Kwenda na mambu ke na kati

NTENDULA YA BAVERSE YA BIBLIA

Baroma 12:2—“Beno Soba Kimuntu na Beno mpi Beno Kumisa Bangindu na Beno ya Mpa”

Baroma 12:2—“Beno Soba Kimuntu na Beno mpi Beno Kumisa Bangindu na Beno ya Mpa”

“Beno yambula kulanda ngidika yai ya bima, kansi beno soba kimuntu na beno mpi beno kumisa mabanza na beno ya mpa, sambu beno kudindimisa luzolo ya Nzambi yina kele ya mbote, yina yandi lenda ndima, mpi yina kele ya kukuka.”—Baroma 12:2, Mbalula ya Nsi-Ntoto ya Mpa.

“Beno landa ve bikalulu ya nsi-ntoto yai, kansi beno soba kimuntu na beno mpi beno kumisa bangindu na beno ya mpa. Ebuna beno ta meka mpi ta zaba luzolo ya Nzambi—luzolo na yandi ya mbote, ya kitoko, mpi ya kukuka.”—Baroma 12:2, New International Version.

Ntendula ya Baroma 12:2

Bantu yina ke zola kupesa Nzambi kiese fwete buya bangindu ya mbi mpi bo fwete soba kimuntu na bo. Nzambi ke pusaka bo ve na kingolo-ngolo na kusoba; bo ke salaka yo sambu bo ke zolaka Nzambi mpi ke bakisaka nde bansiku na yandi kele ya mbote mpi ya ngolo ve mpi yo ke natilaka bo mambote.—Yezaya 48:17.

“Beno yambula kulanda ngidika yai ya bima.” ‘Ngidika ya bima,’ disongidila, kimvuka ya bantu mpi bansiku na bo, bikalulu na bo, mutindu na bo ya kusala mambu, ke wakana ve ti bansiku to bangindu ya Nzambi. (1 Yoane 2:15-17) Yo kele ti bupusi ya ngolo na luzingu ya bantu; yo lenda wumba, kuyidika to kusoba bikalulu mpi kimuntu na bo. Sambu muntu kusambila Nzambi na mutindu yina yandi ke ndimaka, yandi fwete nwanisa bupusi ya nsi-ntoto, kana ve yandi ta kuma ti bikalulu yina kele mbi sambu na yandi mosi mpi yina ke pesaka ve Nzambi kiese.—Baefezo 2:1-3; 4:17-19.

“Beno soba kimuntu na beno mpi beno kumisa mabanza na beno ya mpa.” Muntu fwete soba mpi bikalulu na yandi ya kati mpi mawi na yandi. Bo ke tendula mutindu yandi fwete sala nsoba yina na ngogo ya Kigreki ya bo me balula nde “beno soba,” yina ke monisa mutindu mukwati ke kumaka kipeki-peki. Bantu yina ke sambilaka Nzambi fwete lwata “kimuntu ya mpa.”—Baefezo 4:23, 24; Bakolosai 3:9, 10.

“Beno kudindimisa luzolo ya Nzambi yina kele ya mbote, yina yandi lenda ndima, mpi yina kele ya kukuka.” Nzambi ke zolaka nde bantu yina ke sambila yandi kundima na ntima ya mvimba mambu yina bo ke kwikila. Sambu na kusala yo, bantu yai ke longukaka Ndinga ya Nzambi, ke sadilaka mambu yina yo ke tubaka, mpi ke bakaka mambote ya kuzinga na kulanda bansiku ya Nzambi. Na mutindu yina, bo ke kudindimisaka nde bansiku ya Nzambi kele mbote kibeni.—Nkunga 34:8.

Mambu ya Bo Ke Tubila na Baroma 12:2

Baroma kapu 12 ke tendula mambu ya beto fwete sala sambu na kusambila Nzambi na mutindu yina yandi ke ndimaka. Lusambu yina ke tadilaka mambu yonso ya luzingu na beto mpi yo ke lombaka nde beto sadila ‘mayele na beto ya kuyindula’ na kisika ya kundima bindima-ndima to na kulanda mawi ya mbi. (Baroma 12:1, 3) Kapu yai kele ti bandongisila ya mfunu ya ke tubila mutindu ya kumonisa bikalulu ya Nzambi ke zolaka, mutindu ya kusadila bantu ya nkaka mambu, mpi mutindu ya kusala mambu kana bo ke monisa beto mpasi.—Baroma 12:9-21.