Ngaashi twe shi mona metetekelo, ovo tava ka hanaunwa po poita ya xuuninwa yaHarmagedon ovo vo inava “dulika kevangeli lOmwene wetu Jesus.” (2 Ovatessaloniki 1:8) Ashike, dimbuluka kutya Kalunga iha hokwa efyo lovanhu nokuli nolovahenakalunga. (Hesekiel 33:11) Kalunga “ina hala pa kane nande umwe” moita oyo ya xuuninwa nomolwaashi onghundana iwa kombinga yOmwene wetu Jesus i na ‘okuudifilwa ounyuni aushe i ningile oiwana aishe ondombwedi’ fimbo exulilo inali uya. (2 Petrus 3:8, 9; Mateus 24:14; 1 Timoteus 2:3, 4) Kunena ovanhu ove na omhito yokulihonga kombinga yaKalunga okupitila moilonga yokuudifa yEendombwedi daJehova oyo tai longwa mounyuni aushe, okudulika kevangeli laJesus nokuteelela efimbo olo eshi itapa ka kala vali oita.

^ okat. 9 Ouhamba waKalunga otau ka xulifa po yo efyo olo li li omutondi wovanhu. Ngaashi sha yelifwa metukulwa 7, lembo Ombibeli otai hongo lela shike? la nyanyangidwa kEendombwedi daJehova. Kalunga ota ka nyumuna ovanhu omamiliyona mwa kwatelwa vahapu ovo va fila moita momukokomoko womido.

^ okat. 10 Opo u mone ouyelele muhapu u na sha nomafiku axuuninwa, tala etukulwa 9 lembo Ombibeli otai hongo lela shike? la nyanyangidwa kEendombwedi daJehova.

Lihonga shihapu

Omolwashike ihamu i moita?

Eendombwedi daJehova oda shiivika mounyuni aushe kutya ihadi i moita. Lihonga kutya omolwashike tu na omufika wa tya ngaho.