Kwenda na mambu ke na kati

Inki Mutindu Kimenga ya Yezu Kele “Nkudulu Sambu na Bantu Mingi”?

Inki Mutindu Kimenga ya Yezu Kele “Nkudulu Sambu na Bantu Mingi”?

Mvutu ya Biblia

 Kimenga ya Yezu kele nzila yina Nzambi me sadilaka sambu na kukatula to kugulusa bantu na disumu mpi na lufwa. Biblia ke bingaka menga ya Yezu yina tiamukaka nde nkudulu. (Baefezo 1:7; 1 Piere 1:18, 19) Yo yina Yezu tubaka nde, yandi kwisaka sambu na “kupesa luzingu na yandi bonso nkudulu sambu na bantu mingi.”—Matayo 20:28.

Sambu na nki yo lombaka nde bo pesa “nkudulu sambu na bantu mingi”?

 Nzambi gangaka muntu ya ntete Adami ya kukuka disongidila kukonda disumu. Yandi vandaka ti kivuvu ya kuzinga kimakulu, kansi yandi vidisaka yo ntangu yandi buyaka kulemfukila Nzambi. (Kuyantika 3:17-19) Ntangu yandi butaka bana, yandi pesaka bo kifu yina disongidila, disumu. (Baroma 5:12) Yo yina, Biblia ke tubaka nde Adami kuditekaka mpi “tekaka” bana na yandi na kimpika ya disumu mpi ya lufwa. (Baroma 7:14) Ata mwana na yandi mosi ve lendaka kusumba diaka kima yina Adami vidisaka, sambu bo yonso kumaka bantu ya kukonda kukuka.​—Nkunga 49:7, 8.

 Nzambi wilaka bana ya Adami mawa sambu bo vandaka ve ti kivuvu. (Yoane 3:16) Kansi, nsiku ya Nzambi na yina me tala lunungu ke lombaka ve nde yandi vila to yandi lolula masumu na bo kaka mpamba mpidina. (Nkunga 89:14; Baroma 3:23-26) Nzambi ke zolaka bantu, yo yina yandi pesaka kima yina nsiku ke ndimaka sambu na kulolula masumu na bo mpi kukatula yo. (Baroma 5:6-8) Kima yango kele nkudulu.

Inki kele kisalu ya nkudulu?

 Na Biblia ngogo “nkudulu,” ke tadilaka mambu yai tatu:

  1.   Kima yina muntu me futa.​—Kutanga 3:46, 47.

  2.   Kukatula muntu na kimpika, to kusumba yandi diaka.​—Kubasika 21:30.

  3.   Mbalu na yo me fwanana ti ya kima yina bo ke futa, to yo ke bakaka kisika na yo. a

 Beto tala nki mutindu mambu yai tatu ke wakana ti kimenga ya nkudulu ya Yezu Kristu.

  1.   Kima yina muntu me futa. Biblia ke tuba nde bo “me sumbaka [Bakristu] na ntalu.” (1 Bakorinto 6:20; 7:23) Ntalu yango kele menga ya Yezu yina yandi sadilaka sambu na ‘kusumba bantu ya mabuta yonso, ya bandinga yonso, ya bansi yonso, mpi ya makanda yonso sambu na Nzambi.’—Kusonga 5:8, 9.

  2.   Kukatula muntu na kimpika. Kimenga ya Yezu me katulaka bantu na kimpika ya masumu “na nsadisa ya nkudulu.”—1 Bakorinto 1:30; Bakolosai 1:14; Baebreo 9:15.

  3.   Kima yina me fwafwana. Kimenga ya Yezu me fwanana kibeni ti kima yina Adami vidisaka disongidila, luzingu ya kukuka. (1  Bakorinto 15:21, 22, 45, 46) Biblia ke tuba nde: “Mutindu bantu mingi kumaka bansumuki na nzila ya kukonda bulemfu ya muntu mosi [Adami], mutindu mosi mpi bantu mingi ta kuma bantu ya lunungu na nzila ya bulemfu ya muntu mosi [Yezu Kristu].” (Baroma 5:19) Verse yai ke tendula mutindu lufwa ya muntu mosi lenda futa nkudulu sambu na bantu mingi ya masumu. Ya kieleka, kimenga ya Yezu kele “nkudulu ya me fwanana sambu na bantu yonso” yina ke sala mambu ya me fwana sambu na kubaka mambote ya kimenga yina.—1 Timoteo 2:5, 6.

a Na Biblia, bangogo ya kisina yina bo me balula nde “nkudulu” ke pesa ngindu ya mbongo to kima ya mbalu yina bo me futa. Mu mbandu, kisongi-diambu ya Kiebreo ka·pharʹ ke tendula ntete-ntete kufika. Yo ke tadilaka mbala mingi kufika masumu. (Nkunga 65:3) Ngogo koʹpher me fwanana ti yo mpi yo ke pesa ngindu ya mbongo yina bo me futa sambu na kufika to kusumba diaka. (Kubasika 21:30) Kiteso mosi ngogo ya Kigreki lyʹtron, yina bo ke balulaka mbala mingi nde “nkudulu,” bo lenda balula yo diaka na “mbongo ya kukatula bantu” sambu na kugulusa muntu. (Matayo 20:28; Bible na Kituba) Bansoniki ya Kigreki sadilaka ngogo yina sambu na kutubila mbongo ya bo ke futaka sambu bo yambula muntu yina bo kangaka na bitumba to mpika mosi.