Kwenda na mambu ke na kati

Keti Kunwa Makaya Kele Disumu?

Keti Kunwa Makaya Kele Disumu?

Mvutu ya Biblia

 Biblia ke tubilaka ve kunwa makaya a to bametode ya nkaka yina bantu ke sadilaka sambu na kunwa makaya. Kansi yo ke tubilaka minsiku yina ke monisa nde Nzambi ke zolaka ve ata fioti mambu ya mbi mpi ya ke bebisaka sante, mpi nde na meso na yandi, yo kele disumu.

  •   Kubaka luzingu na valere. ‘Nzambi ke pesaka bantu yonso luzingu mpi mpema.’ (Bisalu 17:24, 25) Luzingu kele dikabu ya Nzambi. Yo yina, beto fwete sala ve konso kima yina lenda kumisa luzingu na beto nkufi, mu mbandu kunwa makaya. Na ntoto ya mvimba, bantu mingi ke fwaka lufwa ya mubisu kaka sambu na makaya.

  •   Kuzola bantu ya nkaka. “Nge fwete zola nkweno na nge bonso nge mosi.” (Matayo 22:39) Kunwa makaya na lweka ya bantu ya nkaka kele kukonda zola sambu na bo. Bantu yina ke vandaka pene-pene ya muntu yina ke nwa makaya, bo lenda bela bamaladi yina bantu yina ke nwaka makaya ke belaka mbala mingi.

  •   Kuvanda santu. ‘Beno pesa nitu na beno bonso kimenga ya moyo, ya santu, ya Nzambi ke ndimaka.’ (Baroma 12:1) “Beto katula na nitu na beto mvindu yonso ya kinsuni mpi ya mpeve, sambu beto kumisa busantu na beto ya kulunga na boma ya Nzambi.” (2 Bakorinto 7:1) Kunwa makaya kele ve mbote mpi yo ke wakanaka ve ti kikalulu ya kuvanda santu, disongidila kuvanda bunkete, sambu bantu yina ke nwaka makaya ke kotisaka ndikila na nitu na bo kukonda kuzaba mpi yo ke bebisaka bo kibeni nitu.

Inki Biblia ke tubaka na yina me tala kunwa diamba to kusadila bima ya nkaka ya ke lawusaka kaka sambu na kulutisa ntangu?

 Biblia ke tangaka ve mbala mosi zina ya diamba (cannabis) to ya makaya nkaka ya mutindu mosi ya ke lawusaka. Kansi yo ke tubilaka minsiku yina muntu fwete tadila na yina me tala kusadila bima ya ke lawusaka kaka sambu na kulutisa ntangu, bima yina ke kumisaka muntu mpika. Katula mambu ya beto me katuka kutubila, beto fwete tadila mpi mambu yai ke landa:

  •   Kutanina makuki na beto ya kuyindula. “Nge fwete zola Yehowa Nzambi na nge . . . na mabanza na nge yonso.” (Matayo 22:37, 38) “Beno tanina kibeni mabanza na beno.” (1 Piere 1:13) Muntu yina ke sadilaka bima yina ke lawusaka lenda tanina ve mabanza na yandi, mpi nkutu bantu mingi me kumaka bampika ya bima yina ke lawusaka. Na kisika ya kuyindula mambu ya mbote, mabanza na bo yonso ke kwendaka kaka na mutindu bo lenda zwa bima yina ke lawusaka mpi kusadila yo.—Bafilipi 4:8.

  •   Kuzitisa bansiku ya leta. ‘Beno wila mpi beno lemfukila baluyalu mpi bamfumu.’ (Tito 3:1) Na bansi mingi, luyalu ke tulaka bansiku na yina me tala kusadila bima yina ke lawusaka. Kana beto ke zola kusepedisa Nzambi, beto fwete lemfukila bamfumu ya leta.—Baroma 13:1.

a Kunwa makaya ya bo ke tubila awa ke tadila kubenda-benda midinga ya sigareti, ya makaya yina bo ke bingaka cigare, ya pipe to ya pipe ya masa. Kansi yo ke tadila mpi makaya yina bo ke tulaka na munoko, ya bo ke bendaka na mbombo mpi makaya ya nkaka.