Inda koshikalimo

Omolwashike Eendombwedi daJehova ihadi dana omadalo?

Omolwashike Eendombwedi daJehova ihadi dana omadalo?

Eendombwedi daJehova ihadi dana omadalo, molwaashi oda itavela kutya oivilo ya tya ngaho ihai hafifa Kalunga. Nonande Ombiibeli inai kelela sha yukilila okudana omadalo, otai tu kwafele tu tomhafane koinima yonhumba i na sha noiningwanima oyo nokuuda ko etaleko laKalunga li na sha nayo. Diladila koinima yopane nosho yo komafinamhango opaMbiibeli e na sha naasho.

  1. Okudana omadalo oku na oudilo woshipaani. Emboitya Funk & Wagnalls Standard Dictionary of Folklore, Mythology, and Legend, ola ti: Okudana omadalo okwa kanghamena keitavelo olo kutya pedalo lomunhu, “eemhepo dowii nomanwefemo mai, otaa dulu okuponokela ovakalipo,” nosho yo kutya “okukala po kwookaume nokuhalelafana ouwa oko haku ningwa po, otaku dulu okwaamena ovakalipo.” Embo The Lore of Birthdays ola ti kutya pefimbo lonale, okudidilika omadalo okwa li kwa “pumbiwa omolwoinima i na sha nokutengeneka onakwiiwa” ya kanghamena “kokunyanekela.” Embo olo ola weda ko la ti: “Okwa itavelwa kutya oulexita vopedalo ohava kwafele mokuyandja omahalelo mawa.”

    Ombiibeli oya tokola okulongifa oumhulile, enyanekelo, okukwatafana neemhepo, “naikwao ya fa oyo.” (Deuteronomion 18:14; Ovagalati 5:19-21) Nomolwaasho, etomheno limwe eshi Kalunga a li a tokola oshilando shaBabilon shonale, omolwaashi ovakalimo vasho ova li hava nyanekele, osho shi li onghedi youmhulile. (Jesaja 47:11-15) Oshoshili kutya Eendombwedi daJehova ihadi konenene okanima keshe kutya oke na oudilo washike, ashike ngeenge Omishangwa oda yandja elombwelo la yela, ihatu di lipwililikile.

  2. Ovakriste vopefimbo lonale kava li hava dana omadalo. O-The World Book Encyclopedia oya ti: “Ova li va tala ko okudana edalo laumwe ku li onghedindjikilile yoshipaani.” Ombiibeli otai ulike kutya ovayapostoli nosho yo vamwe ovo va li va hongwa odikilila kuJesus, ova tula po oshihopaenenwa osho Ovakriste aveshe ve na okushikula. — 2 Ovatessaloniki 3:6.

  3. Ovakriste ova teelelwa va kale hava dimbuluka efyo laJesus, ndele hadalo laye. (Lukas 22:17-20) Osho itashi tu kumwifa, molwaashi Ombiibeli oya ti kutya ‘efiku lokufya li dule efiku lokudalwa.’ (Omuudifi 7:1) Okuyuka pexulilo longhalamwenyo yaye yokombada yedu, Jesus okwe liningila edina liwa naKalunga, nokungaho okwa ninga efiku laye lokufya li kale la fimana li dule efiku lokudalwa. — Ovaheberi 1:4.

  4. Ombiibeli inai popya nande omupiya waKalunga umwe a dana edalo. Osho inashi hala okutya inamu popiwa edano ledalo nandenande, molwaashi oya popya omadano avali omadalo aavo va li ihava longele Kalunga. Ashike nande ongaho, poiningwanima aishe oyo, opa popiwa pa ningwa oinima ii. — Genesis 40:20-22; Markus 6:21-29.

Mbela ounona vEendombwedi ohava kala ve udite va patelwa kondje, eshi ihava dana omadalo?

Ngaashi ashike ovadali aveshe vawa, ovadali vEendombwedi navo ohava ulikile ovana vavo ohole momukokomoko womudo, mwa kwatelwa oku va pa omaano nokuninga ouvilo va hafifa. Ohava kendabala okushikula oshihopaenenwa shaKalunga, oo ha yandje oinima iwa kovana vaye nopehe na oku va ngungunina. (Mateus 7:11) Ounona vEendombwedi ihava kala ve udite va patelwa kondje, ngaashi tashi ulikwa momatyekosha taa landula:

  • Tammy, womido 12, okwa ti: “Ohashi kala shihafifa, ngeenge owa pewa omaano ino shi teelela.”

  • Gregory, womido 11, okwa ti: “Nonande ihandi pewa omaano mefiku ledalo lange, ovadali vange ohava landele nge omaano peemhito dimwe di lili. Osho ondi shi hole, molwaashi ohashi hafifa nge.”

  • Eric, womido 6, okwa ti: “Owa hala okutya okupewa oukuki vanini nokwiimbilwa okaimbilo mominute omulongo, oshivilo nee ngaho? Ou uya keumbo letu u tale kutya oivilo yolela ohai ningwa ngahelipi!”