Kwenda na mambu ke na kati

BANGIUFULA YINA BALEKE KE KUDIYULUKA

Inki Mutindu Mono Lenda Nunga Bifu na Mono?

Inki Mutindu Mono Lenda Nunga Bifu na Mono?

 Inki nge fwete sala?

Tanga mambu yina kuminaka Karina mpi meka kuyindula kana mambu yango kuminaka nge. Inki nge zolaka kusala?

Karina ke tuba nde: “Ntangu mono vandaka kukwenda na nzo-nkanda, mono vandaka kupusa kamio ntinu kibeni, polisi mosi kangaka mono mpi yandi lombaka mono mbongo ya amande. Yo yangisaka mono mingi! Mono songaka mama mambu yango mpi yandi songaka mono na kuzabisa papa, kansi mono zolaka ve kusonga papa yo.”

Inki nge fwete sala?

  1. Ngindu ya ntete : Kubumba yo mpi kuyindula nde papa ta zaba yo ve ata fioti.

  2. Ngindu ya zole: Kusonga papa mambu kaka mutindu yo salamaka.

Ziku nge lenda pona ngindu ya ntete. Mbala ya nkaka, mama na nge ta yindula kaka nde nge kwendaka kusonga papa na nge. Kansi, kele ti bikuma ya mbote yina nge fwete ndima bifu na nge, ata bo ta lomba nge amande to konso kima yina.

 Bikuma tatu yina lenda sadisa nge na kundima bifu na nge

  1. 1. Sambu yo kele kima ya mbote ya kusala. Biblia ke tubila munsiku mosi sambu na Bakristu, yo ke tuba nde: “Beto ke zola kuditwadisa na masonga na mambu yonso.”—Baebreo 13:18.

    Alexis ke tuba nde: “Mono ke salaka yonso sambu na kuvanda masonga mpi ke ndimaka bifu na mono kaka na ntangu mono me sala yo.”

  2. 2. Sambu bantu ke zolaka kibeni kulolula bantu yina ke ndimaka bifu na bo. Biblia ke tuba nde: “Muntu yina ke bumba mambi na yandi ta nunga ve, Kansi muntu yina ke funguna yo mpi ke yambula yo, bo ta wila yandi mawa.”—Bingana 28:13.

    Richard ke tuba nde: “Yo ke lombaka bikesa sambu na kundima bifu, kansi kusala mutindu yina ta sala nde bantu kutudila nge ntima. Bo ta bakisa nde nge kele muntu ya masonga. Kana nge ke ndima bifu na nge, mambu ya nkaka yina lendaka kukumina nge ta kumina nge ve.”

  3. 3. Kima ya kuluta mfunu kele nde yo ke sepedisaka Yehowa Nzambi. Biblia ke tuba nde: “Yehowa ke mengaka muntu ya luvunu, kansi yandi ke taka kinduku ya ngolo ti bantu ya mbote.”​—Bingana 3:​32.

    Rachel ke tuba nde: “Na nima ya kusala kifu mosi ya nene, mono monaka nde mono fwete ndima kifu yango sambu mambu ya luzingu na mono kulanda kutambula mbote. Yehowa ta sakumuna mono ve kana mono ke sala ve mambu yina yandi ke zolaka.”

Ebuna, nki karina salaka na kifu yina yandi salaka? Yandi songaka ve papa na yandi amande yina bo lombaka yandi. Kansi nsuka-nsuka, kifu na yandi yina zolaka kaka kuzabana. Karina ke tuba nde: “Kiteso ya mvula mosi na nima, papa vandaka kutala mikanda na beto ya asiranse mpi yandi monaka mukanda yina bo pesaka mono sambu na kufuta amande. Yo yangisaka mono mingi​—nkutu mama waka makasi kibeni sambu mono salaka ve mambu yina yandi songaka mono!”

Dilongi yina yandi bakaka: Karina ke tuba nde: “ Kubumba bifu ke bebisaka diaka mambu mingi kibeni. Nsuka-nsuka yo lenda natila nge bampasi!”

 Mutindu nge lenda baka dilongi na bifu na nge

Beto yonso ke salaka bifu. (Baroma 3:​23; 1 Yoane 1:8) Mutindu beto me mona yo, muntu ya ke ndimaka bifu na yandi ke ke monisaka nde yandi kele muntu ya kuyela mpi ya kudikulumusa ​—mpi yo ke lombaka kundima kifu kaka ntangu yo me salama.

Na nima baka dilongi na kifu yina nge salaka. Diambu ya mawa kele nde batoko mingi ke salaka ve mambu yai! Bo lenda yindula bonso Priscilla yina tubaka nde: “ Mono lembaka kibeni nitu sambu na bifu na mono. Mono kumaka ti bangindu ya mbi sambu na mono mosi, yo yina bifu na mono kumaka kibeni bonso kima mosi ya kizitu yina mono lendaka ve kunata. Mono kumaka kudiyangisa mpi mono vandaka kumuna nde mono kele diaka ve na mfunu.”

Keti bantangu ya nkaka nge mpi ke kudiwaka mutindu yai? Kana ee, zaba nde: Kuyindula bifu ya ntama kele bonso muntu yina ke tala kaka na kitala-tala ya kamio ntangu yandi ke pusa kamio. Kuyindula bifu ya ntama ta pusa nge na kudimona muntu ya kukonda mfunu mpi nge vanda ve ti ngolo ya kununga bampasi yina lenda kumina nge na bilumbu ke kwisa.

Kansi, sambu na nki ve kutadila yo ti bukati-kati?

Elliot ke tuba nde: “Yibuka bifu na nge ya ntama mpi bakila yo dilongi, sambu nge vutukila yo diaka ve. Kansi, kudiyangisa mingi sambu na bifu yango lenda lembisa nge.”

Vera ke tuba nde: “Mono ke bakaka dilongi na konso kifu yina mono ke salaka, yo ke sadisaka mono na kuvanda muntu ya mbote mpi na kutadila diaka ve mambu mutindu mono vandaka kutadila yo ntete. Kusala mpidina, kele mbote sambu yo ke sadisaka mono na kuyela.”