Masolo ya Bansamuni ya Kimfumu

Yandi Kumaka Kuzinga na Kiese

YEZU tubaka nde yandi me zaba mameme na yandi. (Yoane 10:14) Balongoki ya Yezu ke kangamaka ti muntu mosi, kana bo me mona nde muntu yango kele ntima-mbote, kana yandi ke zolaka ngemba mpi mambu ya mbote. Muntu yango ke kumaka kuzinga na kiese. Yai mambu ya kuminaka nkento mosi ya insi Belgique. Yai disolo na yandi:

“Ntangu Bambangi ya Yehowa kokulaka na porte na mono, mono vandaka kudiyangisa mingi mpi mono vandaka nkutu kusosa kudifwa. Mono sepelaka mingi ti mambu yina bo tubaka sambu na nsuka ya bampasi ya nsi-ntoto yai ya mbi. Kansi mono sepelaka ve mpila bo tubaka nde Nzambi muntu ta manisa bampasi yango. Bamvula nana ya mvimba, mono vandaka diaka ve kukwenda na eglize sambu mono vandaka kusepela ve ti mambu ya luvunu ya mono vandaka kumona kuna. Kansi mono bakisaka nde mambu yina Bambangi ya Yehowa songaka mono vandaka ya kieleka mpi nsuka-nsuka mono bakisaka nde beto lenda zinga ve ata fioti kukonda Nzambi.

“Diambu ya mawa kele nde, Bambangi ya Yehowa kwisaka kutala mono mbala fioti mpamba mpi na nima bo vandaka kukwisa diaka ve. Mono kumaka kudiyangisa mingi. Mono vandaka kunwa bapake zole ya makaya na kilumbu mpi mono yantikaka kusadila bima ya ke lawusaka. Mono kudikotisaka na bisalu ya bampeve ya mbi sambu mono vandaka ti nzala ya kusolula ti nkaka na mono ya bakala yina fwaka. Na mpimpa mono vandaka kuwa boma mingi kibeni kana mono kele mono mosi, sambu mbala mingi bademo vandaka kunwanisa mono! Mambu yai salaka bangonda mingi. Konso nkokila kana mono me yindula nde mono ta lala mono mosi, mono vandaka kuwa boma mingi.

“Kilumbu mosi, mono kwendaka kutambula. Mono lutaka na nzila ya nkaka kansi ve na nzila yina mono vandaka ti kikalulu ya kuluta. Mono kumaka na shantie mosi ya nene yina bo vandaka kusala bisalu ya kutunga. Mono yitukaka mingi na kumona bantu mingi na kisika yango. Ntangu mono pusaka pene-pene, mono bakisaka nde bantu yango vandaka Bambangi ya Yehowa yina vandaka kutunga Nzo mosi ya Kimfumu. Mono yibukaka Bambangi ya Yehowa yina vandaka kukwisa kutala mono mpi mono kuditubilaka nde yo zolaka kuvanda mbote kibeni kana bantu yonso na ntoto ya mvimba vandaka kuzinga bonso bo.

“Mono vandaka kuzola mpenza nde Bambangi ya Yehowa kukwisa kutala mono diaka. Yo yina, mono solulaka ti bankaka na kati ya bayina vandaka kutunga Nzo yina ya Kimfumu. Mono sambaka Nzambi mpi bilumbu kumi na nima, bakala yina kutanaka ti mono na mbala ya ntete kwisaka na nzo na mono. Yandi tubaka nde beto landa kulonguka Biblia mpi mono ndimaka na kiese mpenza. Yandi bingisaka mono mbala mosi na balukutakanu yina vandaka kusalama na Nzo ya Kimfumu mpi mono kwendaka. Mambu ya mono monaka kuna, yitukisaka mono mingi kibeni! Banda ntama, mono vandaka kusosa bantu yina ke zolanaka mpi yina ke zingaka na kiese. Bo vandaka kibeni bantu ya mono vandaka kusosa!

“Na nima, mono kumaka kukwenda na balukutakanu yonso. Bamposo tatu na nima, mono yambulaka kikalulu na mono ya mbi ya kunwa makaya. Mono losaka mikanda yina mono vandaka ti yo, disongidila mikanda ya bantu ya ke sadilaka bambwetete sambu na kuzabisa mambu yina ta salama na bilumbu ke kwisa mpi mono losaka badiske na mono ya miziki yina vandaka ti mambu ya Satana na kati. Banda pana, malembe-malembe bademo vandaka diaka ve kuyangisa mono. Mono kumaka kuzitisa minsiku ya Yehowa yina kele na Biblia mpi bangonda tatu na nima, mono yantikaka kulonga nsangu ya mbote. Bangonda sambanu na nima, mono bakaka mbotika. Bilumbu zole na nima ya mbotika na mono, mono kumaka mupasudi-nzila nsadisi.

“Mono ke pesa Yehowa mersi sambu na mambu yonso ya mbote ya yandi me salaka sambu na mono. Luzingu na mono me kumaka na kiese bubu yai. Ya kieleka, zina ya Yehowa kele nzo-zulu ya ngolo, kisika ya mono ke tinaka mpi ke bakaka lutaninu. (Bingana 18:10) Mono ke kudiwa mpenza bonso muntu yina sonikaka mambu yai ya kele na Nkunga 84:10: ‘Kilumbu mosi na bibansala na nge kele mbote kuluta bilumbu funda na kisika ya nkaka! Mono me [pona] kutelama na munoko ya nzo ya Nzambi na mono na kisika ya kuzinga na batenta ya bantu ya mbi.’ ”

Nkento yai ya kudikulumusa kumaka kuzinga na kiese. Bantu yonso ya ntima-mbote yina ke sosaka Yehowa, lenda kuma mpi kuzinga na kiese.