Ntumwa Polo Sonikaka nde: “Ntangu mono ke zola kusala mambu ya mbote, mambu ya mbi kele na mono.” (Baroma 7:21) Keti nge me kudiwaka dezia mutindu yina? Kana mpidina, disolo yai lenda sadisa nge na kubwa ve na mutambu ya kusala mambu ya mbi.

•  Mambu ya nge fwete zaba

•  Mambu ya nge fwete sala

•  Mambu yina baleke ya nkaka ke tuba

 Mambu ya nge fwete zaba

 Mbala mingi bupusi ya bantu ya nkaka lenda tinda nge na kusala mambu ya mbi. Ya kieleka, Biblia ke tuba nde “Banduku ya mbi ke bebisaka bikalulu ya mbote.” (1 Bakorinto 15:33) Bupusi ya bantu ya nkaka to bupusi ya bima yina ke mwangaka bansangu lenda tedimisa banzala ya ntima na nge mpi banzala yango lenda tinda nge na kusala kima ya mbi mpi nkutu yo lenda sala nde nge ‘landa kimvuka ya bantu sambu na kusala mbi.’​—Kubasika 23:2.

 Jeremy ke tuba nde: “Mpusa ya kuzola nde bantu ya nkaka kundima nge lenda tinda nge na kusala konso kima yina bo ke sala, kaka sambu bo ndima nge.”

 Mambu ya kuyindulula: Sambu na nki nge ke ndimaka nde bansiku ya Nzambi kele sambu na mambote na nge mosi?​—Bingana 29:25.

 Na bunkufi: Kubika ve nde bupusi ya banduku na nge kutinda na kufwa bansiku yina nge ke lemfukilaka.

 Inki nge lenda sala

 Zaba mambu ya nge ke ndimaka. Kana nge me zaba ve mambu ya nge ke ndimaka, nge lenda kuma bonso mwana ya kiteki yina bantu ya nkaka lenda sekana ti yo. Yo ta vanda mbote nde nge landa ndongisila yai ya Biblia: “Beno zikisa mambu yonso; beno kangama ngolo na mambu ya mbote.” (1 Batesalonika 5:21) Kana nge ke bakisa mambu ya nge ke ndimaka, yo ta vandila nge ve mpasi na kukangama na yo mpi na kubwa ve na mpukumuna ya kukonda kuzitisa yo.

 Mambu ya kuyindulula: Sambu na nki nge ke ndimaka nde bansiku ya bikalulu ya mbote ya Nzambi kele sambu na mambote na nge?

 Kimberly ke tuba nde: “Mono ke monaka nde kana mono me kangama na mambu ya mono ke ndimaka mpi mono bwa ve na mpukumuna, bantu ke pesaka mono luzitu ya mingi sambu na yo.”

 Mbandu ya Biblia: Daniele. Yo lenda vanda nde ntangu yandi vandaka ntete leke kibeni, Daniele “bakaka lukanu na ntima na yandi” nde yandi ta zitisa bansiku ya Nzambi.​—Daniele 1:8.

 Zaba bisika nge ke vandaka ve ngolo. Biblia ke tubilaka “banzala ya kileke” disongila bampusa yina ke vandaka ngolo mingi-mingi ntangu muntu ke vandaka toko. (2 Timoteo 2:22) Bampusa yango kele kaka ve bampusa ya kuvukisa nitu. Kansi yo kele mpi mpusa ya kuzola nde bantu kundima beto mpi mpusa ya kubaka balukanu nge mosi kukonda bibuti na nge kansi nge me fwana ntete ve na kusala buna.

 Mambu ya kuyindulula: Biblia ke tuba nde “konso muntu ke mekamaka kana yandi ke bika nde nzala na yandi mosi kubenda yandi mpi kupukumuna yandi.” (Yakobo 1:14) Inki mpukumuna ke mekaka nge mingi?

 Sylvia ke tuba nde: “Zaba mumekamu yina ke vandilaka nge mpasi na kutelemina. Sala bansosa sambu nge zaba mutindu nge lenda nwanisa mpukumuna yango mpi sonika bangindu yina nge lenda sadila. Mpidina na mbala ya nima yina nge ta kutana ti mumekamu yango, nge ta zaba mutindu ya kutelamina yo.”

 Mbandu ya Biblia: Davidi. Na ntangu mosi buna, yandi bikaka banzala na yandi mpi mutindu bantu ya nkaka vandaka kudindama na kubwisa yandi. Kansi Davidi bakaka malongi na bifu yina yandi salaka mpi yandi sosaka kuyidika mambu. Yandi sambaka Yehowa nde: “Ganga ntima ya mpembe na kati na mono . . . mpi tula na kati na mono mpeve ya mpa, mpeve ya ngolo.”​—Nkunga 51:10.

 Kudiyala. Biblia ke tuba nde: “Kubika ve nde mambu ya mbi kununga nge.” (Baroma 12:21) Yo ke tendula nde, yo ke lomba kaka ve nde nge bwa na mpukumuna. Nge lenda pona na kusala mambu ya mbote.

 Mambu ya kuyindulula: Inki mutindu nge lenda kudiyala mpi kusala mambu ya mbote na diambu mosi ya lenda tinda nge na kusala mambu ya mbi?

 Sophia ke tuba nde: “Mono ke yindulaka mutindu mono ta kudiwa kana mono me bwa na mumekamu mosi. Keti mono ta kudiwa mbote? Mbala ya nkaka mono ta kudiwa mbote, kansi yo lenda vanda kaka sambu na ntangu fioti. Keti mono ta kudiwa kaka mpidina na nima ya bilumbu? Ve, mono ta kudiwa mbi kibeni. Keti yo me fwana kibeni nde mono sala yo? Ve.”

 Mbandu ya Biblia: Polo. Ata yandi ndimaka nde yandi vandaka ti bampusa ya mbi, Polo zabaka kudiyala. Yandi sonikaka nde: “Mono ke pesaka ndola na nitu na mono mpi mono ke nataka yo bonso mpika.”​—1 Bakorinto 9:27, noti na nsi ya lutiti.

 Na bunkufi: Nge mosi muntu ta pona mambu ya nge ta sala kana nge me kutana ti mumekamu.

 Kuvila ve nde mpukumuna ke vandaka sambu na ntangu fioti. Melissa kele toko mosi ya nkento ya bamvula 20. Yandi ke tuba nde: “Mambu mingi ya vandaka bampukumuna ya nene sambu na mono ntangu mono vandaka na nzo-nkanda ya kati-kati me kumaka sesepi kukonda mfunu. Kana mono yindula yo, yo ke kitisaka mono ntima mpi ke sadisaka mono na kuzaba nde mpukumuna ya mono ke kutana ti yo bubu ta luta mpi kilumbu ya nkaka, mono ta bakisa nde mono salaka mbote mutindu mono telaminaka yo.”