Macokio ma Bibilia

 Aca, ndini ciothe itihaanaine. Bibilia nĩ ĩkoragwo na ngerekano nyingĩ cia ndini itakenagia Ngai. No cigayanio ikundi igĩrĩ.

Gĩkundi kĩa 1: Ndini iria ithathayagia ngai cia maheeni

 Bibilia ĩtaaragĩria ũthathaiya wa ngai cia maheeni na ciugo ta “maheeni,” “itarĩ kĩene,” na “cia tũhũ.” (Jeremia 10:3-5; 16:19, 20) Jehova a Ngai aathire rũrĩrĩ rwa Isiraeli ũũ: “Ndũkanagĩe na ngai ingĩ tiga niĩ.” (Thama 20:3, 23; 23:24) Rĩrĩa Aisiraeli maathathayagia ngai ingĩ, ‘Jehova nĩ aarakaraga mũno.’—Ndari 25:3; Maũndũ ma Alawii 20:2; Atiirĩrĩri Bũrũri 2:13, 14.

 Ngai akoragwo na mawoni o ta macio kwerekera ũthathaiya wa “iria ciĩtagwo ngai.” (1 Akorintho 8:5, 6; Agalatia 4:8) Athĩte arĩa mendaga kũmũthathaiya matige kũnyitanagĩra na andũ arĩa makoragwo ndini-inĩ ya maheeni, akameera ũũ: “Umai gatagatĩ-inĩ kao, na mwĩyamũranie nao.” (2 Akorintho 6:14-17) Angĩkorũo ndini ciothe nĩ ihaanaine na cierekagĩria andũ kũrĩ Ngai-rĩ, nĩ kĩĩ kĩngĩgĩtũma Ngai aheane watho ta ũcio?

Gĩkundi gĩa 2: Ndini iria ithathayagia Ngai ũrĩa wa ma na njĩra atetĩkĩrĩtie

 Rĩmwe na rĩmwe, Aisiraeli nĩ maathathayagia Ngai makĩhũthĩra mawĩtĩkio na mĩtugo yoimanĩte na ũthathaiya wa ngai cia maheeni, no Jehova nĩ aaregire ũndũ ũcio wa gũtukania ũthathaiya wa ma na wa maheeni. (Thama 32:8; Gũcokerithia Maathani 12:2-4) Jesu nĩ aamenereirie atongoria a ndini matukũ-inĩ make tondũ wa ũrĩa maathathayagia Ngai; metuaga ũrĩa maarĩ andũ a ndini, no maarĩ na ũhinga tondũ “[matiatindanagĩra] na maũndũ marĩa ma bata ma Watho, nĩmo kĩhooto na tha na wĩhokeku.”—Mathayo 23:23.

 O na ũmũthĩ, ndini ĩrĩa ĩrũmagĩrĩra ũhoro wa ma noyo tu yerekagĩria andũ kũrĩ Ngai. Ma ĩyo ĩkoragwo thĩinĩ wa Bibilia. (Johana 4:24; 17:17; 2 Timotheo 3:16, 17) Ndini iria ikoragwo na morutani mataratwarana na Bibilia o na nĩ kweheria cieheragia andũ harĩ Ngai. Morutani maingĩ marĩa andũ meciragia moimĩte Bibilia-inĩ, ta Ũtatũ, atĩ muoyo ndũkuaga, na mwaki wa icua, mooimanire na andũ maathathayagia ngai cia maheeni. Ũthathaiya ũrĩa ũrutanaga morutani ta macio “nĩ wa tũhũ” tondũ weheragia maathani ma Ngai na ithenya rĩamo ũkarehe irĩra cia andũ.—Mariko 7:7, 8.

 Ngai nĩ athũire ũhinga wa ndini mũno. (Tito 1:16) Ndini ya ma ĩteithagia andũ makuhĩrĩrie Ngai. Ndĩkaga maũndũ ta arĩ o mũtugo no nĩ yagĩrĩirũo kũhutia matua ma andũ na maũndũ marĩa mothe mareka. Kwa ngerekano, Bibilia yugaga ũũ: “Mũndũ o wothe angĩĩciria atĩ nĩ mũthathaiya wa Ngai no ndagiragĩrĩria rũrĩmĩ rwake, nĩ ngoro yake mwene araheenia, na ũthathaiya wake nĩ wa tũhũ. Ũthathaiya ũrĩa mũtheru na ũtarĩ thahu kũringana na mawoni ma Ngai o we Ithe witũ nĩ ũyũ: kũrũmbũyagia ciana cia ndigwa na atumia a ndigwa mathĩna-inĩ mao, na mũndũ gũikaraga atarĩ na kameni kuumana na thĩ ĩno.”—Jakubu 1:26, 27