Kũguũrĩrio kwa Johana 6:1-17
-
Gatũrũme kũhingũra mĩhũũri ya mbere ĩtandatũ (1-17)
-
Mũhootani arĩ igũrũ rĩa mbarathi ya rangi mwerũ (1, 2)
-
Ũrĩa ũikarĩire mbarathi ya rangi ta wa mwaki kweheria thayũ (3, 4)
-
Ũrĩa ũikarĩire mbarathi njirũ kũrehe ngʼaragu (5, 6)
-
Ũrĩa ũikarĩire mbarathi theũku etĩtwo Gĩkuũ (7, 8)
-
Arĩa maathĩnjĩtwo kuoneka rungu rwa kĩgongona (9-11)
-
Gĩthingithia kĩnene (12-17)
-
6 Na rĩrĩa Gatũrũme+ aahingũrire mũhũũri ũmwe wa ĩyo mũgwanja,+ ngĩona na ngĩigua kĩũmbe kĩmwe harĩ icio inya irĩ muoyo+ kĩoiga ũũ na mũgambo ũhaana marurumĩ: “Ũka!”
2 Na rĩrĩ, ngĩona mbarathi ya rangi mwerũ,+ na ũrĩa wamĩikarĩire aarĩ na ũta; na akĩheo thũmbĩ,+ agĩthiĩ akĩhootanaga nĩguo arĩkie ũhootani wake.+
3 Rĩrĩa aahingũrire mũhũũri wa kerĩ, ngĩigua kĩũmbe gĩa kerĩ kĩrĩ muoyo+ kĩoiga: “Ũka!”
4 Mbarathi ĩngĩ ĩkiumĩra, nayo yarĩ ya rangi ta wa mwaki, nake ũrĩa wamĩikarĩire agĩtĩkĩrio kweheria thayũ thĩinĩ wa thĩ nĩguo andũ mathĩnjane, na akĩheo rũhiũ rũnene rwa njora.+
5 Rĩrĩa aahingũrire mũhũũri wa gatatũ,+ ngĩigua kĩũmbe gĩa gatatũ kĩrĩ muoyo+ kĩoiga: “Ũka!” Na rĩrĩ, ngĩona mbarathi njirũ, na ũrĩa wamĩikarĩire aarĩ na ratiri ya gũthima guoko-inĩ gwake.
6 Ngĩigua kĩndũ ta mũgambo gatagatĩ-inĩ ga ciũmbe iria inya irĩ muoyo woiga ũũ: “Kĩbaba* kĩa ngano kiumage dinari*+ ĩmwe na ibaba ithatũ cia cairi ciumage dinari ĩmwe; na ndũgathũkie maguta ma ndamaiyũ na ndibei.”+
7 Rĩrĩa aahingũrire mũhũũri wa kana, ngĩigua mũgambo wa kĩũmbe gĩa kana kĩrĩ muoyo+ woiga: “Ũka!”
8 Na rĩrĩ, ngĩona mbarathi ya rangi mũtheũku, na ũrĩa wamĩikarĩire aarĩ na rĩĩtwa Gĩkuũ. Na ooimĩtwo thutha nĩ Mbĩrĩra.* Na makĩheo wathani igũrũ rĩa gĩcunjĩ kĩa inya gĩa thĩ, morage na rũhiũ rũraihu rwa njora, na ngʼaragu,+ na mũrimũ wa kũrehe gĩkuũ, na nyamũ cia gĩthaka cia gũkũ thĩ.+
9 Rĩrĩa aahingũrire mũhũũri wa gatano, ngĩona rungu rwa kĩgongona+ mĩoyo*+ ya arĩa maathĩnjĩtwo nĩ ũndũ wa kiugo kĩa Ngai na nĩ ũndũ wa ũira ũrĩa maarutĩte.+
10 Makĩanĩrĩra na mũgambo mũnene makiuga: “Wee Mwathani Ũrĩa Mũnene, o wee mũtheru na wa ma,+ nĩ nginya rĩ ũkwĩgirĩrĩria gũtuanĩra na kũrĩhĩria thakame itũ harĩ arĩa matũũraga thĩinĩ wa thĩ?”+
11 Na makĩheo o mũndũ kanjũ ya rangi mwerũ,+ makĩrũo mahurũke ihinda rĩngĩ inyinyi, nginya rĩrĩa mũigana ũkaahinga wa ngombo iria ingĩ na ariũ a Ithe wao arĩa maarĩ hakuhĩ kũũragwo o tao.+
12 Ngĩcoka ngĩona rĩrĩa aahingũrire mũhũũri wa gatandatũ, na gũkĩgĩa gĩthingithia kĩnene; narĩo riũa rĩkĩira o ta nguo ya ikũnia ĩthondeketwo na njuĩrĩ;* naguo mweri wothe ũkĩhaana thakame,+
13 na njata cia igũrũ ikĩgwa thĩ o ta ũrĩa mũkũyũ ũitaga ngũyũ itarĩ njĩru rĩrĩa wahurutwo nĩ rũhuho rũnene.
14 Narĩo igũrũ rĩkĩehera o ta gĩkũnjo kĩrakũnjwo,+ na irĩma ciothe na icigĩrĩra ciothe ikĩeherio handũ hacio.+
15 Nao athamaki a thĩ, anene, atongoria a mbũtũ, itonga, arĩa marĩ hinya, ngombo ciothe, na andũ othe arĩa maarĩ na wĩyathi makĩĩhitha ngurunga-inĩ na ndwaro-inĩ cia mahiga irĩma-inĩ.+
16 Nao meeraga irĩma na ndwaro icio ũũ: “Tũgwĩrei+ mũtũhithe kuuma harĩ ũthiũ wa Ũrĩa ũikarĩire gĩtĩ kĩa ũnene+ na kuuma harĩ mangʼũrĩ ma Gatũrũme,+
17 nĩ gũkorũo mũthenya ũrĩa mũnene wa mangʼũrĩ mao nĩ mũkinyu,+ na nũũ ũngĩhota kũrũgama?”+
Tũũhoro twa magũrũ-inĩ
^ Rora Ũhoro Muongerere B14.
^ Nĩ mbeca ya betha yahũthagĩrũo thĩinĩ wa Roma yaiganaine na mũcara wa mũthenya ũmwe. Rora Ũhoro Muongerere B14.
^ Kana “Hadesi,” ũguo nĩ kuuga, mbĩrĩra ya mũhaano kũrĩa akuũ makomete. Rora Ũthathaũri wa Ciugo.
^ No kũhoteke nĩ thakame ya mĩoyo yao ĩrĩa yaitirũo igũrũ rĩa kĩgongona. Rora Ũthathaũri wa Ciugo.
^ No kũhoteke nĩ guoya wa mbũri.
