Kwenda na mambu ke na kati

Kwenda na tansi ya malongi

 APPENDICE

Mutindu ya Kusadila Muntu Yina Bo Me Basisaka na Dibundu Mambu

Mutindu ya Kusadila Muntu Yina Bo Me Basisaka na Dibundu Mambu

Kana bo mebasisa mpangi to nduku mosi na dibundu sambu yandi salaka disumu kukonda kubalula ntima, yo kepesaka beto mpasi mingi mpenza. Mambu yina beto kesalaka sambu na kuzitisa lutwadisu ya Biblia ya ketadila dyambu yai lenda monisa mudindu ya zola na beto sambu na Nzambi mpi ya kwikama na beto na ngidika yai. * Beto tadila ndambu ya bangyufula yina dyambu yai kebasisaka.

Inki mutindu beto fwete baka muntu yina bo mebasisa na dibundu? Biblia ketuba nde: “Beno lenda vukana ve ti muntu yina ke tubaka nde yandi kele mukristo, kansi yandi ke salaka pite, to yandi ke vandaka na nzala ya kuvanda na konso kima yina, to yandi ke sambaka biteki, to ke fingaka bantu ya nkaka, to ke laukaka malafu, to ke yibaka. Beno dia mpi ve kisika mosi ti muntu ya mutindu yina.” (1 Korinto 5:11) Sambu na konso muntu yina “ke bikisa malongi ya Kristo,” beto ketanga nde: “Beno kuyamba yandi ve. Beno kupesa yandi mpi mbote ve. Sambu konso muntu yina me pesa yandi mbote [na Kigreki, khaiʹro], yandi mpi me vukana na yandi na bisalu na yandi ya mbi.” (2 Yoane 9-11) Beto kevandaka ve ti bangwisana ya kimpeve mpi kesalaka ve kinduku ti bantu yina bo mebasisaka na dibundu. Nzozulu ya Nkengi ya Kifalansa ya Desembri 15, 1981, lutiti 23, kutubaka nde: “Beto mezaba nde ‘mbote’ ya mpamba lenda vanda kitambi ya ntete yina kenataka na disolo mpi mbala yankaka na kusala kinduku. Keti beto tazola kusala kitambi yina ya ntete ti muntu yina bo mebasisaka na dibundu?”

Keti yo kele mpenza mfunu na kubuya bangwisana yonso? Ee, sambu na bikuma mingi. Ya ntete, yo kele dyambu ya ketadila kwikama na beto na Nzambi mpi na Ndinga na yandi. Beto kelemfukilaka Yehowa kaka ve kana yo kele pete kansi mpi kana kusala mutindu yina kele mpasi mingi. Zola na beto sambu na Nzambi kepusaka beto na kulemfuka na bansiku na yandi yonso, sambu beto kezabaka nde yandi kele Nzambi ya lunungu mpi ya zola mpi nde bansiku na yandi kenatilaka beto mambote ya nene. (Yezaya 48:17; 1 Yoane 5:3) Ya zole, kana beto kebikala ntama ti nsumuki yina mebalula ve ntima, yo tatanina beto mosi mpi dibundu na mvindu ya kimpeve ti  ya mabanza, mpi yo tasadisa beto na kunwanina lukumu ya mbote ya dibundu. (1 Korinto 5:6, 7) Ya tatu, lukanu na beto ya ngolo ya kukotila minsiku ya Biblia lenda natila nkutu muntu yina bo mebasisaka na dibundu mambote. Na kupesaka maboko na desizio ya komite ya kusambisa, beto lenda simba ntima ya nsumuki yina kusalaka ve ata kima mosi na bikesa yina bankuluntu kusalaka sambu na kusadisa yandi. Kana yandi mevidisa bangwisana ya mfunu ti bantu yina yandi vandaka kuzola mingi, yo lenda sadisa yandi na “kuyindula luzingu na yandi” mpi kumona bunene ya mbi na yandi mpi kubaka lukanu ya kuvutukila Yehowa.Luka 15:17.

Beto tasala inki kana bo mebasisa muntu ya dibuta na beto na dibundu? Kana yo kele mutindu yina, bangwisana ya ngolo yina kevandaka na kati ya bantu ya dibuta mosi lenda tula mpenza kwikama na beto na kumekama. Inki mutindu beto fwete baka muntu ya dibuta na beto ya bo mebasisa na dibundu? Beto lenda tubila ve awa mambu yonso yina lenda basika, kansi bika beto tadila mambu zole ya mfunu.

Mbandu ya ntete: beto lenda landa na kuzinga nzo mosi ti muntu ya dibuta na beto yina bo mebasisa na dibundu. Sambu kubasika na yandi na dibundu kefwa ve bangwisana ya dibuta, beto lenda landa na kusala kumosi bisalu ya dibuta mpi kuvanda ti bangwisana yina ketadila luzingu ya konso kilumbu. Kansi, na mambu ya yandi salaka, yandi ponaka na kufwa bangwisana na yandi ya kimpeve ti bantu ya dibuta na yandi yina kele Bakristu. Yo yina, bampangi ya kwikama ya dibuta lenda vanda dyaka ve na bangwisana ya kimpeve ti yandi. Mu mbandu, kana muntu yina bo mebasisaka na dibundu kele pana, yandi lenda vukana ve na ntangu dibuta kevukana sambu na kulonguka Biblia. Kansi, kana muntu ya mebasikaka na dibundu kele mwana ya mekuma ntete ve mbuta, bibuti kele kaka ti mukumba ya kulonga mpi kupesa yandi disipline. Yo yina, bibuti ya zola lenda baka bangidika sambu na kulonguka Biblia ti mwana yina. *Bingana 6:20-22; 29:17.

Mbandu ya zole: yo lenda vanda nde mpangi yina bo mebasisa na dibundu kezinga ve nzo mosi ti dibuta. Ata yo lenda vanda mfunu na kukutana ti yandi bantangu yankaka sambu na kutadila mambu  ya mfunu ya dibuta, beto fwete sala na mpila nde beto kutanaka ve mingi ti yandi. Bantu ya kwikama ya dibuta ya Bukristu kesosaka ve bikuma sambu na kusala bangwisana ti muntu ya dibuta na bo yina bo mebasisaka na dibundu kansi ya kezingaka ve nzo mosi ti bo. Kansi, kwikama na Yehowa mpi na organizasio na yandi kepusaka bo na kuzitisa ngidika ya Biblia ya ketala kubasisa bantu na dibundu. Kwikama na bo na dyambu yai kevandaka sambu na mambote ya nsumuki mpi yo lenda sadisa yandi na kubaka mambote ya disipline yina bo pesaka yandi. *Baebreo 12:11.

^ par. 1 Minsiku ya Biblia ya ketubila bantu ya bo mebasisa na dibundu ketadila mpi bantu yina mekudikatula bo mosi na dibundu.

^ par. 2 Sambu na bansangu mingi ya ketadila bana ya baleke ya bo mebasisaka na dibundu kansi ya kelanda na kuzinga na nzo ya bibuti, tala Nzozulu ya Nkengi ya Oktobri 1, 2001, balutiti 27-28, mpi Nzozulu ya Nkengi ya Kifalansa ya Novembri 15, 1988, lutiti 20.

^ par. 3 Sambu na bansangu mingi ya ketadila mutindu ya kubaka bantu ya dibuta yina bo mebasisaka na dibundu, tala bandongisila ya Masonuku ya bo ketubila na Nzozulu ya Nkengi ya Kifalansa ya Aprili 15, 1988, balutiti 26-31, mpi ya Desembri 15, 1981, balutiti 26-31.