Kwenda na mambu ke na kati

Kubutuka Mbala Zole Ke Tendula Nki?

Kubutuka Mbala Zole Ke Tendula Nki?

Mvutu ya Biblia

Bangogo “kubutuka . . . mbala zole” ke tendula luyantiku ya kinduku ya mpa na kati ya Nzambi ti muntu yina me butuka mbala zole. (Yoane 3:3, 7) Nzambi ke ndimaka bantu yina me butuka mbala zole bonso bana na yandi. (Baroma 8:15, 16; Bagalatia 4:5; 1 Yoane 3:1) Kaka bonso bana yina nsiku me pesa bibuti nswa ya kusansa, bo ke sobaka dibuta mpi bo ke kumaka bantu ya dibuta ya Nzambi.​—2 Bakorinto 6:18.

Sambu na nki muntu ke butukaka mbala zole?

Yezu tubaka nde: “Kana muntu kubutuka ve mbala zole, yandi lenda mona ve Kimfumu ya Nzambi.” (Yoane 3:3) Yo yina, kubutuka mbala zole ke yidikaka muntu sambu na kuyala ti Kristu na Kimfumu ya Nzambi. Kimfumu yina ke yalaka katuka na zulu, yo yina Biblia ke tubaka nde ‘kubutuka diaka’ kele dikabu yina “bo me bumbaka . . . na zulu.” (1 Piere 1:3, 4) Bantu yina me butukaka mbala zole ke vandaka ti kivuvu nde bo ta “yala bonso bantotila” ti Kristu.—2 Timoteo 2:12; 2 Bakorinto 1:21, 22.

Inki mutindu muntu ke butukaka mbala zole?

Ntangu Yezu tubilaka diambu yai, yandi tubaka nde bantu yina ke butukaka mbala zole fwete ‘butuka na masa mpi na mpeve.’ (Yoane 3:5) Bangogo yai ke tendula mbotika yina muntu fwete baka na kati ya masa mpi na nima na mpeve santu.​—Bisalu 1:5; 2:1-4.

Yezu vandaka muntu ya ntete ya kubutuka mbala zole. Yandi bakaka mbotika na Nzadi ya Yordani mpi na nima Nzambi pakulaka yandi mpeve santu (to botikaka yandi na mpeve santu). Na mutindu yina, Yezu butukaka mbala zole mpi kumaka mwana ya kimpeve ya Nzambi ti kivuvu ya kuvutuka diaka na luzingu na zulu. (Marko 1:9-11) Nzambi salaka nde kivuvu yina kulungana mutindu yandi futumunaka Yezu bonso kigangwa ya kimpeve.​—Bisalu 13:33.

Bantu ya nkaka yina ke butukaka mbala zole ke bakaka mpi mbotika na kati ya masa na ntwala ya kubaka mpeve santu. * (Bisalu 2:38, 41) Mpidina bo ke bakaka kivuvu ya kuzinga na zulu mpi kivuvu yango Nzambi ke lungisaka yo ntangu bo ke futumukaka.​—1 Bakorinto 15:42-49.

Bangindu ya mbi na yina me tala kubutuka mbala zole

Ngindu ya mbi: Muntu fwete butuka mbala zole sambu na kuguluka to sambu na kuvanda Mukristu.

Kieleka: Kimenga ya Yezu ke gulusaka bantu yina ke butukaka mbala zole sambu na kukwenda kuyala ti Kristu na zulu mpi bantu yina ta zinga na ntoto na nsi ya luyalu ya Kimfumu ya Nzambi. (1 Yoane 2:1, 2; Kusonga 5:9, 10) Bakristu yina ta zinga na ntoto kele ti dibaku ya kuzinga kimakulu na Paladisu yina ta vanda na ntoto.​—Nkunga 37:29; Matayo 6:9, 10; Kusonga 21:1-5.

Ngindu ya mbi: Muntu yandi mosi lenda pona na kubutuka mbala zole.

Kieleka: Konso muntu kele ti dibaku ya kukuma nduku ya Nzambi mpi ya kuguluka. (1 Timoteo 2:3, 4; Yakobo 4:8) Kansi, Nzambi muntu ke ponaka bantu yina ta butuka mbala zole, to bayina yandi ta pakula mpeve santu. Na kuwakana ti Biblia, kubutuka mbala zole “ke tadila ve nzala ya muntu to bikesa ya yandi ke salaka, kansi Nzambi.” (Baroma 9:16) Bo lenda balula mpi bangogo ‘kubutuka mbala zole’ nde ‘kubutuka na zulu,’ sambu na kumonisa nde nsola ya bantu yina ke butukaka mbala zole ke katukaka “na zulu” to na Nzambi.​—Yoane 3:3, noti na nsi ya lutiti.

^ par. 9 Kansi, yo salamaka ve mutindu yina sambu na Korneye ti bantu yina vandaka ti yandi.​—Bisalu 10:44-48.