Keti dibanza ya kupesa luzingu na nge na Yehowa mpi ya kubaka mbotika ke pesa nge boma? Kana ee, disolo yai ta sadisa nge na kukatula boma yina.

Disolo yai ke tubila

•  Ebuna kana mono sala disumu mosi ya nene na nima ya kubaka mbotika?

•  Ebuna kana mono ke wa boma ya mikumba yina bo ke bakaka na nima ya mbotika?

•  Ebuna kana mono ke mona nde mono me fwana ve na kusadila Yehowa?

•  Mambu yina baleke ya nkaka ke tubaka

 Ebuna kana mono sala disumu mosi ya nene na nima ya kubaka mbotika?

 Sambu na nki yo ke yangisa nge: Mbala ya nkaka nge me zaba muntu mosi yina salaka disumu ya nene mpi bo basisaka yandi na dibundu. (1 Bakorinto 5:11-13) Mbala ya nkaka, nge ke wa boma nde mambu yina kukumina nge mpi.

 Rebecca ke tuba nde: “Ntangu mono yantikaka kutala kana yo ke lomba nde mono baka mbotika, mono waka boma nde mono ta bebisa mambu yonso kana mono sala kifu na nima. Mono vandaka kuyindula mpasi yina bibuti na mono ta wa.”

 Verse ya mfunu: “Bika nde muntu ya nku kuyambula nzila na yandi . . . Bika nde yandi vutuka na Yehowa, yina ta wila yandi mawa, na Nzambi na beto, sambu yandi ta lolula na luzolo yonso.”​—Yezaya 55:7.

 Yindula mambu yai: Yo kele masonga nde bantu yina ke salaka masumu kukonda kubalula ntima, bo ke basisaka bo na dibundu. Kansi bantu yina ke balulaka ntima ti kudikulumusa yonso mpi ke ndimaka ndola ya Yehowa, yandi ke wilaka bo mawa.​—Nkunga 103:13, 14; 2 Bakorinto 7:11.

 Katula yo, kuvila ve diambu yai: Nge kele muntu ya kukonda kukuka. Kansi Nzambi lenda sadisa nge na kubwa ve na bampukumuna. (1 Bakorinto 10:13) Diaka, nani ke bakaka lukanu ya kima yina nge ta sala? Nge mosi? To muntu ya nkaka?

 Karen ke tuba nde: “Mono vandaka kuwa boma nde mono ta sala disumu mosi ya nene na nima ya kubaka mbotika, kansi mono me bakisa nde mono ta sala kifu kana mono buya kubaka mbotika. Mono lenda bika ve nde boma ya mambu yina lenda salama na bilumbu ke kwisa kukanga mono nzila bubu.”

 Na bunkufi: Kana nge me baka lukanu ya kubaka mbotika, nge ta sala ve disumu ya nene, kaka bonso bansadi mingi ya Yehowa.​—Bafilipi 2:12.

 Nge kele na mfunu ya lusadisu? Tala disolo “Inki Mono Fwete Sala Sambu Mono Bwa Ve na Mpukumuna?”

 Ebuna kana mono ke wa boma ya mikumba yina bo ke bakaka na nima ya mbotika?

 Sambu na nki yo ke yangisa nge: Mu mbandu, mbala ya nkaka nge me zaba batoko yina me kwendaka kuzinga ntama ti banduku na bo mpi mabuta na bo sambu na kusala mingi na kisalu ya Yehowa, ebuna nge ke kudiyangisa nde bantu ya nkaka ke vingila nde nge mpi nge kwenda bonso bo.

 Marie ke tuba nde: “Mukristu yina me bakaka mbotika kele ti makuki ya kusala mingi na kisalu ya Yehowa. Kansi luzingu ya bantu ya nkaka ke pesaka bo ve nzila ya kusadila yandi mingi, to bo ke zolaka kuvingila mwa fioti na ntwala ya kusala buna.”

 Verse ya mfunu: “Konso muntu fwete tadila mambu yina yandi mosi ke sala, ebuna yandi ta vanda ti kikuma ya kuwa kiese sambu na yandi mosi, kansi ve na kudifwanisa ti muntu ya nkaka.”​—Bagalatia 6:4.

 Yindula mambu yai: Na kisika ya kudifwanisa ti bantu ya nkaka, tula dikebi na mambu yai ya Marko 12:30 ke tuba nde: “Nge fwete zola Yehowa Nzambi na nge na ntima na nge ya mvimba.”

 Nge me mona, Biblia ke tuba nde nge fwete sadila Yehowa na ntima na nge ya mvimba, kansi ve na ntima ya muntu ya nkaka. Kana nge ke zolaka kibeni Yehowa, nge mosi ta zaba inki mutindu nge lenda sadila yandi na mutindu ya me fwana sambu na nge.

 Julia ke tuba nde: “Yo kele masonga nde mbotika kele kima mosi ya mfunu na luzingu na nge, kansi yo fwete vanda ve kizitu. Kana nge pona banduku ya mbote, bo ta vanda pana sambu na kusadisa nge. Nge ta mona nde kana nge ndima kubaka mikumba, nge ta vanda na kiese. Kansi, kana nge buya kubaka mbotika, lukanu yina ta sadisa nge ve.”

 Na bunkufi: Monisa ntonda sambu na zola yina Yehowa ke monisila nge. Yo ta pesa nge kikesa ya kupesa yandi yina nge kele na yo ya kuluta mbote.​—1 Yoane 4:19.

 Nge kele na mfunu ya lusadisu? Tala disolo “Keti Mono Kele Muntu Yina Me Fwana?”

 Ebuna kana mono ke mona nde mono me fwana ve na kusadila Yehowa?

 Sambu na nki yo ke yangisa nge: Yehowa kele Mfumu ya zulu ti ntoto mpi ya bima yonso ya kele na kati. Kana beto fwanisa yandi ti bantu, bantu kele kima ve. Mbala ya nkaka, nge ke kudiyula nkutu kana Yehowa ke zabaka nde nge mpi nge ke vandaka na luzingu.

 Natalie ke tuba nde: “Bibuti na mono kele Bambangi ya Yehowa, mono vandaka kuwa boma ya kuvanda nduku ya Yehowa kaka sambu bibuti na mono vandaka Bambangi ya Yehowa. Mono vandaka mpi kumona nde Yehowa ve muntu me bendaka mono na yandi.”

 Verse ya mfunu: “Ata muntu mosi ve lenda kwisa na mono kana Tata, yina tindaka mono, kubenda yandi ve.”​—Yoane 6:44.

 Yindula mambu yai: Mutindu nge ke yindula kubaka mbotika ke monisa nde Yehowa muntu me bendaka nge na yandi. Nkutu yandi muntu ke lomba nge na kuvanda pene-pene na yandi. Keti kuzaba buna ke pesa nge ve nzala ya kundima emvitasio na yandi?

 Kuvila mpi ve nde Yehowa muntu ke tulaka mambu yina yo ke lombaka nde muntu kulungisa sambu na kukuma nduku na yandi, kansi nge ve to muntu ya nkaka. Mpi ndinga na yandi ke songa nge nde ‘kwenda pene-pene na Nzambi, . . . yandi ta kwisa pene-pene na nge.’​—Yakobo 4:8.

 Selina ke tuba nde: “Nge me zaba Yehowa mpi yandi me bendaka nge na yandi: yo ke monisa nde yandi ke zolaka nge. Yo yina kana ntu na nge ke songa nge nde nge me fwana ve na kusadila yandi, yibuka nde Yehowa ke yindulaka ve mutindu yina. Diaka, Yehowa ke kudikusaka ve ata fioti.”

 Na bunkufi: Kana nge ke lungisa mambu yina Yehowa ke lombaka sambu na kubaka mbotika, zaba nde nge me fwana na kusambila yandi. Kuvila ve nde yo me fwana nde nge sambila yandi.​—Kusonga 4:11.

 Nge kele na mfunu ya lusadisu? Tanga disolo “Sambu na Nki Mono Fwete Samba?”