Kwenda na mambu ke na kati

Kwenda na tansi ya malongi

 KAPU YA 15

Yezu Me Sala Kimangu ya Ntete

Yezu Me Sala Kimangu ya Ntete

YOANE 2:1-12

  • NKINSI YA MAKWELA NA KANA

  • YEZU ME KUMISA MASA VINU

Bilumbu tatu me luta banda Natanaele me kuma mosi ya balongoki ya ntete ya Yezu. Yezu ti balongoki na yandi ya nkaka ya ntete me kwenda na nordi ya distrike ya Galilea, bwala ya balongoki na yandi. Bo ke kwenda na Kana, bwala ya Natanaele. Mbanza ya Kana kele na bangumba, na nordi ya Nazareti, bwala yina Yezu yelaka. Bo bingisaka bo na nkinsi mosi ya makwela na Kana.

Mama ya Yezu mpi kwendaka na nkinsi yina. Sambu Maria vandaka nduku ya dibuta ya bantu yina ke kwela, yo ke monana nde yandi vandaka mpi na kati ya bantu yina vandaka kuyamba bantu. Yo yina, yandi monaka mbala mosi nde vinu me mana mpi yandi zabisaka Yezu nde: “Bo kele ti vinu ve.”—Yoane 2:3.

Ya kieleka, Maria zolaka nde Yezu kusala kima mosi mutindu vinu manaka. Yezu sadilaka mutindu mosi ya kutuba sambu na kumonisa nde yandi me buya. Yandi tubaka nde: “Nkento, diambu yai ke tadila mono ti nge na nki?” (Yoane 2:4) Sambu Yezu kele Ntotila yina Nzambi me ponaka, yo lombaka nde Tata na yandi ya zulu kutwadisa mambu yina yandi vandaka kusala kansi ve dibuta to banduku na yandi. Na mayele yonso, Maria bikisaka diambu yina na maboko ya mwana na yandi, mpi yandi zabisaka bantu yina vandaka kusala nde: “Beno sala konso diambu yina yandi ta songa beno.”—Yoane 2:5.

Kuvandaka ti mabungu sambanu yina bo vandaka kutudila masa; yo vandaka mabungu ya matadi. Konso dibungu lenda kota balitre kuluta 40. Yezu zabisaka bantu yina vandaka kusala nde: “Beno fulusa masa na mabungu yina.” Bo fulusaka yo. Na nima, Yezu songaka bo nde: “Ntangu yai beno baka ndambu mpi beno nata yo na ntwadisi ya nkinsi.”—Yoane 2:7, 8.

Ntwadisi ya nkinsi yitukaka sambu vinu yina vandaka ya kitoko, kansi yandi zabaka ve nde bo salaka kima mosi ya kuyituka sambu na kusala yo. Yandi bingaka bakala yina ke kwela mpi songaka yandi nde: “Bantu yonso ke pesaka ntete vinu ya mbote, mpi kana bantu me lawuka, bo ke pesaka vinu ya mbote mingi ve. Nge me bumba vinu ya mbote tii ntangu yai.”—Yoane 2:10.

Yai kimangu ya ntete yina Yezu salaka. Ntangu bantu yina katukaka kukuma balongoki na yandi monaka kimangu yai, lukwikilu na bo sambu na yandi kumaka ngolo. Na nsuka ya nkinsi, Yezu, mama na yandi, mpi baleke na yandi ya babakala kwendaka na Kapernaumi, na nordi ya dibungu ya Nzadi-Mungwa ya Galilea.