Kwenda na mambu ke na kati

Kwenda na tansi ya malongi

 APPENDICE

Dibanza ya Biblia na Yina Me Tala Kufwa Makwela mpi Kukabwana

Dibanza ya Biblia na Yina Me Tala Kufwa Makwela mpi Kukabwana

Yehowa kevingilaka nde bantu yina mekwelaka kubikala ya kwikama na lusilu na bo ya makwela. Ntangu Yehowa kuvukisaka bakala mpi nkento ya ntete na makwela, yandi tubaka nde: “Bakala . . . ta kwenda kuvukana na nkento na yandi, ebuna bo zole bo ta kuma muntu mosi.” Na nima, Yezu Kristu kuvutukilaka bangogo yina mpi kuyikaka nde: “Muntu lenda kabula ve yina ya Nzambi me vukisaka.” (Kuyantika 2:24; Matayo 19:3-6) Yo yina, Yehowa ti Yezu kemonaka makwela bonso ngwisana ya luzingu ya mvimba yina kesukaka kaka kana nkwelani mosi kufwa. (1 Korinto 7:39) Sambu makwela kele ngidika mosi ya santu, beto fwete baka ve kufwa makwela bonso kima mosi ya mpamba. Na kutuba ya kyeleka, Yehowa kemengaka kufwa makwela yina kesalamaka sambu na bikuma yina kewakana ve ti Masonuku.Malashi 2:15, 16.

 Inki kele kikuma ya kufwa makwela na kutadila Masonuku? Yehowa kemengaka bizumba mpi pite. (Kuyantika 39:9; 2 Samuele 11:26, 27; Nkunga 51:6) Ya kyeleka, yandi kemonaka pite bonso kima mosi ya mbi mpenza yo yina yandi kepesaka nswa na kufwa makwela kana muntu kusala yo. (Sambu na kuzaba mambu yina pite ketadila, tala Kapu ya 9, paragrafe 7, kisika bo ketendula ngogo pite.) Yehowa kepesa nkwelani yina mesala kima ve nswa ya kupona kana yandi tabikala ti nkwelani yina mesala pite to tasosa kufwa makwela. (Matayo 19:9) Yo yina, kana nkwelani yina mesala kima ve kubaka desizio ya kusosa kufwa makwela, yandi kesala ve kima mosi ya Yehowa kemengaka. Kansi, dibundu ya Bukristu kesyamisaka ve ata muntu mosi na kusosa kufwa makwela. Ya kyeleka, mambu yankaka lenda pusa nkwelani yina mesala kima ve na kubikala ti nkwelani yina kusalaka pite, mingimingi kana yandi mebalula ntima na masonga yonso. Kansi, na nsuka bantu yina kele ti kikuma ya Masonuku ya kufwa makwela fwete baka desizio yina bo mosi mpi bo fwete ndima konso malanda yina desizio na bo lenda natila bo.Galatia 6:5.

Na ntwala ya mambu yankaka ya kuluta mpasi, Bakristu yankaka mebakaka desizio ya kukabwana to kufwa makwela ti nkwelani na yandi ata yandi salaka ve pite. Na mambu ya mutindu yai, Biblia ketuba nde nkwelani yina mekwenda “lenda kwenda kukwela” muntu yankaka ve, “kansi kana yandi zola, yandi lenda vutukila” dyaka nkwelani na yandi. (1 Korinto 7:11) Mukristu ya mutindu yai kele ve ti kimpwanza ya kusala kinduku ti muntu yankaka ti dibanza ya kukwela dyaka. (Matayo 5:32) Tala mwa mambu ya mpasi mingi yina bantu yankaka kumonaka nde yo kepesa bo nswa ya kukabwana.

Kubuya na luzolo yonso na kulungisa bampusa ya dibuta. Dibuta mosi lenda kuma na kinsukami ya ngolo mpi kukonda bima ya mfunu ya kuzingila sambu bakala kelungisa ve bampusa na bo, ata yandi lenda kuka na kusala mutindu yina. Biblia ketuba nde: “Kana muntu ke sadisa . . . bantu ya fami na yandi mosi . . . ve, yandi me vidisaka lukwikilu na yandi, yandi me luta nkutu mumpani na mbi.” (1 Timoteo 5:8) Kana muntu ya mutindu yai kebuya na kusoba bikalulu na yandi, sambu na kutanina mambote na yandi mpi ya bana na yandi, nkento lenda baka desizio ya kukwenda na leta sambu na kukabwana ti bakala na yandi na kuwakana ti nsiku. Ya kyeleka, bankuluntu fwete tula dikebi ya ngolo kana bo mefunda  Mukristu mosi nde yandi kebuya na kulungisa bampusa ya dibuta na yandi. Bo lenda basisa muntu na dibundu kana yandi kebuya na kulungisa bampusa ya dibuta na yandi.

Kubula na nku mingi mpenza. Nkwelani lenda vanda ti kikalulu ya kubula na nku mpenza nkwelani yankaka na mpila nde mavimpi mpi nkutu luzingu ya nkwelani yina kukuma na kigonsa. Kana nkwelani ya nku kele Mukristu, bankuluntu fwete zikisa kana dyambu yina kele ya kyeleka to ve. Bo lenda basisa muntu na dibundu kana yandi kewaka makasi ya kuluta mingi mpi kele ti kikalulu ya nku ya kemanaka ve.Galatia 5:19-21.

Kutula mpenza luzingu ya kimpeve na kigonsa. Mbala na mbala, nkwelani mosi lenda meka na kusala na mpila nde yo vanda mpasi sambu nkwelani yankaka kulanda na kusala lusambu ya kyeleka to nkwelani yina lenda meka nkutu kupusa yandi na kufwa bansiku ya Nzambi na mutindu mosi buna. Na ntangu ya mutindu yai, nkwelani yina kele na kigonsa lenda mona nde mutindu mosi kaka ya yandi “fweti lemfuka ntete na Nzambi, kansi na bantu ve” kele ya kukwenda na leta sambu na kulomba nde yandi kabwana ti nkwelani na yandi.Bisalu 5:29.

Na konso mbandu yina ketadila mambu ya kuluta mpasi bonso yai ya beto metubila awa, ata muntu mosi ve fwete pusa nkwelani yina mesala kima ve na kukabwana to kubikala ti nkwelani yina yankaka. Ata banduku yina kele ya kuyela na kimpeve mpi bankuluntu lenda pesa lusadisu mpi bandongisila ya kekatuka na Biblia, bo lenda zaba ve mambu yonso ya kekwendila ve na kati ya bakala ti nkento. Yehowa mpamba muntu lenda mona yo. Ya kyeleka, nkento to bakala ya Mukristu tapesa ve lukumu na Nzambi to na ngidika ya makwela kana yandi kelutisa ndilu ya bampasi yina yandi kekutana na yo na makwela na yandi kaka sambu yandi kezola kukabwana ti nkwelani na yandi. Yehowa mezaba mbote-mbote mambu yonso yina muntu keyidika sambu na kukabwana ti nkwelani na yandi, ata yandi meka na kubumba yo nki mutindu. Ya kyeleka, “bima yonso ke monikaka pwelele, ya kukonda kubumbana, na meso na yandi. Mambu yonso ya beto me salaka, beto fweti songa yo kaka na Nzambi.” (Baebreo 4:13) Kansi, kana dyambu mosi ya kuluta mpasi kemana ve, ata muntu mosi ve lenda tonga Mukristu yina mepona nsukansuka na kukabwana ti nkwelani na yandi. Nsuka-nsuka, “beto yonso, beto ta telama na meso ya Nzambi sambu yandi sambisa beto.”Roma 14:10-12.