Kwenda na mambu ke na kati

Inki Biblia Ke Tuba na Yina Me Tala Kudizola?

Inki Biblia Ke Tuba na Yina Me Tala Kudizola?

Mvutu ya Biblia

 Biblia ke monisa nde yo kele mbi ve, nkutu nde yo kele mfunu, nde muntu kudizola kansi ve na mutindu ya kuluta ndilu. Sambu na yo, yo ke lombaka nde muntu kuditanina, yandi pesa nitu kilo mpi yandi mona nde yandi kele mfunu. (Matayo 10:31) Biblia ke sikisika ve dibanza ya kusosa mambote ya muntu yandi mosi, kansi yo ke tulaka kudizola na kisika yina me fwana sambu na yo.

Beto fwete zola ntete nani?

  1.   Zola na beto sambu na Nzambi fwete baka kisika ya ntete na ntima na beto. Biblia ke longa beto nde nsiku ya kuluta nene yo yai: “Nge fwete zola Yehowa Nzambi na nge na ntima na nge ya mvimba.”​—Marko 12:28-30; Kulonga 6:5.

  2.   Nsiku ya zole ya me luta nene yo yai: “Nge fwete zola nkweno na nge bonso nge mosi.”​—Marko 12:31; Levi 19:18.

  3.   Biblia ke tubilaka ve nsiku ya kudizola. Ata mpidina, nsiku ya ‘kuzola nkweno na beto bonso beto mosi’ ke zola kumonisa nde, yo kele ve mbi mpi nde yo kele mbote nde, muntu kudizola yandi mosi mpi nde yandi kudizitisa na mutindu ya kukonda kuluta ndilu.

Yezu zolaka ntete nani?

 Yezu monisaka kuwakana na kati ya zola sambu na Nzambi, zola sambu na nkweno mpi zola sambu na beto mosi, mpi yandi lombaka balongoki na yandi na kulanda mbandu na yandi.​—Yoane 13:34, 35.

  1.   Yandi zolaka ntete Yehowa mpi yandi kudipesaka ya mvimba sambu na kusala kisalu na yandi. Yandi tubaka nde: “Sambu nsi-ntoto kuzaba nde mono ke zolaka Tata, mono ke sala mutindu Tata songaka mono na kusala.”​—Yoane 14:31.

  2.   Yezu zolaka nkweno na yandi, yandi monisaka yo mutindu yandi vandaka kulungisa bampusa ya bantu ya nkaka tii na kiteso ya kupesa luzingu yandi.​—Matayo 20:28.

  3.   Yandi monisaka zola ya kukonda kuluta ndilu sambu na yandi mosi na mutindu yandi vandaka kubaka ntangu ya kupema, ya kudia, mpi ya kulutisa ntangu ti balongoki na yandi mpi bantu yina lendaka kukuma balongoki na yandi.​—Marko 6:31, 32; Luka 5:29; Yoane 2:1, 2; 12:2.

Kana muntu ke tula na kisika ya ntete zola sambu na bantu ya nkaka, keti yandi ta vanda ve na kiese ya mingi to bantu ta zitisaka yandi diaka ve?

 Ve. Nzambi me salaka beto na kifwani na yandi. Kikalulu ya ntete-ntete ya Nzambi kele zola ya kukonda bwimi. (Kuyantika 1:27; 1 Yoane 4:8) Yo ke tendula nde, beto fwete monisa zola na beto na bantu ya nkaka. Yo me fwana nde beto kudizola. Kansi kima ya ke pesaka kibeni kiese kele kuzola ntete Nzambi mpi kudipesa na kusadila bantu ya nkaka mambu ya mbote. Biblia ke tuba nde: “Kiese ke vandaka mingi na kupesa, kansi na kubaka kiese ke vandaka fioti.”​—Bisalu 20:35.

 Bubu yai, bantu mingi ke tubaka nde sambu na kuvanda na kiese, nge fwete yindula ntete mambote na nge mosi. Sambu na bantu yina, “kudizola nge mosi” me bakaka kisika ya ‘kuzola nkweno na nge.’ Kansi, mambu yina bantu me zabaka bubu ke ndimisa nde muntu ke vandaka na kiese ya mingi mpi na sante ya mbote kana yandi ke zitisa ndongisila yai ya Biblia: “Konso muntu kulanda na kusosa, mambote na yandi mosi ve, kansi ya muntu ya nkaka.”​—1 Bakorinto 10:24.