Kwenda na mambu ke na kati

Kwenda na tansi ya malongi

 KAPU YA 13

Baka Dilongi na Mutindu Yezu Nungaka Bampukumuna

Baka Dilongi na Mutindu Yezu Nungaka Bampukumuna

Kaka na nima ya kubaka mbotika na Yoane, mpeve ya Nzambi me nata Yezu na ntoto ya zelo na zelo ya Yudea. Yandi kele ti mambu mingi ya kuyindula. Ntangu yandi bakaka mbotika, “zulu kangukaka.” (Matayo 3:16) Mpidina, Yezu lenda yindula mambu yina yandi longukaka mpi salaka na zulu. Ya kieleka, yandi kele kibeni ti mambu mingi ya kuyindula!

Yezu salaka bilumbu 40 mpi bampimpa 40 na ntoto ya zelo na zelo. Na ntangu yina yonso, yandi diaka ve ata kima. Yo yina, ntangu Yezu waka nzala ya ngolo, Satana Diabulu kwisaka kumeka yandi mpi zabisaka yandi nde: “Kana nge kele mwana ya Nzambi, tuba na matadi yai yo kuma mampa.” (Matayo 4:3) Kansi Yezu zabaka nde yo kele mbi kana yandi sadila ngolo na yandi ya kusala bimangu sambu na kulungisa bampusa na yandi; yo yina, yandi bwaka ve na mpukumuna yina.

Kansi Diabulu yambulaka ve. Yandi sadilaka mpukumuna ya nkaka. Yandi songaka Yezu na kukatuka na zulu ya tempelo mpi na kudilosa na ntoto. Kansi Yezu buyaka kusala diambu yina ya kuyituka. Yezu vutukilaka mambu yina Masonuku ke tubaka sambu na kumonisa nde kumeka Nzambi na mutindu yina kele mbi kibeni.

Na mpukumuna ya tatu, Diabulu songaka Yezu na mutindu mosi buna “bimfumu yonso ya nsi-ntoto ti nkembo na yo,” mpi tubilaka yandi nde: “Mono ta pesa nge bima yai yonso kana nge fukama mpi nge [sambila mono mbala mosi, noti na nsi ya lutiti].” Kukonda kusukinina, Yezu buyaka diaka mpi tubaka nde: “Katuka awa, Satana!” (Matayo 4:8-10) Yandi bikaka ve nde mpukumuna yina kupusa yandi na kusala diambu ya mbi sambu yandi zabaka nde Yehowa mpamba muntu beto fwete sadila kisalu ya santu. Ya kieleka, yandi bakaka lukanu ya kubikala ya kwikama na Nzambi.

Beto lenda baka dilongi na bampukumuna yai mpi na mutindu Yezu nungaka yo. Bampukumuna yina vandaka ya kieleka mpi yo monisaka nde Diabulu kele ve ngindu ya mbi yina ke vandaka na ntima ya muntu mutindu bantu ya nkaka ke tubaka. Yandi kele muntu ya kieleka kansi yandi ke monanaka ve. Disolo yai ke monisa mpi nde baluyalu ya nsi-ntoto kele kibeni ya Diabulu; yandi muntu kele mfumu na yo. Inki kima ya nkaka ke monisa nde mutindu Satana pesaka bimfumu yina na Kristu vandaka mpukumuna ya kieleka?

Diaka, Diabulu tubaka nde kana Yezu kusambila yandi kaka mbala mosi, yandi ta pesa yandi matabisi mingi, yo vanda bimfumu yonso ya nsi-ntoto. Diabulu lenda meka beto mpi mutindu mosi. Yandi lenda tula na ntwala na beto mabaku yina lenda pukumuna beto na kubaka kimvwama, kiyeka, to lukumu ya nsi-ntoto yai. Kana beto ke landa mbandu ya Yezu na yina me tala kubikala ya kwikama na ntwala ya konso mpukumuna yina, beto ta monisa nde beto kele mayele. Kansi, yibuka nde Diabulu yambulaka Yezu “tii na ntangu ya nkaka ya mbote.” (Luka 4:13) Yandi lenda sala mpi mutindu mosi sambu na beto, yo yina beto fwete keba ntangu yonso.