Macokio ma Bibilia

 Mũregi-Kristo ti mũndũ ũmwe kana ithondeka rĩmwe, tondũ Bibilia yugaga atĩ nĩ gũkoragwo na “aregi-Kristo aingĩ.” (1 Johana 2:18) Ngũrani na ũguo, kiugo “mũregi-Kristo” kĩrĩa kiumanĩte na kiugo gĩa Kĩngiriki kĩrĩa kĩonanagia “gũũkĩrĩra Kristo,” kĩrũgamĩrĩire mũndũ o wothe wĩkaga maũndũ maya marũmĩrĩire:

•   Mũndũ o wothe ũtetĩkagia atĩ Jesu nĩwe Kristo (Mesia) kana akauga atĩ ti mũrũ wa Ngai.—1 Johana 2:22.

•   Mũndũ o wothe ũreganaga na Kristo, Mũitĩrĩrie Maguta wa Ngai.—Thaburi 2:1, 2; Luka 11:23.

•   Mũndũ o wothe wĩtuaga atĩ nĩwe Kristo.—Mathayo 24:24.

•   Mũndũ o wothe ũnyariraga arũmĩrĩri a Kristo, tondũ Jesu onaga kũnyarirũo kwa arũmĩrĩri ake ta arĩ we mwene ũranyarirũo.—Atũmwo 9:5.

•   Mũndũ o wothe wĩtuaga Mũkristiano, no ekaga maũndũ ma uuni-watho na matarĩ ma wĩhokeku.—Mathayo 7:22, 23; 2 Akorintho 11:13.

 Makĩria ma Bibilia gwĩta andũ arĩa mekaga maũndũ macio aregi-Kristo, ningĩ nĩ ĩmetaga marĩ othe “mũregi-Kristo.” (2 Johana 7) Aregi-Kristo makoretwo kuo kuuma hĩndĩ ya atũmwo nginya rĩu. Bibilia nĩ yarathĩte atĩ ũndũ ũcio nĩ ũngĩkahaanĩka.—1 Johana 4:3.

Ũrĩa tũngĩmenya aregi-Kristo

•   Matheremagia mawoni ma maheeni megiĩ Jesu. (Mathayo 24:9, 11) Kwa ngerekano, arĩa marutanaga ũhoro wĩgiĩ ũtatũ kana atĩ Jesu nĩ Ngai Mwene-Hinya-Wothe, makoragwo makĩregana na ũrutani wa Jesu, tondũ aaugire ũũ: “Awa nĩ mũnene kũrĩ niĩ.”—Johana 14:28.

•   Aregi-Kristo nĩ mareganaga na ũrĩa Jesu aaugire ũhoro-inĩ wĩgiĩ ũrĩa Ũthamaki wa Ngai ũrutaga wĩra. Kwa ngerekano, atongoria amwe a ndini maugaga atĩ Kristo arutaga wĩra kũgerera thirikari cia andũ. Ũndũ ũcio nĩ ngũrani biũ na ũrĩa Jesu aaugire. Aaugire ũũ: “Ũthamaki wakwa ti wa thĩ ĩno.”—Johana 18:36.

•   Maugaga atĩ Jesu nĩ Mwathani wao, no matiathĩkagĩra mawatho make, ta watho wa kũhunjia ũhoro ũrĩa mwega wĩgiĩ Ũthamaki.—Mathayo 28:19, 20; Luka 6:46; Atũmwo 10:42.