Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO (OSHIFO SHOKUKONAKONWA) MARSA 2017

Yandja efimano kwaau a wana oku li pewa

Yandja efimano kwaau a wana oku li pewa

“Kwaau e li omutumba kolukalwapangelo nokOdjona, ehambelelo nefimaneko nefimano neenghono fiyo alushe.” — EH. 5:13.

OMAIMBILO: 9, 108

1. Omolwashike ovanhu vamwe va wana okufimanekwa, noshike hatu ka kundafana paife?

OKUFIMANEKA umwe otashi ti oku mu pa elitulemo le likalekelwa nefimaneko. Ohatu kala twa teelela omunhu oo a wana okupewa elitulemo nokufimanekwa a ninge oshinima shonhumba shiwa opo a kale a wana okufimanekwa. Otashi dulika tu lipule kutya, olyelye tu na okufimaneka, nomolwashike a wana okufimanekwa?

2, 3. (a) Omolwashike Jehova oye a wana okufimanekwa? (Tala efano pehovelo loshitukulwa.) (b) Olyelye odjona oyo ya popiwa mEhololo 5:13, nomolwashike a wana okufimanekwa?

2 Ehololo 5:13 ola ti, ‘ou e li omutumba kolukalwapangelo nOdjona’ okwe lilongela okufimanekwa. Metukulwa eti-4 lembo olo omu na etomheno kutya omolwashike Jehova a wana okufimanekwa. Ovaengeli meulu ova li va tanga Jehova nondaka yopombada va ti, “ndele ta kala e nomwenyo alushelushe.” Ova popya vali va ti: “Omwene wetu naKalunga ketu, Ove owa wana okutambula efimano nefimaneko nepangelo, osheshi Ove owa shita oinima  aishe, ndele kehalo loye oi li po, noya shitwa.” — Eh. 4:9-11.

3 ‘Odjona yaKalunga Jesus Kristus tai kufa po omatimba ounyuni.’ (Joh. 1:29) Ombiibeli oye tu lombwela kutya Jesus okwa tumbala e dule eehamba adishe. Oya ti: “Ou Omupangeli aeke, Ohamba yeehamba adishe nOmwene woovene, ou aeke ita fi noha kala mouyelelelela omu itamu shiiva okwiiwa, Oye ina monika nande okomunhu, Ye ita dulu okutalwa.” (1 Tim. 6:14-16) Mbela ohamba vali ilipi ya li ye liyamba i fye omolwomanyono etu? Mbela itashi ku linyengifa u waimine ongudu yovaengeli ovo tava ingida tava ti: “Odjona ei ya dipawa, oyo ya wana okutambula epangelo noupuna nounongo neenghono nefimaneko nefimano nehambelelo.” — Eh. 5:12.

4. Omolwashike okufimaneka Jehova naKristus shihe fi ehoololo?

4 Okufimaneka Jehova naJesus kashi fi ehoololo. Ohatu ka mona ashike omwenyo waalushe ngeenge otwa kala twe va fimaneka aveshe. Jesus okwa popya muJohannes 5:22, 23, a ti: “Tate ita tokola nande umwe, ndelenee etokolo alishe okwe li yandja kOmona, opo aveshe va fimaneke Omona, ngaashi tava fimaneke Xe. Ou ita fimaneke Omona, oye ita fimaneke Xe ou e mu tuma.” — Lesha Epsalme 2:11, 12.

5. Omolwashike twa pumbwa okufimaneka ovanhu aveshe?

5 Ovanhu ova shitwa ‘oshifeka shaKalunga.’ (Gen. 1:27) Ashike ohava ulike omaukwatya amwe opakalunga meenghedi da yoolokafana. Ovanhu otava dulu okuulikilafana ohole, olune nosho yo olukeno. Molwaashi ovanhu ova shitwa ve na eliudo, oshi li paushitwe oku lipula kutya oshike shi li mondjila naasho sha puka, ohava kendabala okuyoolola oshili noukengeleledi, oinima oyo i fifa ohoni naayo ya tambulwa ko, ashike haalushe etaleko lavo hali kala li li mondjila. (Rom. 2:14, 15) Vahapu ove hole oinima oyo ya yela noiwa, nohava kala va hala okukala nombili navamwe. Kutya nee ove shi didilika mo ile hasho, ohava ulike kutya ova tumbaleka Jehova, nomolwaasho navo ova wana okufimanekwa. — Eps. 8:5.

OTWA PUMBWA ONDJELE NGEENGE HATU FIMANEKE OVANHU VAKWETU

6, 7. Ngeenge tashi uya pokufimaneka ovanhu, Eendombwedi daJehova oda yooloka ko ngahelipi kovanhu vahapu?

6 Ondjele oya pumbiwa ngeenge hatu hoolola kutya otu na okufimaneka ovanhu monghedi ilipi ile shi fike peni. Ovanhu vahapu inava wanenena ova nwefwa mo neenghono komhepo younyuni waSatana, nomolwaasho hava kala va tala ko ovalumenhu ile ovakainhu vamwe ve li oikalunga ponhele yoku va fimaneka pandjele. Luhapu, ovanhu ohava kala va tala ko ovawiliki vomalongelokalunga novopapolotika, ovakufimbinga vomaudano, ovashikingalo nosho yo vamwe ovo ve shiivike apeshe va fimana unene ve dule ovanhu aveshe. Ovanyasha novakulunhu ohave va tale ko ve li oihopaenenwa iwa tashi dulika va hopaenene omikalo davo, omidjalo ile elihumbato lavo.

7 Ovakriste vashili ohava henuka okukala va fimaneka ovanhu monghedi oyo. Kristus oye ashike omunhu oo a li ko hatu dulu oku mu tala ko e li oshihopaenenwa sha wanenena. (1 Pet. 2:21) Kalunga ita ka kala a hafa ngeenge otwa kala hatu fimaneke ovanhu sha pitilila. Otwa pumbwa okukaleka momadiladilo oushili ou kutya: “Aveshe ova nyona, novehe noshinge shaKalunga.” (Rom. 3:23) Oshoshili kutya kape na omunhu a wana okufimanekwa fiyo opondodo oyo a ninga oshikalunga.

8, 9. (a) Eendombwedi daJehova ohadi tale ko ongahelipi ovapangeli vopanhu? (b) Fiyo oposhitwa shilipi tuhe na okuyambidida ovakwanepangelo?

 8 Mounyuni, ovanhu vamwe ove na eenghonopangelo omolweendodo davo. Ovakwanepangelo ova teelelika va kaleke po omhango nelandulafano nokufila oshisho eemhumbwe dovakwashiwana. Naasho ohashi etele ovakwashiwana ouwa. Omuyapostoli Paulus okwa londwela Ovakriste va tale ko ovapangeli vopanhu ve li ‘ovapangeli’ vavo nove na okudulika kuvo. Okwe va lombwela a ti: “Yandjeni kwaaveshe eshi mu nokuyandja: efendelo kwaau e nokupewa efendelo, . . . efimano kwaau e nokufimanekwa.” — Rom. 13:1, 7.

9 Eendombwedi daJehova ohadi fimaneke nehalo liwa ovo ve na eenghonopangelo, ngaashi sha teelelika nosha tambulwa ko moshilongo. Ohatu longele kumwe navo eshi tava wanifa po oinakuwanifwa yavo. Oshoshili kutya ohatu va fimaneke noku va yambidida pandjele she likolelela kwaasho Ombiibeli tai ti. Itatu dulu oku va fimaneka fiyo oposhitwa opo itatu dulika kuKalunga ile hatu nyono po omufika wetu wopaKriste. — Lesha 1 Petrus 2:13-17.

10. Ongahelipi ovapiya vaJehova vonale va li va tula po oshihopaenenwa shiwa monghedi omo va li hava ungaunga nomapangelo nosho yo novakwanepangelo?

10 Ovapiya vaJehova vonale ova tula po oshihopaenenwa shiwa monghedi omo va li hava ungaunga nepangelo nosho yo novakwanepangelo. Eshi Epangelo laRoma la li la ifana ovanhu ve ke lishangife, Josef naMaria ova li va dulika. Ova li va ya kuBetlehem nonande Maria okwa li e li pokumona okaana kaye kotete. (Luk. 2:1-5) Lwanima, eshi Paulus a li a lundilwa, okwa li e lipopila nefimaneko nokwa li a fimaneka Ohamba Herodes Agrippa naFestus, oo a li omupangeli woshitukulwa shaRoma muJudea. — Oil. 25:1-12; 26:1-3.

11, 12. (a) Omolwashike twa yoolola ko ovakwanepangelo kovawiliki vomalongelokalunga? (b) Oidjemo iwa ilipi ya etifwa eshi Ondombwedi yokoAustria ya li ya fimaneka omunapolitika?

11 Eendombwedi daJehova ohadi henuka filufilu okufimaneka ovawiliki vomalongelokalunga monghedi ye likalekelwa, nonande otashi dulika ovawiliki osho hava kala va teelela va ningilwe. Omalongelokalunga oipupulu ohae liti kutya otaa longele Kalunga nokwa hekula Eendjovo daye. Ovawiliki vomalongelokalunga inava wana okupewa efimano le likalekelwa, ponhele yaasho ohatu va fimaneke ashike ngaashi ovanhu vakwetu. Jesus okwa li a tokola ovalumenhu vopefimbo laye ve li ovanaihelele nova pofipalekwa. (Mat. 23:23, 24) Mepingafano naasho, ngeenge otwa kala hatu fimaneke ovakwanepangelo, otashi ka eta oidjemo iwa.

12 Leopold Engleitner okwa li Ondombwedi i na ouladi ya dja koAustria, oo a li a kwatwa po kepangelo laNazi nokwa li a tumwa neshina lokolutenda kokamba yaBuchenwald. Ova li va enda pamwe nomunadolongo mukwao Heinrich Gleissner, oo a kala omunapolitika moAustria, nokwa li a hovela okukala e li omhinge nepangelo laNazi. Eshi ve li mondjila yokuya kokamba, omumwatate Engleitner okwa li a yelifila Gleissner eitavelo laye nefimaneko, nokwa li a pwilikina nelitulemo. Konima yoita itivali younyuni, Gleissner okwa kala ha longifa eshiivo laye a kwafele Eendombwedi moAustria. Otashi dulika to dimbuluka oihopaenenwa oyo ya eta oidjemo iwa eshi Eendombwedi da kala hadi dulika kovakwanepangelo pandjele, noku va fimaneka ngaashi Ombiibeli ya popya.

VAMWE OVO VA WANA OKUFIMANEKWA

13. Oolyelye va wana okufimanekwa, nomolwashike?

13 Ovaitaveli vakwetu ova wana okufimanekwa  unene tuu ovakulunhuongalo ovo hava kwatele komesho. (Lesha 1 Timoteus 5:17.) Ohatu fimaneke ovamwatate ovo kashi na nee mbudi kutya ova dja peni, ova mona ehongo li fike peni, ove na omufika watya ngahelipi moulikumwe wovanhu ile ove na ouxupilo watya ngahelipi. Ombiibeli oye va popya kutya ove li “eeshali kovanhu,” nove li oshitukulwa shelongekido laKalunga va file oshisho eemhumbwe doshiwana shaye. (Ef. 4:8) Diladila kombinga yovakulunhuongalo, ovapashukilishikandjo, oilyo yOkomitiye yOshitaimbelewa nosho yo oilyo yOlutuwiliki. Ovamwatate novamwameme vomefelemudo lotete ova kala hava fimaneke ovo hava nangekwa po va kwatele komesho, nafye otu na okuninga sha faafana. Inatu pumbwa okukala twa fimaneka sha pitilila ovakalelipo vehangano ovo va shiivika apeshe ile tu va tale ko va fa ovaengeli. Ashike ohatu va fimaneke omolwelininipiko lavo noilonga yavo youdiinini. — Lesha 2 Ovakorinto 1:24; Ehololo 19:10.

14, 15. Eyooloko lilipi li li pokati kovafita Ovakriste vashili naavo have liti kutya ovafita?

14 Ovakulunhuongalo ova talika ko ve li ovafita veongalo ovalininipiki. Omolwelininipiko lavo, ohava henuka okuungaungiwa navo va fa ovanhu ovo ve shiivike apeshe. Kungaho ova yooloka ko kovawiliki vahapu vomalongelokalunga okunena naavo vomefelemudo lotete ovo Jesus a li a popya kutya: “Ove hole peenhele dokomesho moivilo nomomalukalwa okombada omeeshinagoga, nokukundwa poilandelo.” — Mat. 23:6, 7.

15 Ovakulunhuongalo ohava dulika nelininipiko keendjovo daJesus odo da ti: “Inamu itavela nande mu ifanwe Rabbi, osheshi omuhongi weni Oumwe, ndele onye amushe ovamwainafana. Ndele inamu ifana nande olyelye wokombada yedu xo, osheshi nye omu na Xo umwe aeke, ou womeulu. Ndele inamu itavela mu ifanwe omupukululi, osheshi omupukululi weni umwe aeke, Oye Kristus. Ndele omunene womokati keni na kale omuyakuli weni. Ndele ou te linenepeke, oye ta ninipikwa, naau te lininipike, ye ota nenepekwa.” (Mat. 23:8-12) Otwa mona kutya omolwashike ovakulunhuongalo momaongalo aeshe va wana okuulikilwa ohole nokufimanekwa kEendombwedi dikwao.

Ovakulunhuongalo ova wana okukala ve holike nokufimanekwa omolwelininipiko lavo (Tala okatendo 13-15)

16. Omolwashike twa pumbwa okulonga noudiinini opo tu ude ko nokutula moilonga osho Ombiibeli ye tu lombwela shi na sha nokufimaneka vamwe?

16 Ohashi pula efimbo opo tu kale tu na ondjele tu dule okumona kutya oolyelye tu na okufimaneka nongahelipi tu na oku  shi ninga. Ovakriste vonale navo ova li va taalela onghalo ya faafana. (Oil. 10:22-26; 3 Joh. 9, 10) Ashike otwa pumbwa okuninga eenghendabala opo tu tule moilonga omayele Ombiibeli e na sha nokufimaneka vamwe. Okukala tu na ondjele ohaku eta oidjemo iwa.

OMAUWA OO HAA DI MOKUFIMANEKA VAMWE

17. Omauwa amwe elipi haa di mokufimaneka ovo ve li peendodo dokukala ve na eenghonopangelo?

17 Ngeenge otwa kala hatu fimaneke ovo ve na eenghonopangelo mounyuni, otashi dulika va ka popile oufemba wetu wokuudifa nopehe na okulidopa mo. Luhapu, oilonga yetu ohai kala ya fimanekwa. Konima yomido donhumba, Birgit, omukokolindjila wokoGermany, okwa li a ya kofikola yokaana kaye efiku olo va li tava pewa eedjapo. Ovahongifikola ova li va lombwela Birgit kutya ova hafa eshi va kala tava longo pamwe nounona vEendombwedi omido adishe odo. Ova ti kutya ngeno kava li ve na ounona vEendombwedi mofikola yavo ngeno osha kala shi fifa ohoni kuvo. Birgit okwa ti: “Ounona vetu ovahongwa okukala hava shikula omifikamhango daKalunga di na sha nanghee ve na okulihumbata, naasho osha kwatela mo okukala hava fimaneke ovahongi.” Omuhongi umwe okwa ti: “Ngeno ounona aveshe ova li va fa ounona vEendombwedi, ngeno ohatu longo ashike twa fa tu li moparadisa.” Konima yoivike yonhumba, omuhongifikola umwe okwa li a ya koshoongalele koLeipzig.

18, 19. Omolwashike sha fimana okufimaneka ovakulunhuongalo pandjele?

18 Otu na okufimaneka ovakulunhuongalo pandjele, hatu wilikwa komafinamhango omEendjovo daKalunga. (Lesha Ovaheberi 13:7, 17.) Otwa pumbwa oku va pandula omolwoilonga yavo youdiinini nokukendabala okulongela kumwe newiliko olo tave tu pe. Ngeenge otwa kala hatu ningi ngaho otashi ke va kwafela va twikile okulonga oilonga yavo nehafo. Ashike osho inashi hala kutya otu na okuhopaenena omukulunhuongalo wonhumba monghedi omo ha djala nokuliwapeka, omikalo daye ngeenge ta popi moipafi ile nokuli monghedi omo ha kundafana novanhu. Ngeenge otwa kala hatu ningi ngaho, otashi ka yandja etale ko la puka. Inatu dimbwa kutya naye ina wanenena. Kristus okwe tu tulila po oshihopaenenwa osho tu na okushikula.

19 Ohatu ka dula okukwafela ovakulunhuongalo ngeenge otwe va fimaneka pandjele. Kungaho otava ka dula okuhenuka noupu omhepo younhwa, okukala ve udite ve dule vamwe ile okukala ve lishii ouyuki.

20. Okufimaneka vamwe hashi tu kwafele ngahelipi?

20 Ngeenge otwa kala hatu fimaneke ovo va wana okufimanekwa otashi ke tu kwafela tuha kale tu lihole fye vene. Ohashi tu kwafele tu henuke eamo lokulitumbaleka ngeenge hatu fimanekwa, noku tu ningifa yo tu kale metwokumwe nehangano laJehova olo ihali fimaneke ovanhu sha pitilila kashi na nee mbudi kutya ove li ovaitaveli ile hasho. Shikwao vali, ohashi tu kwafele tuha punduke ngeenge ovanhu ovo twa fimaneka ove tu udifa nai.

21. Ouwa wa fimanenena ulipi hau di mokufimaneka ovo va wana okufimanekwa?

21 Osha fimanenena okufimaneka vamwe pandjele molwaashi kungaho ohatu hafifa Kalunga. Ohatu dulika kuye nohashi tu ningifa tu kale ovadiinini kuye, nokunyamukule aveshe ovo have mu sheke. (Omayel. 27:11) Ounyuni ouyadi ovanhu ovo onghedi yavo yokufimaneka vamwe ya xutuka. Otwa pandula shili eshi twa shiiva nghee tu na okufimaneka ovanhu monghedi oyo Jehova a hokwa.