Kwenda na mambu ke na kati

Kwenda na tansi ya malongi

 APPENDICE

Mutindu ya Kuyidika Mambu ya Mumbongo

Mutindu ya Kuyidika Mambu ya Mumbongo

Mutindu bo mesonikaka yo na 1 Korinto 6:1-8, ntumwa Polo ketubila kufunda mpangi-Mukristu na tribinale. Yandi waka mpasi mingi sambu Bakristu yankaka ya Korinto vandaka ‘kunata mambu na bazuzi yina vandaka bakristo ve.’ (Verse 1) Polo kupesaka bikuma ya ngolo yina fwete pusa Bakristu na kunata ve bampangi na bo na tribinale ya nsi-ntoto kansi na kuyidika mambu na kati ya dibundu. Bika beto tala mwa bikuma yina kusalaka nde Polo kupesa ndongisila yai ya kupemama mpi na nima beto tatadila mwa mambu yina yo kelomba ve kusadila ndongisila yai ya kupemama.

Kana beto kewakana ve ti mpangi-Mukristu mosi na mambu ya mumbongo, beto fwete sosa ntetentete kuyidika mambu yina mutindu Yehowa kezolaka, kansi ve mutindu yina beto mosi kezola. (Bingana 14:12) Mutindu Yezu kumonisaka yo, yo kele mbote na kuyidika nswalu kukonda kuwakana na ntwala nde yo kuma nene. (Matayo 5:23-26) Kansi, yo kele mawa na kumona nde Bakristu yankaka keswanisaka bankaka ngolo mpenza, mpi nkutu bo kenataka kukonda kuwakana na bo na batribinale ya nsi-ntoto. Polo kutubaka nde: “Kana beno ke nata mambu na beno na tribinale, mpidina ke songa mpi nde beno me bela ka beno dezia.” Sambu na inki? Kikuma ya ntetentete kele nde mambu ya mutindu yai lenda bebisa lukumu ya dibundu mpi ya Nzambi yina beto kesambilaka. Yo yina, beto fwete yindula mbote ngyufula yai ya Polo: “Sambu na nki beno ke pesa bantu ya nkaka nzila ve bo sala beno mbi?”Verse 7.

Polo keyibusa mpi nde Nzambi mepesaka dibundu ngidika mosi ya mbote sambu na kuyidika kukonda kuwakana. Nzayilu na bo ya bakyeleka ya Biblia mekumisaka bankuluntu mayele, mpi Polo ketuba nde bo “lenda zenga mambu ya bakristo ya nkaka” na yina metala “mambu ya luzingu yai.” (Baverse 3-5) Yezu kumonisaka nde beto fwete yidika kukonda kuwakana ya ketadila bifu ya nene, bonso kukusila muntu makambu mpi kukusa sambu na kuyiba, na nsadisa ya ngidika mosi ya kele ti bitambi tatu: ya ntete, kusala ngolo na kuyidika dyambu yina na kingenga na kati ya bantu yina yo ketadila; ya zole, kana kitambi ya ntete kununga ve, nata temwe mosi to zole; mpi ya tatu, kana kitambi ya zole kununga ve, nata dyambu yango na dibundu, yina bankuluntu kemonisaka.Matayo 18:15-17.

 Ya kyeleka, bankuluntu kele mpenza ve bazuzi to bantu ya mumbongo mpi yo kele ve mfunu nde bo sala mambu bonso bantu yai. Bo ketulaka ve bansiku ya kemonisa mutindu ya kuyidika kukonda kuwakana na mambu ya mumbongo na kati ya bampangi. Kansi, bo kesosaka kusadisa bantu yonso yina dyambu yango ketadila na kusadila Masonuku mpi kuyidika mambu na ngemba. Na mambu ya kuluta mpasi, bo lenda lomba ndongisila na nkengi ya nzyunga to na biro ya filiale ya Bambangi ya Yehowa. Kansi, kele ti mambu yina yo kelomba ve kusadila ndongisila ya Polo. Inki kele ndambu ya mambu yango?

Bantangu yankaka, yo lenda vanda mfunu na kunata muntu na tribinale kukonda mpusa ya bwimi mpi ti lukanu ya kumanisa mambu na ngemba, sambu yo kelomba kaka kusala mutindu yina to sambu nsiku kelomba yo. Mu mbandu, kukwenda na tribinale lenda vanda ngidika mosi kaka yina kepesa nzila na kubaka mukanda ya kufwa makwela, kubaka nswa ya kutanina bana, kuzaba ntalu ya mbongo yina nsiku kelomba bakala to nkento na kufuta nkwelani na yandi na nima ya kufwa makwela, kuzwa amande ya asiranse, kuvanda na kati ya bantu yina bo fwete futa mbongo kana banki mosi mebwa, mpi kusala nde testama kuvanda ti valere na ntwala ya nsiku. Bantangu yankaka, mpangi mosi lenda mona nde yo kele mfunu na kukwenda kufunda bantu yina kufundaka yandi na tribinale sambu na kuditanina. *

Kana bo menata ve mambu yai na tribinale ti ngindu ya maswana, yo kele mpenza ve na kukonda kuwakana ti ndongisila ya kupemama ya Polo. * Ata mpidina, lukanu ya ntete ya Mukristu fwete vanda ya kusantisa zina ya Yehowa mpi ya kutanina ngemba mpi bumosi ya dibundu. Balongoki ya Kristu kezabanaka ntetentete sambu na zola na bo, mpi “muntu yina ke na kuzola . . . ke sosaka ve mambote na yandi mosi.”1 Korinto 13:4, 5; Yoane 13:34, 35.

^ par. 2 Ata yo kesalamaka mingi ve, Mukristu mosi lenda sala Mukristu yankaka dyambu mosi ya mbi mpenza—kuladisa na kingolo-ngolo, kubula ngolo mpenza, kufwa, to kuyiba kima mosi ya nene mpenza. Kana mambu ya mutindu yai kusalama, yo kefwa ve bansiku ya Bukristu na kuzabisa dyambu yina na bamfumu ya leta, ata bo lenda sambisa mpangi yina na tribinale bonso mugondi.

^ par. 3 Sambu na kuzaba mambu mingi, tala Nzozulu ya Nkengi ya Aprili 1, 1997, balutiti 14-19, mpi Nzozulu ya Nkengi ya Kifalansa ya Oktobri 15, 1991, balutiti 25-8.