Andũ aingĩ ũmũthĩ metĩkĩtie atĩ ngũĩ no irehe kĩhonia rĩrĩa kwaumĩra mathĩna kana rĩrĩa andũ maga kũiguithania. No ũndũ ũcio nĩ mũgarũ na ũrĩa Jesu Kristo aarutanire. Ningĩ ndũringaine na kĩonereria kĩrĩa aatũigĩire. Reke tuone maũndũ mamwe marĩa Jesu aaugire na agĩka.

Ũrĩa Jesu aaugire

 Thĩinĩ wa mahunjio make marĩa moĩkaine mũno ma Kĩrĩma-inĩ, Jesu aarutanire atĩ marakara, marũrũ, na ngũĩ itingĩteithia rĩrĩa andũ maga kũiguithania. Reke tuone maandĩko maigana ũna.

•   “Maũndũ mothe marĩa mũngĩenda andũ arĩa angĩ mamwĩkage, no mũhaka o na inyuĩ mũmekage o tamo.” (Mathayo 7:12; Luka 6:31) Ũtaaro ũcio ũtwĩkĩraga ngoro ithuothe twĩkagĩre andũ arĩa angĩ maũndũ o ta marĩa tũngĩenda matwĩkĩre a. Na tondũ gũtirĩ mũndũ ũngĩenda gwĩkwo maũndũ moru, nĩ twagĩrĩirũo kwĩrutanĩria gwĩkĩra andũ arĩa angĩ maũndũ na njĩra ya gĩtĩo na ũtugi, o na rĩrĩa tũtaraiguithania nao.

•   “Mũndũ o wothe angĩkũgũtha rũhĩ ikai rĩa ũrĩo, mũhũgũrĩre rĩu rĩngĩ o narĩo.” (Mathayo 5:38, 39; Luka 6:29) Jesu ndeendaga kuuga atĩ twagĩrĩirũo kũrekereria andũ arĩa angĩ matwĩke maũndũ moru. Handũ ha ũguo, aarũngaga mawoni mahĩtanu marĩa kwahoteka maarutanagwo nĩ atongoria amwe a ndini, atĩ kwĩrĩhĩria ti kũũru. Eeraga arũmĩrĩri ake atĩ matiagĩrĩirũo kwĩrĩhĩria, no magĩrĩirũo gũikara mahooreire rĩrĩa marakario. b

•   “Endagai thũ cianyu.” (Mathayo 5:43, 44; Luka 6:27) Jesu aarutanire atĩ twagĩrĩirũo gwĩkĩra andũ arĩa matũthũire maũndũ mega kana arĩa matwĩkaga maũndũ moru. Ndeendaga kuuga twĩtĩkanĩrie na maũndũ moru marĩa mareka. c O na kũrĩ ũguo, gwĩkĩra andũ arĩa matũthũire maũndũ mega no gũtũme mororoe ngoro, na o nao matwĩke maũndũ mega.

Ũrĩa Jesu eekire na ũrĩa ageeka

 Jesu aarutanire atĩ ngũĩ itingĩniina mathĩna, na nĩ oonanirie ũguo kũgerera kĩonereria gĩake. Ũtukũ ũrĩa Jesu aanyitirũo, mũrũmĩrĩri ũmwe wake nĩ aambĩrĩirie kũrũa nĩguo amũgitĩre no Jesu akĩmwĩra ũũ: “Cokia rũhiũ rwaku rwa njora handũ haruo, nĩ gũkorũo arĩa othe moyaga rũhiũ rwa njora makaaniinwo o na rũhiũ rwa njora.” (Mathayo 26:52) Jesu nĩ oonagia andũ arĩa maamũthũire wendo na njĩra ya kũmohera, na o na nĩ aamahoyagĩra.—Luka 23:33, 34; 1 Petero 2:23.

 Bibilia ĩranĩire atĩ ica ikuhĩ Jesu, arĩ we Mũnene wa Thayũ, nĩ ekũniina ngũĩ ciothe. (Isaia 9:6, 7) Nĩguo wĩrute makĩria ũhoro wĩgiĩ ihinda rĩu rĩega rĩũkĩte, thoma gĩcunjĩ kĩrĩ na kĩongo “Ũrĩa Mbaara na Ngũĩ Igaathira.”