NTANGU Yezu vandaka na ntoto, yandi landaka mbote-mbote bikalulu ya Tata na yandi ya zulu mpi mutindu na yandi ya kusala mambu. Yandi tubaka nde: “Mono ke salaka ata kima mosi ve na mabanza na mono mosi; kansi mono ke tuba mambu yai mutindu Tata longaka mono . . . mono ke salaka ntangu yonso mambu yina ke pesaka yandi kiese.” (Yoane 8:28, 29; Bakolosai 1:15) Yo yina, kana beto tadila mutindu yandi vandaka kusadila bankento mambu mpi mutindu yandi vandaka kutadila bo, beto ta bakisa mpi mutindu Nzambi ke tadilaka bankento mpi mutindu yandi ke zolaka nde bantu kusadila bo mambu.

Bantu mingi ya mayele ya ke longuka mambu ya Biblia ke ndimaka mpi nde mutindu Yezu vandaka kutadila bankento swaswanaka mpenza ti mutindu bantu vandaka kutadila bo na ntangu yina bo vandaka kusonika Baevanzile. Na nki mutindu? Diaka, keti malongi na yandi ke landa kaka kupesa bankento lukumu, luzitu mpi kimpwanza mingi tii bubu yai?

Yezu vandaka ve ti bangindu ya mbi sambu na bankento to bangindu ya kuvukisa nitu ti bo. Bamfumu ya nkaka ya dibundu ya Bayuda vandaka kutuba nde kana bakala ke lutisa ntangu mingi ti nkento, nsuka-nsuka yandi ta wa nzala ya ngolo ya kuvukisa nitu ti yandi. Sambu bo vandaka kutadila bankento bonso bantu yina lendaka kubwisa babakala na disumu, bo vandaka kupesa bo ve nzila ya kusolula ti babakala na bisika ya bantu mingi to kubasika kukonda kufika luse na bo. Kansi, Yezu pesaka babakala ndongisila ya kuyala banzala na bo ya nitu mpi ya kupesa bankento lukumu mpi luzitu na kisika ya kubuyisa bo na kuvanda kisika mosi ti babakala.—Matayo 5:28.

Yezu tubaka mpi nde: “Konso muntu yina me fwa makwela ti nkento na yandi mpi me kwela nkento ya nkaka, yandi me sala bizumba na meso na yandi.” (Marko 10:11, 12) Nkutu yandi vandaka kubuya malongi ya bamfumu ya Bayuda yina vandaka kupesa babakala nzila ya kufwa makwela ti bankento na bo “sambu na konso kikuma.” (Matayo 19:3, 9) Yezu tubaka nde kana bakala me fwa makwela ti nkento na yandi kukonda kikuma ya mbote mpi me kwela nkento ya nkaka, yandi me sala bizumba na meso ya nkento na yandi. Dilongi yai vandaka kima ya mpa sambu na Bayuda mingi. Nkutu bamfumu na bo vandaka kulonga nde kana bakala me vukisa nitu ti nkento ya nkaka, pana yandi me sala ve ata fioti bizumba na meso ya nkento na yandi. Kansi kana nkento muntu me vukisa nitu ti bakala ya nkaka, pana yandi me sala bizumba! Muntu mosi ya ke longukaka mambu ya Biblia ke tuba mambu yai: “Yezu me pesa bankento lukumu mutindu yandi me monisa nde kana bakala me vukisa nitu ti nkento ya nkaka, yandi me sala mpi bizumba.”

Mfunu ya malongi ya Yezu bubu yai: Na dibundu ya Bambangi ya Yehowa, bankento ti babakala ke vukanaka kisika mosi na balukutakanu ya dibundu. Kansi bankento yango ke bangaka ve nde bampangi-babakala ta tadila bo na mutindu ya mbi to nde bo ta kuma ti bangindu ya kuvukisa nitu ti bo, sambu bo ke zabaka nde bampangi-babakala ke tadilaka “bankento yina kele bambuta bonso bamama, baleke ya bankento bonso bampangi ya bankento ti mabanza ya bunkete kibeni.”—1 Timoteo 5:2.

Yezu vandaka kubaka ntangu ya kulonga bankento. Yezu vandaka ve bonso bamfumu ya dibundu ya Bayuda yina vandaka kuzola nde bankento kuzaba ve mambu mingi ya nkaka. Yandi vandaka kulonga bo mpi yandi vandaka kupesa bo nswa ya kupesa mpi bangindu na bo. Mutindu Yezu buyaka ve nde Maria kuwa malongi na yandi, yandi monisaka nde nkento fwete kudipesa kaka ve na bisalu ya nzo. (Luka 10:38-42) Marta, mpangi ya Maria ya nkento, vandaka kubaka mpi mambote ya malongi ya Yezu. Yandi monisaka yo na bamvutu ya mayele yina yandi pesaka Yezu na nima ya lufwa ya Lazare.—Yoane 11:21-27.

Yezu vandaka kubaka bangindu ya bankento na valere. Na ntangu yina, Bayuda mingi ya bankento vandaka kuyindula nde sambu nkento kuvanda na kiese, yandi fwete buta mwana ya bakala ya lukumu to mpi yina kele profete. Ntangu nkento mosi songaka Yezu na ndinga ya ngolo nde: “Kiese na divumu yina nataka nge!” Yezu sadilaka dibaku yina sambu na kusonga yandi kima mosi ya mfunu mingi. (Luka 11:27, 28) Yezu monisaka nde sambu bankento kuvanda na kiese mingi, kima ya mfunu ya bo fwete sala kele kulemfukila Nzambi kansi ve kaka kubuta mwana mutindu Bayuda mingi vandaka kuyindula.—Yoane 8:32.

Mfunu ya malongi ya Yezu bubu yai: Na balukutakanu ya Bambangi ya Yehowa, bampangi-babakala yina ke longaka ke ndimaka na kiese yonso bamvutu yina bankento ke pesaka. Bo ke zitisaka bankento yina kele bambuta sambu bo ke vandaka “balongi ya mambu ya mbote” yo vanda ntangu bo kele bo mosi mpi na mbandu ya bo ke pesaka. (Tito 2:3) Bo ke tudilaka bo ntima na yina me tala kisalu ya kulonga nsangu ya mbote ya Kimfumu ya Nzambi.—Nkunga 68:11; tala lupangu “ Keti Ntumwa Polo Buyisaka Bankento na Kutuba?” na lutiti 9.

Yezu vandaka kudiyangisa sambu na bankento. Na ntangu ya ntama, bo vandaka kubaka bana ya babakala na valere mingi kuluta bana ya bankento. Yai kele mpi mambu ya mukanda Talmud ke tuba: “Kiese na muntu yina me buta bana ya babakala kansi mawa na muntu yina me buta bana ya bankento.” Sambu na bibuti ya nkaka, kuvanda ti mwana ya nkento vandaka kizitu mosi ya nene sambu yo vandaka kulomba nde bo sosila yandi bakala mpi kufutila yandi mbongo ya makwela. Diaka, bo vandaka kutula ve ntima nde yandi ta sadisa bo ntangu bo ta nuna.

Yezu monisaka nde luzingu ya mwana ya nkento vandaka mfunu mingi kaka bonso ya mwana ya bakala ntangu yandi futumunaka mwana ya Yairusi ya nkento kaka mutindu yandi futumunaka mwana-bakala ya mufwidi ya Naini. (Marko 5:35, 41, 42; Luka 7:11-15) Na nima ya kubelula nkento mosi ya vandaka ti “mpeve ya mbi yina pesaka yandi maladi tuka bamvula 18,” Yezu bingaka yandi “mwana ya Abrahami.” Bangogo yai zabanaka mpenza ve na mikanda ya Bayuda. (Luka 13:10-16) Mutindu Yezu sadilaka bangogo yai ya ke monisa luzitu mpi zola, yandi monisaka nde nkento yango vandaka mfunu mingi bonso bantu yonso ya nkaka mpi nde yandi vandaka ti kundima ya ngolo.—Luka 19:9; Bagalatia 3:7.

Mfunu ya malongi ya Yezu bubu yai: Kingana mosi ya Asie ke tubaka nde: “Kusansa mwana ya nkento kele bonso kulosila kilanga ya muntu ya nkaka masa.” Batata yina kele Bakristu ke landaka ve ata fioti bangindu ya mutindu yai. Bo ke sansaka na zola mpenza bana na bo yonso, yo vanda ya babakala to ya bankento. Bibuti yina kele Bakristu ke salaka ngolo sambu bana na bo yonso, ya babakala ti ya bankento, kutanga na nzo-nkanda ya mbote mpi bo baka lusansu ya mbote.

Yezu vandaka kutudila bankento ntima. Na batribinale ya Bayuda, kana bankento bantu kele batemwe ya mambu, bo vandaka kutadila mambu ya bo vandaka kutuba kaka mpila mosi ti mambu yina bampika vandaka kutuba. Josèphe, muntu mosi ya istware ya mvu-nkama ya ntete, tubaka nde: “Yo kele ve mfunu na kutudila bankento ntima sambu bo kele bankento.”

Yezu swaswanaka mpenza ti bantu yai, yandi ponaka bankento na kuvanda batemwe ya lufutumuku na yandi. (Matayo 28:1, 8-10) Bantumwa ndimaka na mpasi mambu ya bankento yai ya vandaka kukangama na Nzambi tubaka ata bo bantu monaka mutindu bo fwaka mpi mutindu bo zikaka Mfumu na bo. (Matayo 27:55, 56, 61; Luka 24:10, 11) Kansi mutindu Yezu monanaka ntete-ntete na bankento ntangu yandi futumukaka, yandi monisaka nde yo me fwana nde bankento kuta kimbangi [kuvanda batemwe na yandi] kaka bonso balongoki na yandi ya nkaka.—Bisalu 1:8, 14.

Mfunu ya malongi ya Yezu bubu yai: Na mabundu ya Bambangi ya Yehowa, babakala yina ke vandaka ti mikumba ke monisilaka bankento luzitu ntangu bo ke ndimaka mpi bangindu na bo. Babakala yina kele Bakristu, ke ‘pesaka lukumu’ na bankento na bo ntangu bo ke widikilaka bo na dikebi ya mingi.—1 Piere 3:7; Kuyantika 21:12.

Kana babakala ke landa mbandu ya Kristu, bo ke kumaka kupesa bankento luzitu mpi kimpwanza mutindu Nzambi vandaka kuzola ntete banda na luyantiku nde bo sadila bankento mambu. (Kuyantika 1:27, 28) Babakala yina kele Bakristu ke landaka ve bangindu ya kutuba nde babakala ke vandaka mfunu mingi kuluta bankento. Kansi bo ke landaka minsiku ya Biblia yina ke salaka nde bankento na bo kuvanda na kiese.—Baefezo 5:28, 29.

Ntangu Yelena yantikaka kulonguka Biblia, bakala na yandi vandaka kuniokula yandi ngolo. Mambu yango vandaka kupesa yandi mpasi na ntima. Bakala na yandi yelaka na kisika yina babakala vandaka kukanga na ngolo bankento yina bo ke zola kubala mpi kunata bo na kisika ya nkaka sambu na kuniokula bo. Yelena ke tuba nde: “Mambu yina mono longukaka na Biblia pesaka mono kikesa. Mono bakisaka nde kele ti muntu mosi ya ke zolaka mono mingi, ya ke bakaka mono na valere mpi ya ke kudiyangisaka sambu na mono. Mono bakisaka mpi nde kana bakala na mono me longuka Biblia, yandi lenda soba mutindu na yandi ya kusadila mono mambu.” Nsuka-nsuka, mambu yina yandi vandaka kuzola lunganaka. Bakala na yandi ndimaka kulonguka Biblia, yandi bakaka mbotika mpi yandi kumaka Mbangi ya Yehowa. Yelena ke tuba diaka nde: “Yandi me kumaka ti kudiyala ya ngolo mpenza mpi beto me kumaka kulolulana na ntima ya mvimba.” Yelena ke sukisa nde: “Minsiku ya Biblia me sadisaka mono mpenza na kubakisa nde mono kele mfunu mpi yo me sadisaka mono na kudiwa na lutaninu na makwela na mono.”—Bakolosai 3:13, 18, 19.

Bantu ya nkaka mpi me kutanaka ti mambu yai ya Yelena kutanaka na yo. Bambangi ya Yehowa mingi ya bankento ke vandaka na kiese sambu bo ti babakala na bo ke salaka bikesa ya kusadila minsiku ya Biblia na mabala na bo. Ntangu bankento ke kwendaka na balukutakanu, bampangi na bo Bakristu, ke zitisaka bo, ke pesaka bo kikesa mpi kimpwanza.—Yoane 13:34, 35.

Beto Bakristu, yo vanda ya babakala to ya bankento beto ke zabaka nde beto yonso kele bantu ya masumu mpi ya kukonda kukuka mpi nde beto kele na kati ya bima yina Nzambi salaka yina “bo kumisaka . . . kima ya mpamba.” Kansi kana beto ke kwenda pene-pene ya Yehowa, Nzambi mpi Tata na beto ya zola, beto ke kumaka ti kivuvu ya ‘kukatuka na kimpika ya disumu mpi ya lufwa’ mpi ya ‘kubaka kimpwanza ya nkembo ya bana ya Nzambi.’ Yai kele kibeni luzingu ya kitoko yina Nzambi ke sila babakala mpi bankento ya ke lemfukilaka yandi!—Baroma 8:20, 21.