Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Eendombwedi daJehova

Oshikwanyama

Mbela Eendombwedi daJehova oda itavela mEtestamenti Likulu?

Mbela Eendombwedi daJehova oda itavela mEtestamenti Likulu?

Heeno. Eendombwedi daJehova oda itavela kutya Ombibeli aishe oya ‘yandjwa keenghono domhepo yaKalunga noi shii kulonga.’ (2 Timoteus 3:16) Osho osha kwatela mo Etestamenti Lipe nEtestamenti Likulu, ngaashi haa ifanwa kuvahapu. Eendombwedi daJehova ohadi ifana oitukulwa oyo yOmbibeli kutya Omishangwa dOshiheberi nOmishangwa dopaKriste dOshigreka. Osho ohashi tu kwafele tuha diladile kutya oitukulwa imwe yOmbibeli oya kwisha ile itai wapalele vali pefimbo letu.

Omolwashike Ovakriste va pumbwa Omatestamenti aeshe avali, Lipe naali Likulu?

Omuyapostoli Paulus okwa li a nwefwa mo a shange ta ti: “Keshe eshi sha shangwa nale, osha shangelwa elongo letu.” (Ovaroma 15:4) Onghee hano, Omishangwa dOshiheberi odi na omauyelele a fimana kufye mwa kwatelwa omahokololo onale oo tae tu kwafele kunena nosho yo omayele taa longo.

  • Omahokololo onale. Omishangwa dOshiheberi odi na omauyelele e na sha nanghee eshito la hovela nanghee ovanhu va nyona. Ngeno kapa li omauyelele a tya ngaho, ngeno katu na omanyamukulo taa mbilipaleke omapulo ngaashi: Otwa dja peni? Omolwashike hatu fi? (Genesis 2:7, 17) Shikwao vali, Omishangwa dOshiheberi odi na yo omahokololo anghee Jehova a kala ta ungaunga novanhu ovo va li meenghalo diwa ile didjuu ngaashi ashike fye.—Jakob 5:17.

  • Omayele taa longo. Omambo Ombibeli, Omayeletumbulo nOmuudifi oo e li oshitukulwa shOmishangwa dOshiheberi, oe na ounongo ihau kwishi oo tau kwafele omunhu a kale nonghalamwenyo ya amenwa. Oe na omayele anghee ovanhu tava dulu okukala va hafa momaukwaneumbo avo (Omayeletumbulo 15:17), okukala nondjele ngeenge tashi uya poilonga (Omayeletumbulo 10:4; Omuudifi 4:6) nonghee ovanyasha tava dulu okuhafela ounyasha wavo (Omuudifi 11:9–12:1).

Shikwao vali, ohatu dulu okumona ouwa mokukonakona Omhango yaMoses oyo ya shangwa momambo otete atano Ombibeli. Nonande Ovakriste kave li koshi yOmhango oyo, oi na omafinamhango a fimanenena oo taa dulu oku tu kwafela opo tu kale monghalamwenyo ihafifa.—Leviticus 19:18; Deuteronomion 6:5-7.