Kwenda na mambu ke na kati

NTENDULA YA BAVERSE YA BIBLIA

Yozue 1:9—“Vanda Kikesa mpi Ngolo”

Yozue 1:9—“Vanda Kikesa mpi Ngolo”

“Keti mono me pesa nge ve nsiku? Vanda kikesa mpi ngolo. Kutekita ve mpi kuwa boma ve, sambu Yehowa Nzambi na nge kele ti nge konso kisika yina nge ke kwenda.”—Yozue 1:9, Mbalula ya Nsi-Ntoto ya Mpa.

“Kuvila ve mambu ya mono me songa nge, nde nge fweti vanda ngolo ti kikesa. Kuwa boma ve, kutekita mpi ve na ntwala ya bambeni, sambu mono Mfumu Nzambi, Nzambi na nge, ta vandaka ti nge bisika yonso ya nge ta kwenda.”—Yozue 1:9, Bible en Kituba.

Ntendula ya Yozue 1:9

Na nsadisa ya mambu yai, Yehowa * Nzambi ndimisaka nsadi na yandi ya kwikama Yozue nde yandi ta vanda “kikesa mpi ngolo” ata yandi ta kutana ti mambu ya mpasi mpi yina lenda monana bonso nde yandi ta nunga yo ve. Yozue vandaka ve ti kikuma ya kuwa boma ya mambu yina ta salama na bilumbu ke kwisa kana yandi ke lemfuka na bansiku ya Nzambi, sambu yo zolaka kuvanda bonso nde Yehowa kele pene-pene na yandi mpi ke sadisa yandi na kununga. Nzambi vandaka ti Yozue na mutindu yandi vandaka kupesa Yozue bantuma mpi kusadisa yandi na kununga bambeni na yandi.

Inki mutindu Yozue zolaka kuvanda “kikesa mpi ngolo”? Yandi zolaka kubaka kikesa mpi ngolo na mikanda ya bo sonikaka na nsadisa ya mpeve ya Yehowa yina bo vandaka ti yo na ntangu yina. ‘Nsiku yonso yina Moize nsadi ya [Yehowa] pesaka [Yozue]” * vandaka na kati na yo. (Yozue 1:7) Yehowa songaka Yozue na kutanga “yo na ndinga ya nsi [“kuyindulula yo,” New International Version] mpimpa ti mwini.” (Yozue 1:8) Kutanga mpi kuyindulula yo sadisaka Yozue na kuvanda ti lukanu ya kusala luzolo ya Nzambi. Na nima, yo lombaka nde Yozue kusadila mambu yina yandi longukaka na Ndinga ya Nzambi, disongidila “kuzitisa mbote-mbote mambu yonso ya bo me sonika” na kati na yo. Kana yandi sala yo, yandi zolaka kusala mambu ti mayele mpi kununga. Yo yina kibeni mambu ya salamaka. Ata yandi kutanaka ti bampasi mingi, Yozue vandaka ti luzingu ya mbote mpi ya kitoko mpi yandi sadilaka Yehowa na kwikama yonso.—Yozue 23:14; 24:15.

Mambu yina Yehowa songaka Yozue ke landa kupesa beto kikesa bubu yai. Yo ke monisa mutindu Yehowa ke kudiyangisaka sambu na bansadi na yandi yonso, mingi-mingi kana bo ke kutana ti bampasi. Yandi ke zolaka nde bo nunga mutindu Yozue nungaka! Mpi bonso Yozue, bo lenda “vanda kikesa mpi ngolo” kana bo ke tanga mpi ke yindulula Ndinga ya Nzambi, Biblia, mbala na mbala, mpi kana bo ke sala mambu na kuwakana ti lutwadisu yina yo ke pesa.

Mambu Yina Bo Ke tubila na Baverse ya Kele na Ntwala mpi na Nima ya Yozue 1:9

Na nima ya lufwa ya Moize, Yehowa tubaka nde Yozue muntu ta twadisa dikanda ya Izraele. (Yozue 1:1, 2) Na ntangu yina, bantu ya Izraele vandaka kudibongisa sambu na kukota na Ntoto ya Lusilu, disongidila insi ya Kanana. Kansi yo vandaka kulomba nde bo nwana ti bambeni ya ngolo. Mu mbandu, yo lombaka nde Yozue kunwana ti bantu ya Kanana, yina vandaka bantu ya mbi kibeni. * (Kulonga 9:5; 20:17, 18) Diaka, bantu ya Kanana vandaka mingi mpi bo vandaka ti binwaninu ya ngolo kuluta bantu ya Izraele. (Yozue 9:1, 2; 17:18) Ata mpidina, Yozue landaka na kikesa yonso bantuma ya Yehowa. Ebuna Nzambi vandaka ti yandi, yo yina bantu ya Izraele nungaka bambeni na bo mingi na nsungi ya bamvula sambanu mpamba.—Yozue 21:43, 44.

^ par. 3 Zina Yehowa kele mutindu bo ke balulaka na Kikongo zina ya Nzambi na Kiebreo—bisono iya יהוה (YHWH), ya bo ke bingaka Tétragramme. Bo me balula zina yai nde “MFUMU NZAMBI” na verse yai na Bible en Kituba. Sambu na kuzaba mambu mingi ya me tala Yehowa mpi ya ke monisa sambu na nki bambalula ya nkaka ya Biblia ke sadilaka ve zina yina, tala disolo “Yehowa kele nani?”

^ par. 4 Ziku mikanda ya bo sonikaka na nsadisa ya mpeve ya Nzambi yina Yozue vandaka ti yo, mpi yina kele sesepi yai na kati ya Biblia, vandaka mikanda tanu yina Moize sonikaka (Kuyantika, Kubasika, Levi, Kutanga, mpi Kulonga), mukanda ya Yobi, mpi nkunga mosi to bankunga zole.

^ par. 6 Sambu na disolo ya ke tubila sambu na nki yo lombaka nde bo nwana bitumba, tala disolo “Sambu na Nki Nzambi Nwanaka Bitumba ti Bantu ya Kanana?” na Nzozulu ya Nkengi ya Kifalansa ya le 1er janvier 2010.