Inda koshikalimo

Eendombwedi daJehova

Hoolola elaka Oshikwanyama

Eendombwedi daJehova oda tala ko ngahelipi eteyohombo?

Eendombwedi daJehova oda tala ko ngahelipi eteyohombo?

Ohatu shikula osho Ombiibeli ya popya kombinga yohombo nosho yo eteyohombo. Kalunga eshi a tota po ohombo okwa hala omulumenhu nomukainhu va kale fiyo alushe. Ovalihomboli otava dulu ashike okuteya ohombo ngeenge umwe womuvo a i momilele kondje yohombo. — Mateus 19:5, 6, 9.

Eendombwedi ohadi kwafele ngoo ovalihomboli ovo vehe uditafane?

Heeno, ohadi shi ningi momikalo tadi shikula:

  • Oishangomwa. Ouyelele oo hau kala moishangomwa oyo ohau kwafele eehombo di kale da pama nokuli novalihomboli ovo tava monika ve li loloka. Pashihopaenenwa, tala oshitukulwa “Kala omudiinini keano loye lohombo,” “Nghee to dulu okudimina po kaume koye kopahombo” nosho yo “Twikila okukala we lineekela kaume koye kopahombo.”

  • Okwoongala. Ohatu kundafana omayele opaMbiibeli taa hongo e na sha nohombo pokwoongala, poyoongalele inini naai ya kula.

  • Ovakulunhuongalo. Ovakulunhuongalo ile ovo hava kwatele komesho meongalo ohava kwafele ovalihomboli, tashi dulika ve va kwafele tava longifa Ovaefeso 5:22-25 nokukonakona navo moule.

Mbela ovakulunhuongalo ovo hava tokolele ko ovalihomboli vEendombwedi kutya nava teye ohombo?

Ahowe. Nonande ovakulunhuongalo ova pulwe kovalihomboli ovo ve na oupyakadi mohombo ve va kwafele, kave na oufemba woku va lombwela kutya nava ninge shike. (Ovagalati 6:5) Ashike ngeenge umwe meongalo okwa tokola okuteya ohombo nopehe na etomheno lopaMishangwa, ke na vali efiku a hombole ile a hombolwe paMishangwa. — 1 Timoteus 3:1, 5, 12.

Eendombwedi oda tala ko ngahelipi etopoko?

Ombiibeli otai ladipike ovalihomboli va kala alushe pamwe nokuli nomomafimbo madjuu. (1 Ovakorinto 7:10-16) Omaupyakadi mahapu otaa dulu okukandulwa po ngeenge ovalihomboli ova kala hava ilikana va mana mo, hava tula omoilonga omafinamhango Ombiibeli nokuulikilafana ohole. — 1 Ovakorinto 13:4-8; Ovagalati 5:22.

Ashike nande nongaho, ovalihomboli vamwe ova fiya po ookaume kavo kopahombo omolweenghalo da kwata moiti ngaashi edi tadi landula:

  • Ngeenge omushamane ina hala okufila oshisho oukwaneumbo waye. — 1 Timoteus 5:8.

  • Ngeenge kaume kopahombo oha hepeke mukwo neenghono palutu. — Epsalme 11:5.

  • Ngeenge oupamhepo waumwe u li moshiponga. Pashihopaenenwa, ngeenge kaume umwe kopahombo ota fininike mukwao a nyone oipango yaKalunga monghedi yonhumba ile yongadi, kaume kopahombo oo e li moshiponga ota dulu okutokola kutya etopoko olo ashike tali ke mu kwafela a “dulike kuKalunga shi dulife okudulika kovanhu.” — Oilonga 5:29.