Inda koshikalimo

Eendombwedi daJehova ohadi kufa ngoo ombinga melimbwangomumwe lomaitavelo?

Eendombwedi daJehova ohadi kufa ngoo ombinga melimbwangomumwe lomaitavelo?

Tu li Eendombwedi daJehova ohatu hafele eenghundafana di na sha neitavelo novanhu vomalongelokalunga aeshe, ashike ihatu limbwange mumwe nomaitavelo avamwe. Ombiibeli oya ulika kutya Ovakriste va shili ove li “kumwe” meitavelo limwe, noshimangifo osho oukumwe. (Ovaefeso 4:16; 1 Ovakorinto 1:10; Ovafilippi 2:2) Osha kwatela mo shihapu shi he fi ashike okukala u na omaukwatya mawa ngaashi ohole, onghenda noho dimine po. Eitavelo letu ola kanghamena keshiivo lashili lOmbiibeli, ngeno hako la li la kanghamena ngeno olongaho. — Ovaroma 10:2, 3.

Ombiibeli oya yelekanifa ovanhu ovo have limbwange mumwe nomaitavelo amwe va fa va humbata ondjoko imwe, osho hashi tula moshiponga eitavelo lomukriste. (2 Ovakorinto 6:14-17) Nomolwaasho Jesus ina efa ovalongwa vaye ve limbwange mumwe nomaitavelo amwe e lili. (Mateus 12:30; Johannes 14:6) Sha faafana, Omhango yaKalunga oyo a pa Moses oya indika ovaIsreal vehe limbwanga meitavelo lovashiinda shavo. (Exodus 34:11-14) Ovaisreal ovo va li ovadiinini ova henuka okupewa ekwafo olo tali va ningifa ve limbwange meitavelo limwe li lili. — Esra 4:1-3.

Mbela Eendombwedi daJehova ohadi i ngoo meenghundafana novanhu veitavelo limwe li lili?

Heeno. Mo 2020, Eendombwedi daJehova oda longifa eevili 1 669 901 531 tadi popi novanhu vomaitavelo a yoolokafana. Ngaashi omuyapostoli Paulus, nafye otu na ohokwe okuuda osho ovanhu “vahapu” hava kala tava diladila ngeenge tu li moukalele. (1 Ovakorinto 9:19-22) Ngeenge hatu kundafana novanhu, ohatu kendabala okutula moilonga omayele Ombiibeli hatu shi ningi “netilo” opo tu ulike kutya otwe va fimaneka. — 1 Petrus 3:15