NĨ ŨRARIRIKANA kĩrĩa gĩatũmire mũraika ũmwe wa Ngai atuĩke Shaitani Ũrĩa Mũcukani?— Merirĩria make moru ma kwenda gũthathaiyo nĩ andũ, nĩmo maatũmire akararie Ngai. Hihi nĩ kũrĩ araika angĩ maarũmĩrĩire Shaitani?— Ĩĩ nĩ kũrĩ. Bibilia ĩmetaga ‘araika a Shaitani,’ kana ndaimono.—Kũguũrĩrio 12:9.

Hihi araika acio oru, kana ndaimono, nĩ metĩkĩtie Ngai?— Bibilia yugaga atĩ, ‘ndaimono nĩ ciĩtĩkĩtie Ngai arĩ kuo.’ (Jakubu 2:19) No rĩu nĩ ciĩtigagĩra. Ciĩtigagĩra tondũ nĩ ciũĩ atĩ Ngai nĩ agaaciherithia nĩ ũndũ wa maũndũ moru marĩa ciĩkĩte. Nĩ maũndũ marĩkũ moru ciĩkĩte?—

Bibilia yugaga atĩ araika acio moimire igũrũ kũrĩa magĩrĩirũo nĩ gũtũũra, magĩũka gũikara gũkũ thĩ marĩ ta andũ. Meekire ũguo tondũ nĩ meendaga gũkomania na airĩtu athaka arĩa maarĩ gũkũ thĩ. (Kĩambĩrĩria 6:1, 2; Judasi 6) Wee nĩ ũĩ gũkomania nĩ gwĩka atĩa?—

 Gũkomania nĩ rĩrĩa mũthuri na mũtumia makoma hamwe makuhanĩrĩirie na njĩra ya mwanya. Thutha ũcio, kaana no kambĩrĩrie gũkũra thĩinĩ wa nda ya mami wao. No gũkomania gũtiagĩrĩire harĩ araika. Mũthuri na mũtumia arĩa mahikanĩtie no o tu Ngai etĩkĩrĩtie makomanie. Nĩguo mwana angĩciarũo, arerũo nĩ mũthuri na mũtumia wake marĩ hamwe.

Rĩrĩa araika meetuire andũ na magĩkomania na airĩtu a gũkũ thĩ, ciana ciao cianenehire igĩtuĩka marimũ. Marimũ macio maarĩ moru mũno, na meekaga andũ maũndũ moru. Nĩ ũndũ ũcio Ngai akĩrehe mbura nene, kana Mũiyũro, akĩniina marimũ macio na andũ arĩa othe maarĩ oru. No mbere ya gwĩka ũguo, nĩ eerire Nuhu ake thabina yahaanaga meri nene, nĩguo ahonokie andũ arĩa meekaga maũndũ mega. Mũrutani Ũrĩa Mũnene oigire atĩ nĩ twagĩrĩirũo kũririkana ũndũ ũrĩa wekĩkire hĩndĩ ya Mũiyũro ũcio.—Kĩambĩrĩria 6:3, 4, 13, 14; Luka 17:26, 27.

Hihi nĩ ũĩ ũrĩa araika acio oru meekire rĩrĩa Mũiyũro wokire?— Maatiganire na mĩĩrĩ ya andũ ĩrĩa maarĩ nayo, na magĩcoka igũrũ. No matingĩatuĩkire  araika a Ngai rĩngĩ, kwoguo magĩtuĩka araika a Shaitani, kana ndaimono. Ĩ nacio ciana icio ciao ciarĩ marimũ ciathiire kũ?— Nĩ ciakuire hĩndĩ ya Mũiyũro ũcio. Na andũ arĩa othe mataathĩkĩire Ngai o nao magĩkua.

Kuuma hĩndĩ ya Mũiyũro ũcio, Ngai ndarĩ eetĩkĩria ndaimono ciĩtue andũ rĩngĩ. O na gũtuĩka tũtingĩhota kuona ndaimono-rĩ, no igeragia kũhĩtithia andũ. Ndaimono icio nĩ itũmĩte maũndũ mathũke gũkĩra hĩndĩ ĩngĩ o yothe. Ciĩkĩte ũguo tondũ nĩ ciaingatirũo igũrũ ikĩharũrũkio gũkũ thĩ.

Hihi nĩ ũĩ kĩrĩa kĩgiragia tuone ndaimono?— Nĩ tondũ ikoragwo na mĩĩrĩ ya roho. O na kũrĩ ũguo, no tũkorũo na ma atĩ irĩ kuo. Bibilia yugaga atĩ Shaitani nĩ ‘arahĩtithia andũ thĩinĩ wa thĩ yothe,’ na ndaimono nĩ imũteithagia gwĩka ũguo.—Kũguũrĩrio 12:9, 12.

Hihi o na ithuĩ no tũhĩtithio nĩ Mũcukani na ndaimono ciake?— Ĩĩ no tũhĩtithio tũngĩaga kwĩmenyerera. No tũtiagĩrĩirũo gwĩtigĩra. Mũrutani Ũrĩa Mũnene oigire ũũ: ‘Mũcukani ndarĩ na hinya igũrũ rĩakwa.’ Tũngĩtũũra hakuhĩ na Ngai, nĩ egũtũgitĩra kuuma harĩ Mũcukani na ndaimono ciake.—Johana 14:30.

Nĩ twagĩrĩirũo kũmenya maũndũ moru marĩa ndaimono ingĩenda twĩke. Ta wĩcirie ũndũ ũyũ. Nĩ maũndũ marĩkũ moru ndaimono ciekire rĩrĩa ciokire gũkũ thĩ?— Mbere ya Mũiyũro, ndaimono nĩ ciakomanagia na airĩtu, ũndũ ũrĩa araika mataagĩrĩirũo nĩ gwĩka. Ũmũthĩ ndaimono nĩ ikenaga rĩrĩa andũ marega gwathĩkĩra watho wa Ngai wĩgiĩ ngomanio. Ta reke ngũũrie, nĩa magĩrĩirũo nĩ gũkomania?— Nĩ wamenya, nĩ andũ arĩa mahikanĩtie.

Ũmũthĩ nĩ kũrĩ tũhĩĩ na tũirĩtu tũkomanagia, no ũcio nĩ ũndũ mũru mũno. Bibilia yonanagia atĩ Ngai nĩwe woombire ciĩga cia ũciari cia mũthuri na cia mũtumia. Jehova ombire ciĩga icio nĩ ũndũ wa gĩtũmi kĩa mwanya kĩrĩa kĩagĩrĩirũo gũkenerũo nĩ andũ arĩa tu  mahikanĩtie. Ndaimono nĩ ikenaga mũno rĩrĩa andũ meka maũndũ marĩa Jehova akananĩtie. Kwa ngerekano, ndaimono nĩ ikenaga mũno rĩrĩa kahĩĩ na kairĩtu mahutahutania ciĩga ciao cia ũciari. Tũtingĩenda gũkenia ndaimono, kana tiguo?—

Nĩ harĩ ũndũ ũngĩ ndaimono ciendete no Jehova nĩ athũire ũndũ ũcio. Hihi nĩ ũĩ ũndũ ũcio nĩ ũrĩkũ?— Nĩ haaro. (Thaburi 11:5) Haaro nĩ rĩrĩa andũ marahũũra andũ arĩa angĩ na makameka maũndũ moru. Ririkana atĩ, ũguo nĩguo marimũ marĩa maarĩ ciana cia ndaimono meekaga.

Ningĩ ndaimono nĩ ciendete gũtũma andũ metigĩre. Rĩmwe nĩ ciĩtuaga andũ arĩa makuĩte. O na nĩ ihotaga kwaria ta ũrĩa andũ arĩa maakuire maaragia rĩrĩa maarĩ muoyo. Rĩrĩa ndaimono cieka ũguo, itũmaga andũ aingĩ metĩkie atĩ andũ arĩa akuũ no mahote kwaranĩria na arĩa marĩ muoyo. Ndaimono itũmaga andũ aingĩ metĩkie atĩ maroho ma andũ arĩa makuĩte marĩ muoyo.

 Nĩ ũndũ ũcio, nĩ twagĩrĩirũo kwĩmenyerera nĩguo tũtikaheenio nĩ Shaitani na ndaimono ciake. Bibilia ĩheanaga mũkaana ũyũ: ‘Shaitani ageragia gwĩtua mũraika mwega, na ndungata ciake o nacio noguo ciĩtuaga.’ (2 Akorintho 11:14, 15) No ma nĩ atĩ, ndaimono ti njega. Reke tuone ũrĩa ingĩgeria gũtũma tũhaane tacio.

Andũ marutaga kũ ũhoro wa haaro, ngomanio, ciũmbe cia roho, na wa maroho ma arĩa makuĩte?— Merutaga maũndũ macio kũgerera indo ta TV, thenema, mĩthako ya kompiuta, kana arata oru. Hihi gwĩka maũndũ macio kũngĩtũma tũkuhĩrĩrie Ngai kana kũngĩtũma tũkuhĩrĩrie Mũcukani na ndaimono ciake? Wee ũgwĩciria atĩa?—

Hihi ũgwĩciria nũũ wendaga tũthikĩrĩrie na twĩrorere maũndũ moru?— Nĩ Shaitani na ndaimono ciake. Kwoguo twagĩrĩirũo nĩ gwĩka atĩa?— Twagĩrĩirũo gũthoma, gũthikĩrĩria, na kwĩrorera maũndũ mega marĩa mangĩtũteithia gũtungatĩra Jehova. Ũgwĩciria nĩ maũndũ ta marĩkũ mega tũngĩka?—

Tũngĩka maũndũ mega, tũtingĩkorũo na gĩtũmi gĩa gwĩtigĩra ndaimono. Jesu nĩ arĩ hinya gũkĩra ndaimono na nĩ imwĩtigĩrĩte. Mũthenya ũmwe ndaimono cioririe Jesu ũũ: “Hihi woka gũtũniina?” (Mariko 1:24) Githĩ tũtigaakena rĩrĩa Jesu akaniina Shaitani na ndaimono ciake?— Ihinda-inĩ rĩrĩ no tũkorũo na ma atĩ Jesu nĩ arĩtũgitagĩra kuuma kũrĩ ndaimono, tũngĩthiĩ na mbere gũikara hakuhĩ nake na hakuhĩ na Ithe ũrĩa ũrĩ igũrũ.