Kwenda na mambu ke na kati

Keti Diabulu Kele Mpenza?

Keti Diabulu Kele Mpenza?

Mvutu ya Biblia

 Ee, Diabulu kele. Yandi kele “mfumu ya nsi-ntoto”. Yandi kele wanzio yina me kumaka kusala mambu ya mbi mpi kutelemina Nzambi. (Yoane 14:30; Baefezo 6:11, 12) Biblia ke bingaka Diabulu na bazina mingi yina ke sadisaka beto na kuzaba bikalulu na yandi ya mbi, mu mbandu:

  •   Satana, yina ke tendula “Mbeni.”—Yobi 1:6.

  •   Diabulu, yina ke tendula “Muntu ya Ke Kusilaka Bantu Makambu.”—Kusonga 12:9.

  •   Nioka, yina na Biblia ke tendulaka bantangu ya nkaka “Muntu ya Luvunu.”—2 Bakorinto 11:3.

  •   Mumeki.—Matayo 4:3.

  •   Muntu ya Luvunu.—Yoane 8:44.

Diabulu kele ve kima mosi na bantima ya bantu yina ke pusaka bo na kusala mambu ya mbi

 Bantu ya nkaka ke tubaka nde Satana Diabulu kele kaka kima mosi ya ke vandaka na bantima ya bantu yina ke pusaka bo na kusala mambu ya mbi. Kansi, Biblia ke tubilaka masolo yina Nzambi solulaka ti Satana. Nzambi kele ya kukuka, yo yina yandi lendaka kuvanda ve ti kima mosi ya mbi na kati na yandi yina yandi vandaka kusolula ti yo. (Kulonga 32:4; Yobi 2:1-6) Mutindu mosi, Satana mekaka Yezu yina ke vandaka ve ti masumu. (Matayo 4:8-10; 1 Yoane 3:5) Yo yina Biblia ke monisaka nde Diabulu kele mpenza muntu ya kieleka, kansi ve kima mosi na bantima ya bantu yina ke pusaka bo na kusala mambu ya mbi.

 Keti beto fwete yituka mpila bantu mingi ke ndimaka ve nde Diabulu kele mpenza? Ata fioti ve. Sambu Biblia ke tuba nde Satana ke kusaka bantu sambu na kulungisa luzolo na yandi. (2 Batesalonika 2:9, 10) Mu mbandu sambu na kukusa bantu bo zaba ve nde yandi kele mpenza, yandi ke sadilaka mayele mosi ya kuluta mbi: yandi ke fikaka bo meso.—2 Bakorinto 4:4.

Mambu mingi ya bantu ke tubaka sambu na Diabulu

  Mambu ya bantu ke tubaka: Lisifere kele zina ya nkaka ya Diabulu.

 Kieleka: Ngogo ya Kiebreo yina Babiblia ya nkaka ke balulaka nde “Lisifere” ke tendula “muntu ya ke pesaka nsemo.” (Yezaya 14:12) Baverse ya kele na ntwala mpi na nima ya verse yai ke monisa nde mambu yai ke tadila bantotila ya Babilone yina landanaka mpi yina Nzambi zolaka kupesa nsoni sambu na lulendo na bo. (Yezaya 14:4, 13-20) Biblia ke sadila bangogo yai “muntu ya ke pesaka nsemo,” sambu na kuvweza kimfumu ya Babilone na nima ya kubwa na yo.

  Mambu ya bantu ke tubaka: Nzambi ke sadilaka Satana sambu na kumeka bantu.

 Kieleka: Diabulu kele mbeni ya Nzambi, kansi ve nsadi na yandi. Satana Diabulu ke teleminaka mpi ke kusilaka bansadi ya Nzambi makambu.—1 Piere 5:8; Kusonga 12:10.