Kwenda na mambu ke na kati

NTENDULA YA BAVERSE YA BIBLIA

Yoane 1:1—“Na Luyantiku Ndinga Vandaka”

Yoane 1:1—“Na Luyantiku Ndinga Vandaka”

“Na luyantiku Ndinga vandaka, mpi Ndinga vandaka ti Nzambi, mpi Ndinga vandaka nzambi.”—Yoane 1:1, Mbalula ya Nsi-Ntoto ya Mpa.

“Ntangu Nzambi vandaka me sala ntete ve bima yonso, Ndinga vandaka. Ndinga vandaka ti Nzambi. Ndinga vandaka Nzambi.”—Yoane 1:1, Bible en Kituba. *

Ntendula ya Yoane 1:1

Verse yai ke tubila mambu ya me tala luzingu ya Yezu Kristu na ntwala nde yandi kwisa bonso muntu na ntoto. (Yoane 1:14-17) Na verse 14, bo ke sadila ngogo “Ndinga” (to “the Logos,” na Kigreki, ho loʹgos) bonso titre. Ziku titre “Ndinga” ke tendula kisalu ya Yezu ya kuzabisa bigangwa ya nkaka bantuma mpi bansiku ya Nzambi. Yezu landaka kuzabisa ndinga ya Nzambi ntangu yandi vandaka kulonga na ntoto mpi na nima ntangu yandi vutukaka na zulu.—Yoane 7:16; Kusonga 1:1.

“Luyantiku” ke tubila ntangu yina Nzambi yantikaka kuganga bima mpi salaka Ndinga. Na nima, Nzambi salaka kumosi ti Ndinga sambu na kuganga bima yonso ya nkaka. (Yoane 1:2, 3) Biblia ke tuba nde Yezu kele “mwana ya ntete ya lugangu yonso” mpi nde “na nzila na yandi, bo gangaka bima yonso ya nkaka.”—Bakolosai 1:15, 16.

Bangogo “Ndinga vandaka nzambi” ke tendula mutindu Yezu vandaka ngolo mingi mpi vandaka ti bikalulu ya me fwanana ti bikalulu ya Nzambi na ntwala nde yandi kwisa na ntoto. Bo lenda tubila yandi mutindu yina sambu yandi vandaka kinati-ndinga ya Nzambi mpi yandi vandaka ti mukumba ya mfunu bonso Mwana ya ntete ya Nzambi mpi Nzambi salaka kumosi ti yandi sambu na kuganga bima yonso ya nkaka.

Mambu ya Bo Ke Tubila na Yoane 1:1

Mukanda ya Yoane ke tubilaka luzingu mpi kisalu ya Yezu ya kulonga ntangu yandi vandaka na ntoto. Baverse ya luyantiku ya kapu ya ntete ke tubila luzingu ya Yezu na zulu, kinduku na yandi ya ngolo ti Nzambi, mpi kisalu na yandi ya mfunu na bangwisana ya Nzambi ti bantu. (Yoane 1:1-18) Mambu yina ke sadisa beto na kubakisa mambu ya Yezu tubaka mpi salaka ntangu yandi vandaka kulonga na ntoto.—Yoane 3:16; 6:38; 12:49, 50; 14:28; 17:5.

Bangindu ya Luvunu Sambu na Yoane 1:1

Ngindu ya Luvunu: Yo lombaka nde bo balula nsa ya nsuka ya Yoane 1:1 mutindu yai: “Ndinga vandaka Nzambi.”

Diambu ya Kieleka: Ata Bambalula mingi ya Biblia ke balulaka verse yai mutindu yina, bankaka me monaka nde yo kele mfunu na kubalula yo mutindu ya nkaka. Na masonama ya ndinga ya kisina, bisika zole ya ngogo “Nzambi” (na Kigreki, the·osʹ) kele na Yoane 1:1, bo me sonika yo ve mutindu mosi. Na kisika ya ntete, ngogo “Nzambi” kele ti article défini ya Kigreki, kansi article yina kele ve na kisika ya zole. Bantu mingi ya mayele ke tubaka nde mutindu article kele ve na kisika ya zole yina ngogo the·osʹ kele, kele mfunu mingi. Mu mbandu, mukanda mosi (The Translator’s New Testament) ke tuba mambu yai mutindu article kele ve na kisika ya zole: “Mutindu ya zole ya bo me sadila ngogo Theos (Nzambi) kele bonso ntendula ya bo ke pesa, yo yina bangogo yina ke tendula ‘Ndinga vandaka bonso nzambi.’” * Bantu ya nkaka ya mayele * mpi bambalula ya nkaka ya Biblia ke monisaka mpi luswaswanu yai.—Tala “ Yoane 1:1 Na Bambalula ya Nkaka.”

Ngindu ya Luvunu: Verse yai ke longa beto nde Ndinga kele kiteso mosi ti Nzambi Nkwa-Ngolo Yonso.

Diambu ya Kieleka: Bangogo “Ndinga vandaka ti Nzambi” ke monisa nde verse yai ke tubila bantu zole ya kuswaswana. Yo lenda salama ve nde Ndinga kuvanda “ti Nzambi” mpi na ntangu yina mosi yo vanda mpi Nzambi Nkwa-Ngolo Yonso. Mambu ya bo ke tubila na kapu yina ke ndimisa mpi nde Ndinga kele ve Nzambi Nkwa-Ngolo Yonso. Yoane 1:18 ke tuba nde “ata muntu mosi ve me monaka Nzambi.” Kansi, bantu monaka na meso Ndinga, disongidila Yezu, sambu Yoane 1:14 ke tuba nde “Ndinga kumaka nsuni mpi zingaka na kati na beto, mpi beto monaka nkembo na yandi.”

Ngindu ya Luvunu: Ndinga ke vandaka ntangu yonso na luzingu.

Diambu ya Kieleka: “Luyantiku” ya bo ke tubila na verse yai lenda tendula ve “luyantiku” ya Nzambi, sambu Nzambi kele ve ti luyantiku. Yehowa * Nzambi kele “katuka mvula na mvula tii mvula na mvula.” (Nkunga 90:1, 2) Kansi, Ndinga, disongidila Yezu Kristu, vandaka ti luyantiku. Yandi kele “luyantiku ya lugangu ya Nzambi.”—Kusonga 3:14.

Ngindu ya Luvunu: Kubinga Ndinga “nzambi” kele kulonga bantu na kusambila banzambi mingi.

Diambu ya Kieleka: Ngogo ya Kigreki ya bo ke baluala nde “Nzambi” to “nzambi” (the·osʹ) mbala mingi ke wakanaka ti bangogo ya Kiebreo ʼel mpi ʼelo·himʹ, yina bo ke sadilaka mingi na Kuwakana ya Ntama. Bantu ke tubaka nde mbala mingi, bangogo yina ya Kiebreo ke tendulaka ntete-ntete “Muntu ya Ngolo; Muntu ya Kikesa” mpi bo ke sadilaka yo sambu na Nzambi nkwa-ngolo yonso, banzambi ya nkaka, mpi ata bantu. (Nkunga 82:6; Yoane 10:34) Ndinga kele muntu yina Nzambi gangaka bima yonso ya nkaka na nzila na yandi, yo yina bo lenda tuba nde yandi kele muntu ya ngolo. (Yoane 1:3) Kubinga Ndinga “nzambi” ke wakana ti mambu yina mbikudulu ya kele na Yezaya 9:6 ke tuba; yo tubaka na ntwala nde muntu yina Nzambi me ponaka, disongidila Mesia to Kristu, bo ta binga yandi “Nzambi ya Ngolo” (na Kiebreo, ʼEl Gib·bohrʹ), kansi ve “Nzambi Nkwa-Ngolo Yonso” (ʼEl Shad·daiʹ, na Kuyantika 17:1; 35:11; Kubasika 6:3; Ezekiele 10:5).

Biblia ke longaka ve bantu na kusambila banzambi mingi. Yezu Kristu tubaka nde: “Nge fwete sambila Yehowa Nzambi na nge, mpi yandi mpamba nge fwete sadila kisalu ya santu.” (Matayo 4:10) Biblia ke tuba nde: “Sambu ata kele ti bayina bo ke bingaka banzambi, yo vanda na zulu to na nsi-ntoto, mutindu ‘banzambi’ kele mingi mpi ‘bamfumu’ kele mingi, na kutuba ya kieleka, sambu na beto, Nzambi kele kaka mosi, Tata; bima yonso me katukaka na yandi, mpi beto ke zingaka sambu na yandi; mpi Mfumu kele mosi, Yezu Kristu; bima yonso kele na nzila na yandi, mpi beto ke zingaka na nzila na yandi.”—1 Bakorinto 8:5, 6.

 Yoane 1:1 Na Bambalula ya Nkaka

“Na luyantiku Ndinga vandaka. Ndinga vandaka ti Nzambi, mpi Ndinga vandaka bonso nzambi.”—The Bible—An American Translation, 1935, by J.M.P. Smith and E. J. Goodspeed.

“Logos vandaka na luyantiku kibeni, Logos vandaka ti Nzambi, Logos vandaka bonso nzambi.”—The Bible—Containing the Old and New Testaments, 1950, by James Moffatt.

“Ndinga vandaka na luyantiku, mpi ndinga vandaka ti Nzambi, mpi ndinga vandaka nzambi.”—The New Testament in an Improved Version, 1808, yina Thomas Belsham sonikaka, mpi yo me katuka na mbalula ya Kuwakana ya Mpa ya William Newcome.

“Na Luyantiku Ndinga vandaka. Mpi Ndinga vandaka ti Nzambi. Ebuna Ndinga vandaka bonso nzambi.”—The Authentic New Testament, 1958, by Hugh H. Schonfield.

^ par. 4 Yo kele mutindu mosi na Mbalula ya Roi jacques.

^ par. 8 The Translator’s New Testament, lutiti 451.

^ par. 8 Muntu mosi ya mayele, Jason David BeDuhn, ke tuba nde mutindu article défini kele na kisika mosi ke sala nde bisika zole yina zina ya “Nzambi” kele kuvanda ya “kuswaswana mutindu ‘nzambi’ me swaswana ti ‘Nzambi’ na Kikongo.” Yandi ke yika nde: “Na Yoane 1:1, Ndinga kele ve Nzambi mosi mpamba, kansi yandi kele nzambi, to bonso nzambi.”—Truth in Translation: Accuracy and Bias in English Translations of the New Testament, lutiti 115, 122, mpi 123.

^ par. 12 Yehowa kele zina ya Nzambi.—Nkunga 83:18.