Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Eendombwedi daJehova

Oshikwanyama

Mbela Ombibeli yo-New World Translation oi li ngoo paushili?

Mbela Ombibeli yo-New World Translation oi li ngoo paushili?

Oshitukulwa shotete sho-New World Translation osha li sha pita mo 1950. Okudja opo, ovanhu vamwe kava li ve wete ngeenge o-New World Translation * oi li ngoo paushili molwaashi ope na oinima imwe inai fa omatoloko eembibeli amwe e lili. Etomheno leyooloko olo oli li mongudu imwe noinima tai landula.

  • Oi shii okulineekelwa. O-New World Translation oya tolokwa konima eshi kwa ningwa omapekapeko e li pefimbo oo a kwatela mo omashangelo onale e shii okulineekelwa. Mepingafano naasho, o-King James Version yomo 1611 oya tolokwa ya kufwa momashangelo oo a li ehe li lela paushili nokae fi lela onale ngaashi oo a longifwa mokutoloka o-New World Translation.

  • Oudiinini. O-New World Translation oya tolokwa kwa ningwa eenghendabala dokukaleka mo etumwalaka ngaashi la li pehovelo eshi la shangwa la nwefwa mo kuKalunga. (2 Timoteus 3:16) Omatoloko mahapu inaa toloka etumwalaka laKalunga li li ngaashi li li molwaashi ovatoloki ova shikula eenghulunghedi dovanhu, pashihopaenenwa, ova pingena po edina laKalunga, Jehova, nomadinafimaneko ngaashi Omwene ile Kalunga.

  • Omautumbulilo okwa tolokwa e li ngaashi e li. Ponhele yokungonga omatumbulo, o-New World Translation oye a toloka e li ngaashi e li shimha ashike okuninga ngaho inaku shi ningifa shidjuu oku a uda ko ile itaa holola lela ediladilo lomishangwa ngaashi da li da shangwa pehovelo. Omatoloko oo haa toloka Ombibeli taa yelifa omautumbulilo, oshi na oupu a tule mo omadiladilo opanhu ile a nhuke po omauyelele amwe a fimana.

Eyoololoko olo li li pokati ko-New World Translation nomatoloko amwe

Omambo amwe oo ehe mo. Katoolika kaRoma neengeleka dikwao dOrtodoks dokOushilo oda weda meembibeli dado omambo oo vamwe ve shii kutya inaa nwefwa mo. Ashike, omambo a tya ngaho kaali a tambulwa ko kOvajuda noshi li yo shididilikwedi eshi Ombibeli tai ti kutya Ovajuda ovo “tetetete . . . va pewa eendjovo daKalunga.” (Ovaroma 3:1, 2) Onghee hano, o-New World Translation nomatoloko mahapu Ombibeli okunena inaa kwatela mo omambo oo inaa nwefwa mo.

Eevelishe odo dihe mo. Omatoloko amwe okwa weda mo eevelishe nomautumbulilo oo ehe li momashangelo Ombibeli onalenale oo e li ko nokunena, ashike o-New World Translation inai weda mo eevelishe da tya ngaho. Omatoloko mahapu okunena okwa kufa mo eevelishe odo da wedwa po ile a dimina kutya eevelishe da tya ngaho itadi tu kumwe nOmishangwa ngaashi da shangelwe pehovelo. *

Oitya ya yoolokafana. Omafimbo amwe, omatoloko oo a toloka oshitya noshitya ihaa kala a yela nawa ile nokuli a pukife. Pashihopaenenwa, osho Jesus a popya muMateus 5:3 luhapu ohashi tolokwa kutya: “Ovanelao eehepele domhepo.” (English Standard Version; King James Version; New International Version) Vahapu ova mona kutya etoloko olo kutya “eehepele domhepo” ola fa inali yela nawa, ofimbo vamwe tava diladila kutya Jesus okwa li ta divilike efimano lelininipiko ile oluhepo. Ashike, oshitwa shaJesus osha li apa kutya, ehafo lashili ohali di mokukala tu shii kutya otwa pumbwa ewiliko laKalunga. O-New World Translation oya toloka paushili eityo lovelishe oyo eshi ya ti, “ovovo ve shii omhumbwe yavo yopamhepo.”—Mateus 5:3. *

Ovahongwanhu vehe fi Eendombwedi ova popila mouwa o-New World Translation

  • Omutoloki umwe noku li omuhongwanhu wedina Edgar J. Goodspeed, okwa popya monhumwafo yo 8 Desemba 1950, shi na sha no-New World Translation of the Christian Greek Scriptures, a ti: “Ondi na ohokwe moilonga yeni oyo hai longwa kovanhu veni nosho yo kutya ohai longwa mounyuni aushe. Onda hafela yo etoloko leni molwaashi ola yela, la popya kondadalunde noli uditike. Otali ulike kutya ola tolokwa kovanhu va konakona noukeka, nomolwaashi handi li popile.”

    Edgar J. Goodspeed

  • Embo The Interpreter’s Bible, Embo lotete, epandja 99, ola popya shi na sha nomuhongwanhu wedina Allen Wikgren wokounivesti yaChicago, okwa popya shi na sha no-New World Translation kutya oya fa ashike oshipopiwa shonhumba osho inashi tolokwa nande okudja metoloko limwe vali, ndele osha “shangwa ashike melaka olo.”

  • Oshifo The Differentiator, shaAprili 1952, epandja 52 osha popya shi na sha nomunongononi umwe wOmbibeli Omubritina wedina Alexander Thomson oo a popila mouwa oNew World Translation of the Christian Greek Scriptures a ti: “Etoloko otali ulike kutya ola tolokwa kovanhu va lungama novanongo ovo va hongwa nova dula okutoloka eityo lolela lOshigreka ngaashi naanaa Oshiingilisha hashi dulu okuninga ngaho.”

  • Embo The Faiths Men Live By, epandja 300, ola popya shi na sha nomushangi wedina Charles Francis Potter oo nonande okwa li a mona omautumbulilo amwe ehe a udite, okwa ti: “Ovatoloki, nonande inava tumbula omadina avo, ova toloka naanaa ngaashi omashangelo opehovelo a li a shangwa, mOshigreka nomOshiheberi, ve na eshiivo nova ninga omahoololo e li pandunge.

  • Embo Andover Newton Quarterly, Januali 1963, epandja 31, ola popya shi na sha naRobert M. McCoy oo nonande okwa li e udite kutya o-New World Translation oye likalekelwa noya tongomana, konima eshi e i lesha okwa li a fika pexulifodiladilo, eshi a ti: “Etoloko lEtestamendi Lipe otali ulike kutya mehangano (Eendombwedi daJehova) omu na ovanhu ve na eshiivo novapyokoka mokuungaunga nomaupyakadi oo haa kala po ngeenge taku tolokwa Ombibeli.”

  • Embo Andover Newton Quarterly, laSeptemba 1966, epandja 26, ola popya shi na sha nomuhongwanhu wedina S. MacLean Gilmour oo nonande itatu kumwe nomatoloko eevelishe dimwe mo-New World Translation, okwa dimina kutya ovatoloki vayo “ova toloka nawa Omishangwa dOshigreka.”

  • Embo The Classical Journal, Aprili-Mei 1974, epandja 376, ola popya shi na sha naThomas N. Winter oo konima eshi a lesha o-New World Translation oyo ina oitukulwa yo-Kingdom Interlinear Translation of the Greek Scriptures, omuhongwanhu okwe i popila mouwa a ti: “Etoloko olo la tolokwa kokomitiye inai tumbula omadina oli li lela pefimbo naaishe oi li paushili.”

  • Omuhongwanhu wedina Benjamin Kedar Omuheberi womuIsrael okwa li a popya mo 1989, a ti: “Ngeenge handi konakona omutungilo welaka lOmbibeli yOshiheberi nosho yo omatoloko amwe, ohandi yelekanifa alushe netoloko lOshiingilisha olo la shiivika nedina, New World Translation. Mokuninga ngaho, onda ka tomhwa kutya, okutolokwa kwayo otaku ulike kutya okwa ningwa eenghendabala dashili dokuuda ko nawa oshikalimo opo ku tolokwe paushili ngaashi tashi dulika.”

  • Embo Truth in Translation, epandja 163, 165 ola popya shi na sha nomuhongwanhu oo e lihongela oinima i na sha nomaitavelo, wedina Jason David BeDuhn, oo a popya shi na sha nomatoloko omuwoi Oshiingilisha, eshi a ti: “O-NW [New World Translation] oyo aike ya tolokwa paushili mokuyelekanifa nomatoloko amwe.” Nonande ovanhu novahongwanhu vahapu otava ti kutya o-New World Translation oya yooloka ko molwaashi ovatoloki ova toloka she likolelela keitavelo lavo, BeDuhn okwa ti: “O-NW oya yooloka molwaashi oi li paushili mokutoloka omautumbulilo e li ngaashi e li, a kwatela po ediladilo lopehovelo eshi Ombibeli ya shangwa kovashangi vEtestamelnti Lipe.”

^ okat. 2 Omatyekosha e na sha netoloko lo-New World Translation fimbo inali pepalekwa mo 2013.

^ okat. 8 Pashihopaenenwa, tala o-New International Version no-New Jerusalem Bible yaKatolika. Eevelishe odo da wedwa po ongaashi, Mateus 17:21; 18:11; 23:14; Markus 7:16; 9:44, 46; 11:26; 15:28; Lukas 17:36; 23:17; Johannes 5:4; Oilonga 8:37; 15:34; 24:7; 28:29; Ovaroma 16:24. Omatoloko ngaashi King James Version no-Douay-Rheims Version, mu 1 Johannes 5:7, 8 okwa weda mo okatukulwa kamwe ke na sha nOukwatatu oko kali ka wedwa mo konima yomido omafele okudja eshi Ombibeli ya shangwa.

^ okat. 9 Sha faafana, etoloko la-J. B. Phillips’ ola toloka eendjovo daJesus tali ti: “Ovo ve shii kutya ova pumbwa Kalunga,” ofimbo o-The Translator’s New Testament oya toloka ya ti: “Ovo ve shii omhumbwe yavo yopamhepo.”

Lihonga shihapu

Omolwashike Eendombwedi daJehova da nyanyangida o-New World Translation?

Oshike sha ningifa etoloko olo lEendjovo daKalunga li kale le likalekelwa?