Inda koshikalimo

Inda kelandulafano etivali

Eendombwedi daJehova

Oshikwanyama

Omolwashike Eendombwedi daJehova ihadi kufa ombinga mopolotika?

Omolwashike Eendombwedi daJehova ihadi kufa ombinga mopolotika?

Eendombwedi daJehova ihadi kufa ombinga mopolotika omolwelongelokalunga lado olo la kanghamena kwaasho Ombibeli tai hongo. Ihatu ningi omakangha, ihatu hoolola eengudu dopapolotika ile ovakwatelikomesho veengudu, ihatu dimine eendodo dopapolotika ile tu yambidide eenghatu dokulundulula onghedi omo epangelo tali pangele. Otwa itavela kutya Ombibeli otai yandje omatomheno a kola okuninga ngaashi tashi landula.

  • Ohatu landula oshihopaenenwa shaJesus oo a li a anya okukala omuwiliki wopapolitika. (Johannes 6:15) Okwa li a honga ovashikuli vaye va kale vehe “fi vomounyuni ou” nokwa li e shi yelifa nawa kutya kave na okukufa ombinga moinima i na sha nopolotika.—Johannes 17:14, 16; 18:36; Markus 12:13-17.

  • Otu li ovadiinini kOuhamba waKalunga oo Jesus a li a popya, eshi a ti: “Evangeli eli louhamba otali udifilwa ounyuni aushe.” (Mateus 24:14) Tu li ovakalelipo vOuhamba waKalunga, notwa pewa oshinakuwanifwa shokushiivifa okuuya kwao, ihatu kufa ombinga moinima yopapolitika moilongo aishe, mwa kwatelwa oshilongo omo tu li.—2 Ovakorinto 5:20; Ovaefeso 6:20.

  • Okuhakufa ombinga mopolotika, ohaku tu kwafele tu udifile ovanhu veengudu adishe dopapolotika kombinga yonghundana iwa yOuhamba waKalunga twa manguluka. Ohatu kendabala okuulika pakupopya nopailonga kutya otwe lineekela kutya Ouhamba waKalunga oo ashike tau ka kandula po omaupyakadi ounyuni.—Epsalme 56:12.

  • Molwaashi inatu pitika tu tukaulwe kopolitika, otwa hangana tu li oumwainafana womounyuni aushe. (Ovakolossi 3:14; 1 Petrus 2:17) Mepingafano naasho, omalongelokalunga oo haa kufa ombinga mopolitika ohaa tukaula oilyo yao.—1 Ovakorinto 1:10.

Okufimaneka omapangelo. Nonande ihatu kufa ombinga mopolitika, ohatu fimaneke eenghonopangelo depangelo olo tali tu pangele. Osho oshi li metwokumwe noshipango shOmbibeli, osho kutya: “Omunhu keshe na dulike kovapangeli ava have mu pangele.” (Ovaroma 13:1) Ohatu dulika komhango, hatu futu oifendela nohatu longele kumwe nepangelo mokufila oshisho onghalonawa yovapangelwa valo. Ponhele yokukufa ombinga meenghendabala dokuumba ko epangelo koshipundi, ohatu landula omayele Ombibeli e na sha nokwiilikanena “eehamba novapangeli aveshe,” unene tuu ngeenge tava ningi omatokolo oo taa kumu emanguluko lokulongela Kalunga.—1 Timoteus 2:1, 2.

Otwa fimaneka yo oufemba wavamwe wokuninga omatokolo moinima yopapolitika. Pashihopaenenwa, ihatu piyaaneke omahoololo ile tu piyaaneke ovo va hala okuhoolola.

Mbela okuhakufa ombinga moinima yopapolitika okwa hovela ashike mefimbo letu? Hasho. Ovayapostoli nosho yo Ovakriste vomefelemudo lotete, ova li va kaleka po omufika wavo ngeenge tashi uya peenghonopangelo domapangelo. Embo Beyond Good Intentions ola ti: “Nonande ova itavela kutya ove na okudulika komapangelo, Ovakriste vopefimbo lonale kava li va itavela mokukufa ombinga moinima i na sha nopolitika.” Sha faafana, embo On the Road to Civilization ola popya la ti kutya Ovakriste vonale “inava kufa ombinga mokukwatela komesho mopolotika.”

Mbela okuhena ombinga kwetu moinima yopapolotika otaku nyono po eameno loshiwana? Ahowe. Otu li eedalele doilongo dinambili odo omapangelo ehe na okukala a tila. Tala kolopota yomo 2001 oyo ya li ya shangwa ko-National Academy of Sciences of Ukraine. Olopota oyo oya popya shi na sha nokuhakufa ombinga kwetu mopolotika, ya ti: “Kunena vamwe otashi dulika va kale ve tonde omufika wEendombwedi daJehova; osho osho sha li she di tamanekifa kepangelo enaenghono laNazi nosho yo komapangelo oukomonisi omonakudiwa.” Ashike nande Eendombwedi oda li da fininikilwa kongudi kepangelo laSoviet, “oda kala ovakwashiwana hava dulika komhango. Oda kala hadi longo meefaalama nomeefabilika, nopehe na okuliholamwene nopauyuki, noka da li da ningila nande omapangelo oukomonisi omatilifo.” Olopota oya li ya xulifa tai ti kutya omahongo neenghedi dEendombwedi daJehova “ihaa nyono po eameno noudiinini woshilongo nande oshimwe.”

Lihonga shihapu

OMAPULO OO HAA PULWA LUHAPU

Omolwashike ihamu i moita?

Eendombwedi daJehova oda shiivika mounyuni aushe kutya ihadi i moita. Lihonga kutya omolwashike tu na omufika wa tya ngaho.