Kwenda na mambu ke na kati

Kwenda na tansi ya malongi

 KAPU YA 18

Yezu Ke Tombuka Kansi Yoane Ke Kulumuka

Yezu Ke Tombuka Kansi Yoane Ke Kulumuka

MATAYO 4:12 MARKO 6:17-20 LUKA 3:19, 20 YOANE 3:22–4:3

  • BALONGOKI YA YEZU KE BOTIKA BANTU

  • BO ME TULA YOANE MBOTIKI NA BOLOKO

Ntangu Yezu ti balongoki na yandi me manisa kusala Nkinsi ya Paki na nsungi ya madidi ya mvu 30 ya ntangu na beto, bo me katuka na Yeruzalemi mpi me kwenda. Kansi bo me vutuka ve mbala mosi na babwala na bo na distrike ya Galilea. Bo me kwenda na insi ya Yudea mpi bo me botika bantu mingi kuna. Yoane Mbotiki vandaka mpi kubotika bantu ziku na muwanda ya Nzadi ya Yordani kiteso ya mvula mosi me luta, mpi balongoki na yandi ya nkaka vandaka kaka ti yandi.

Yezu yandi mosi botikaka ve ata muntu mosi, kansi balongoki na yandi bantu vandaka kubotika bantu na lutwadisu na yandi. Na ntangu yina, Yezu ti Yoane vandaka kulonga Bayuda yina balulaka ntima sambu na masumu na bo mutindu bo zitisaka ve kuwakana ya Nsiku ya Nzambi.—Bisalu 19:4.

Kansi, balongoki ya Yoane me wa kimpala. Bo me bokuta sambu na Yezu mpi me tuba nde: “Muntu [Yezu] yina vandaka ti nge . . . ke botika bantu mpi bantu yonso ke kwenda na yandi.” (Yoane 3:26) Kansi Yoane me wa ve kimpala. Yandi me wa kiese sambu Yezu ke sala kisalu na yandi mbote mpi yandi ke zola nde balongoki na yandi mpi kuwa kiese. Yoane me yibusa bo nde: “Beno mosi ke ta kimbangi sambu na mono nde mono tubaka nde, ‘Mono kele Kristu ve, kansi bo tindaka mono na ntwala ya muntu yina.’” Yoane me pesa mbandu sambu na kusadisa bantu yonso na kubakisa diambu yai mbote. Yandi me tuba nde: “Muntu yina ke kwela nkento kele bakala yina ke kwela. Kansi, nduku ya bakala yina ke kwela, ntangu yandi ke telama mpi ke wa yandi, yandi kele na kiese mingi sambu na ndinga ya bakala yina ke kwela. Yo yina, kiese yai ya mono kele na yo me kuma ya kulunga.”—Yoane 3:28, 29.

Bonso nduku ya muntu yina ke kwela, Yoane waka kiese bangonda mingi na ntwala ntangu yandi songaka Yezu balongoki na yandi. Balongoki na yandi ya nkaka landaka Yezu mpi na nima, Nzambi tulaka bo mafuta na nzila ya mpeve santu. Yoane ke zola mpi nde balongoki yina kele ti yandi kulanda Yezu. Ya kieleka, lukanu ya Yoane kele ya kuyidika nzila sambu na kisalu ya Kristu. Yoane me tuba nde: “Muntu yina fwete landa kutombuka, kansi mono fwete landa kukulumuka.”—Yoane 3:30.

Yoane ya nkaka, yina vandaka na kati ya balongoki ya ntete ya Yezu, sonikaka na nima na yina me tala kisika Yezu katukaka mpi mukumba na yandi ya nene ya kugulusa bantu. Yandi tubaka nde: “Muntu yina me katuka na zulu me luta bantu yonso ya nkaka. . . . Tata ke zolaka Mwana mpi yandi me pesaka bima yonso na maboko na yandi. Muntu yina ke monisa lukwikilu na Mwana kele na luzingu ya mvula na mvula; muntu yina ke lemfuka ve na Mwana ta mona ve luzingu, kansi makasi ya Nzambi kele na zulu na yandi.” (Yoane 3:31, 35, 36) Yai kele kibeni kieleka mosi ya mfunu yina bantu fwete zaba!

Yoane Mbotiki tubaka nde mukumba na yandi mpi kisalu na yandi fwete kulumuka. Bilumbu fioti na nima ya kutuba mambu yai, ntotila Erode me kanga yandi. Erode bakaka Erodiade, nkento ya mpangi na yandi Filipo, mpi kwelaka yandi. Ntangu Yoane tubaka na meso ya bantu yonso nde Erode ke sala pite, Erode tubaka nde bo tula Yoane na boloko. Ntangu Yezu me wa nde bo me kanga Yoane, yandi ti balongoki na yandi me katuka na Yudea mpi ‘me kwenda na Galilea.’—Matayo 4:12; Marko 1:14.