Kwenda na mambu ke na kati

Kukwisa ya Kristu Ke Tendula Inki?

Kukwisa ya Kristu Ke Tendula Inki?

Mvutu ya Biblia

 Biblia ke tubilaka kukwisa ya Kristu na baverse mingi. Yandi ta kwisa sambu na kusambisa bantu na nsi-ntoto. a Mu mbandu, Matayo 25:31-33 ke tuba nde:

 “Ntangu Mwana ya muntu [Yezu Kristu] ta kwisa na nkembo na yandi ti bawanzio yonso, yandi ta vanda na zulu ya kiti na yandi ya kimfumu ya nkembo. Bo ta vukisa makanda yonso na ntwala na yandi, mpi yandi ta kabula bantu na bimvuka zole, kaka mutindu ngungudi ke kabulaka mameme ti bankombo. Yandi ta tula mameme na diboko na yandi ya kitata, mpi bankombo na diboko na yandi ya kimama.”

 Ntangu yina ya lusambisu ta vanda na kati ya mambu yina ta salama na “mpasi ya nene.” (Matayo 24:21; Kusonga 16:16) Bambeni ya Kristu yina Biblia me tubila bonso bankombo, ‘bo ta baka ndola ya lufwa ya mvula na mvula.’ (2 Batesalonika 1:9; Kusonga 19:11, 15) Kansi bantu yina me kangamaka na yandi, disongidila mameme, ta vanda ti kivuvu ya kubaka “luzingu ya mvula na mvula.”—Matayo 25:46.

Inki ntangu Kristu ta kwisa?

 Yezu tubaka nde: “Na yina me tala kilumbu yina mpi ngunga yina, ata muntu mosi ve me zaba yo.” (Matayo 24:36, 42; 25:13) Ata mpidina, yandi tubilaka “kidimbu” mosi ya kele ti mambu mingi na kati mpi mambu yango ta monana. “Kidimbu” yango ta monisa nsungi yina ta nata na kukwisa na yandi.—Matayo 24:3, 7-14; Luka 21:10, 11.

Kristu ta kwisa ti nitu ya kimpeve to nitu ya kinsuni?

 Yezu futumukaka ti nitu ya kimpeve, yo yina yandi ta kwisa na nitu ya kimpeve kansi ya kinsuni ve. (1 Bakorinto 15:45; 1 Piere 3:18) Yo yina na ntwala nde Yezu kufwa, yandi songaka balongoki na yandi nde: “Kubika fioti, nsi-ntoto ta mona mono diaka ve.”—Yoane 14:19.

Mambu yina bantu mingi ke yindulaka na yina me tala kukwisa ya Kristu

 Bangindu ya bantu: Ntangu Biblia ke tubaka nde bantu ta mona Yezu “ke kwisa na zulu ya matuti,” yo ke tendulaka nde Yezu ta kwisa kimuntu-kimuntu, na mutindu yina bantu ta mona yandi.—Matayo 24:30.

 Diambu ya kieleka: Mbala mingi Biblia ke tubilaka matuti sambu na kumonisa kima mosi ya bantu lenda mona ve na meso. (Levi 16:2; Kutanga 11:25; Kulonga 33:26) Mu mbandu, Nzambi songaka Moize nde: “Mono ke kwisa na nge na dituti ya ndombe.” (Kubasika 19:9) Moize monaka ve Nzambi mpidiyai na meso. Kiteso mosi, Kristu ta “kwisa na zulu ya matuti” na mutindu mosi ya bantu ta bakisa nde yandi me kwisa ata bo ta mona yandi ve mpidiyai na meso.

 Bangindu ya bantu: Bangogo “konso disu ta mona yandi” yina Biblia ke tubila na mukanda ya Kusonga 1:7 ntangu yo ke tubila kukwisa ya Kristu, beto fwete bakisa yo kaka mutindu yo kele.

 Diambu ya kieleka: Bangogo ya Kigreki yina Biblia me sadila sambu na kutubila “disu” mpi “kumona,” bo ke sadilaka yo mpi bantangu ya nkaka sambu na kutubila kuzaba to kubakisa kima mosi na kisika ya kutubila kumona yo kibeni na meso. b (Matayo 13:15; Luka 19:42; Baroma 15:21; Baefezo 1:18) Biblia ke tuba nde Yezu yina futumukaka kele “nsemo yina bantu lenda pusana ve pene-pene na yo, yina ata muntu mosi . . . lenda mona.” (1 Timoteo 6:16) Yo yina, ntangu Biblia ke tuba nde “konso disu ta mona yandi,” yo ke tendula nde bantu yonso ta bakisa nde Yezu kele muntu yina Nzambi me pesa mukumba ya kusambisa bantu.—Matayo 24:30.

 Bangindu ya bantu: Mambu yina Biblia ke tuba na 2 Yoane 7 ke monisa nde Yezu ta kwisa na mutindu yina bantu ta mona yandi.

 Diambu ya kieleka: Verse yina ya Biblia ke tuba nde: “Bantu mingi ya luvunu me basika na nsi-ntoto, bantu yina ke ndimaka ve nde Yezu Kristu kwisaka na nitu ya kinsuni.”

 Na bilumbu ya ntumwa Yoane, bantu ya nkaka vandaka kubuya kundima nde Yezu me kwisaka na ntoto ti nitu bonso yai beto bantu. Bo vandaka kubinga bantu yango ba Gnostique. Bo sonikaka 2 Yoane 7 sambu na kubuya diambu yai ya luvunu ya bantu yina vandaka kutuba.

a Ata bantu mingi ke sadilaka bangogo “kukwisa ya zole” sambu na kutubila kukwisa ya Kristu, bangogo yai ke vandaka ve na Biblia.

b Tala diksionere The New Thayer’s Greek-English Lexicon of the New Testament (1981), lutiti 451 mpi 470.