HIHI no ũkene ũngĩgĩa na wĩyathi wa gwĩkaga ũrĩa wothe ũkwenda? Hihi rĩmwe nĩ ũiguaga kaba gũtangĩrĩ mũndũ wa gũkwĩra ũrĩa ũgwĩka? Njĩĩra ma, na ndũkahithe.—

Nĩ atĩa ũkuona arĩ wega? Nĩ gwĩka ũrĩa wothe ũngĩenda-ĩ, kana nĩ gwathĩkĩra mami na baba wanyu nĩguo maũndũ mathiĩ wega?— Ngai oigaga atĩ nĩ wagĩrĩirũo gwathĩkĩra aciari aku, kwoguo nĩ harĩ gĩtũmi kĩega gĩa gwĩka ũguo. Reke tuone kana no tũmenye gĩtũmi kĩu.

Wee ũrĩ na mĩaka ĩigana?— Nĩ ũĩ baba wanyu arĩ na mĩaka ĩigana?— Ĩ nake mami wanyu, kana cũcũ wanyu kana guka wanyu-rĩ, marĩ na mĩaka ĩigana?— Othe nĩ matũũrĩte mĩaka mĩingĩ gũgũkĩra. O ũrĩa mũndũ atũũrĩte mĩaka mĩingĩ noguo akoretwo na mahinda maingĩ ma kwĩruta maũndũ. Akoragwo aiguĩte maũndũ maingĩ, akeyonera na ageka maũndũ maingĩ o mwaka. Kwoguo andũ arĩa anini no merute kuuma kũrĩ andũ arĩa akũrũ kũmakĩra.

Nĩ harĩ kaana ũĩ kanini gũgũkĩra?— Hihi nĩ ũĩ maũndũ maingĩ gũgakĩra?— Nĩkĩ gĩtũmĩte ũmenye maũndũ maingĩ gũgakĩra?— Nĩ tondũ nĩ ũtũũrĩte ihinda inene gũgakĩra. Nĩ ũkoretwo na ihinda inene rĩa kwĩruta maũndũ gũkĩra mũndũ ũrĩa ũrĩ na mĩaka mĩnini gũgũkĩra.

 Nũũ ũtũũrĩte mĩaka mĩingĩ gũgũkĩra, na kũngĩra, kana gũkĩra mũndũ ũngĩ o wothe?— Nĩ Jehova Ngai. Oĩ maũndũ maingĩ gũgũkĩra, o na kũngĩra. Rĩrĩa atwĩra twĩke ũndũ o wothe, no tũkorũo na ma atĩ nĩguo ũndũ ũrĩa twagĩrĩirũo nĩ gwĩka o na angĩkorũo ti ũndũ mũhũthũ. Hihi nĩ ũĩ atĩ o na Mũrutani Ũrĩa Mũnene harĩ hĩndĩ onire ũrĩ ũndũ mũritũ gwathĩka?—

Kũrĩ hĩndĩ Ngai eerire Jesu eke ũndũ warĩ mũritũ mũno. Jesu nĩ aahoire nĩ ũndũ wa ũndũ ũcio, o ta ũrĩa tũrona mbica-inĩ. Aahoire ũũ: ‘Angĩkorũo nĩ ũkwenda, njehereria ũndũ ũyũ mũritũ.’ Kũgerera ihoya rĩu, Jesu onanirie atĩ ndũkoragwo ũrĩ ũndũ mũhũthũ hingo ciothe gwĩka wendi wa Ngai. No Jesu aarĩkĩrĩirie ihoya rĩake atĩa? Wee nĩ ũĩ?—

Jesu aarĩkirie ihoya rĩake ũũ: “Reke wendi waku wĩkĩke, no ti wakwa.” (Luka 22:41, 42) Jesu eendaga wendi wa Ngai wĩkĩke, no ti wake. Nĩkĩo eekire ũrĩa Ngai eendaga eke handũ ha gwĩka ũrĩa angĩeciririe nĩguo kwagĩrĩire.

Ũndũ ũcio ũratũruta atĩa?— Tũreruta atĩ hingo ciothe nĩ twagĩrĩirũo gwĩka ũrĩa Ngai aroiga, o na rĩrĩa ũtarĩ ũndũ mũhũthũ gwĩka ũguo. No nĩ harĩ ũndũ ũngĩ tũreruta. Nĩ ũĩ nĩ ũndũ ũrĩkũ ũcio?— Tũreruta atĩ Ngai na Jesu ti mũndũ ũmwe ta ũrĩa andũ amwe moigaga. Jehova Ngai nĩ atũũrĩte mĩaka mĩingĩ kũrĩ Mũrũ wake Jesu, na nĩ oĩ maũndũ maingĩ kũmũkĩra.

Rĩrĩa twathĩkĩra Ngai tuonanagia atĩ nĩ tũmwendete. Bibilia ĩtwĩraga ũũ: “Kwenda Ngai nĩ atĩrĩ, tũrũmagĩrĩre maathani make.” (1 Johana 5:3) Nĩ wona, ithuothe nĩ tũrabatara gwathĩkĩra Ngai. Hihi wee nĩ wendete kũmwathĩkĩra?—

 Reke tũhumbũrie Bibilia citũ tũrore ũrĩa Ngai eraga ciana ciĩke. Tũgũthoma ũrĩa Bibilia yugaga thĩinĩ wa Aefeso 6 mũhari wa 1, 2 na  3. Yugaga ũũ: “Inyuĩ ciana, athĩkagĩrai aciari anyu mũrĩ na ũiguano na Mwathani, nĩ gũkorũo ũguo nĩguo kwagĩrĩire. ‘Tĩaga thoguo na nyũkwa,’ nĩ gũkorũo rĩu nĩrĩo rĩathani rĩa mbere rĩrĩ na kĩĩranĩro: ‘Nĩguo maũndũ maku magaacĩre na ũtũũre ihinda iraya thĩinĩ wa thĩ.’”

Kwoguo nĩ Jehova Ngai we mwene ũrakwĩra wathĩkagĩre mami wanyu na baba wanyu na ũmatĩage. Na Ngai oigĩte atĩ ũngĩathĩkĩra aciari aku, maũndũ maku ‘nĩ marĩthiaga wega.’

Reke ngũhe karũgano ka andũ amwe maahonokirio nĩ ũndũ wa gwathĩka. Andũ acio maatũũraga tene mũno itũũra-inĩ inene rĩa Jerusalemu. Andũ aingĩ thĩinĩ wa itũũra rĩu matiathĩkagĩra Ngai, kwoguo Jesu akĩmahe mũkaana atĩ Ngai nĩ ekũniina itũũra rĩao. No Jesu nĩ aameerire ũrĩa mangĩka nĩguo mahonoke angĩkorũo nĩ mendete maũndũ marĩa magĩrĩire. Aamerire ũũ: ‘Rĩrĩa mũkoona Jerusalemu ĩthiũrũrũkĩirio nĩ njeshi, hĩndĩ ĩyo mũkaamenya atĩ kwanangwo kwayo nĩ gũkuhĩrĩirie. Hĩndĩ ĩyo mũkoima mwambĩrĩrie kũũrĩra irĩma-inĩ.’—Luka 21:20-22.

O ta ũrĩa Jesu oigĩte-rĩ, njeshi nĩ yokire gũtharĩkĩra itũũra rĩa Jerusalemu. Njeshi ya Roma yokire ĩgĩthiũrũrũkĩria itũũra rĩu rĩothe. Thigari icio igĩcoka ikĩehera gũtekũmenyeka gĩtũmi. Andũ aingĩ meeciririe atĩ ũgwati nĩ wathira. Kwoguo magĩthiĩ o na mbere gũikara itũũra-inĩ rĩu. No Jesu aamerĩte maagĩrĩirũo nĩ gwĩka atĩa?— Korũo nĩ waikaraga Jerusalemu-rĩ, ũngĩekire atĩa?— Andũ arĩa meetĩkĩtie Jesu biũ nĩ moimire mĩciĩ yao makĩũrĩra irĩma-inĩ kũndũ kũraihu na Jerusalemu.

 Mwaka ũmwe ũgĩthira, na gũtirĩ ũndũ wekĩkĩte harĩ Jerusalemu. Mwaka wa kerĩ o naguo gũtirĩ ũndũ wekĩkire. O na mwaka wa gatatũ gũtirĩ ũndũ wekĩkire. No kũhoteke andũ amwe meeciragia atĩ arĩa moorire maarĩ akĩgu. No mwaka-inĩ wa kana, njeshi ya Roma ĩgĩcoka. O rĩngĩ, njeshi ĩyo ĩgĩthiũrũrũkĩria Jerusalemu. Andũ arĩa matoorĩte makĩremwo nĩ kũũra. Riita rĩrĩ njeshi ĩyo ĩkĩniina itũũra rĩu. Andũ aingĩ arĩa maarĩ itũũra-inĩ rĩu magĩkua, nao arĩa angĩ makĩnyitwo na magĩthamio kuuma kũu.

Hihi gwathiire atĩa harĩ arĩa maathĩkĩire Jesu?— Maarĩ na ũgitĩri. Maarĩ kũraihu mũno na Jerusalemu. Kwoguo maũndũ moru matiamakorire. Wathĩki ũkĩmagitĩra.

Ĩ wee ũngĩathĩka-rĩ, wathĩki no ũkũgitĩre?— Aciari aku no makwĩre ndũkanathakĩre barabara-inĩ kana rũũĩ-inĩ. Hihi mangĩkwĩra ũguo nĩkĩ?—  Nĩ tondũ no ũringwo nĩ ngaari kana ũgwe rũũĩ. No hĩndĩ ĩmwe no wĩcirie atĩrĩ: ‘Rĩu gũtirĩ na ngaari barabara-inĩ. Kwoguo hatirĩ thĩna. O na ciana iria ingĩ igĩthakaga barabara-inĩ na itiringagwo nĩ ngaari.’

Ũguo nĩguo andũ aingĩ Jerusalemu meeciragia. Hĩndĩ ĩrĩa njeshi ya Roma yeherire, kuonekire kũrĩ na ũgitĩri. Kwarĩ na andũ angĩ maaikaraga itũũra-inĩ rĩu. O nao magĩthiĩ na mbere gũikara kuo. Nĩ maahetwo mũkaana, no matiawathĩkĩire. Nĩ ũndũ ũcio, magĩkua.

Reke twĩcirie ũhoro wa ngerekano ĩngĩ. Hihi wee nĩ ũrĩ wathaka na kĩbiriti?— No wone ta arĩ ithako rĩega gwakia mũguĩ ũgacoka ũkawĩrorera ũgĩakana. No gũthaka na kĩbiriti nĩ ũgwati. No gũtũme nyũmba yothe ĩhĩe, na no ũkue!

Ririkana atĩ, gwathĩkaga o mahinda mamwe ti kũiganu. Ũngĩathĩka hĩndĩ ciothe, ũndũ ũcio no ũkũgitĩre. Ningĩ nũũ ugĩte ũũ, “Ciana, athĩkagĩrai aciari anyu”?— Nĩ Ngai. Ningĩ ũririkane atĩ oigĩte ũguo tondũ nĩ akwendete.