Kwenda na mambu ke na kati

Kwenda na tansi ya malongi

 KAPU YA 4

Maria Me Baka Divumu Kansi Yandi Me Kwela Ntete Ve

Maria Me Baka Divumu Kansi Yandi Me Kwela Ntete Ve

MATAYO 1:18-25 LUKA 1:56

  • YOZEFI ME ZABA NDE MARIA KELE TI DIVUMU

  • YOZEFI ME KWELA MARIA

Divumu ya Maria me lungisa bangonda iya. Yibuka nde yandi lutisaka bangonda ya ntete ya divumu na yandi na nzo ya mpangi na yandi Elizabeti, na sudi ya bangumba ya Yudea. Kansi ntangu yai, yandi me vutuka na Nazareti. Kubika fioti, bantu mingi ta zaba nde yandi kele ti divumu. Diambu yai ke yangisa yandi kibeni!

Diambu ya mpasi kibeni kele nde Yozefi, muntu mosi ya bwala na yandi ya ke salaka kisalu ya mabaya silaka yandi na makwela. Diaka, yandi ke zaba nde Nsiku yina Nzambi pesaka bantu ya Izraele vandaka kutuba nde kana bakala me sila nkento na makwela kansi nkento yina me vukisa nitu ti bakala ya nkaka na luzolo, bo fwete fwa yandi na matadi. (Kulonga 22:23, 24) Yo yina, ata Maria vandaka me zaba ntete ve bakala, ziku yandi vandaka kudiyula nki mutindu yandi ta zabisa Yozefi nde yandi kele ti divumu mpi nki ta salama.

Maria lutisaka bangonda tatu kisika ya nkaka, yo yina beto lenda ndima nde Yozefi vandaka na mpusa ya ngolo ya kumona yandi. Ntangu bo me kutana, ziku Maria me zabisa yandi nde yandi kele ti divumu. Maria me sala yonso sambu na kutendudila yandi nde yandi me baka divumu yina na ngolo ya mpeve santu. Kansi, yo kele mpasi nde Yozefi kubakisa diambu yai mpi kundima yo.

Yozefi ke zaba nde Maria kele nkento ya mbote mpi yandi kele ti bikalulu ya mbote. Diaka, yandi vandaka kuzola Maria mingi. Kansi, ata Maria zabisaka yandi mambu mutindu yo salamaka, Yozefi yindulaka nde Maria bakaka divumu na bakala ya nkaka. Yozefi zolaka ve nde bo fwa Maria na matadi to bo pesa yandi nsoni na meso ya bantu, yo yina yandi bakaka dibanza ya kufwa makwela ti yandi na kinsweki. Na ntangu yina, kana bantu me sala lusilu nde bo ta kwelana, bo vandaka kubaka  bo bonso bankwelani. Yo yina, sambu na kuzenga bangwisana yina yo vandaka kulomba kufwa makwela.

Na nima, ntangu Yozefi ke landa kuyindula mambu yai, mpongi me baka yandi. Wanzio ya Yehowa me kwisa kubasikila yandi mpi me zabisa yandi nde: “Kuwa boma ve na kukwela Maria sambu yandi me baka divumu yina na ngolo ya mpeve santu. Yandi ta buta mwana-bakala, mpi nge fwete pesa yandi zina Yezu, sambu yandi ta gulusa bantu na yandi na masumu na bo.”—Matayo 1:20, 21.

Ntangu Yozefi me telama, yandi kele na kiese kibeni mutindu yandi me bakisa diambu yai mbote-mbote. Yandi me sukinina ve na kusala mambu yina wanzio me songa yandi. Yandi me kotisa Maria na nzo na yandi. Ya kieleka, mutindu Yozefi me kotisa Maria na nzo me monisa na bantu yonso nde makwela me salama, mpi nde Yozefi ti Maria me kuma ntangu yai bankwelani. Ata mpidina, Yozefi me vukisa ve nitu ti Maria ntangu yandi kele ti divumu ya Yezu.

Mwa bangonda na nima, Yozefi ti Maria yina divumu me kuma nene, me yilama sambu na kuyambula bwala na bo Nazareti mpi kusala nzietelo ya nda. Na wapi bo ke zola kukwenda ntangu yai ya Maria me kuma pene-pene ya kubuta?