Kwenda na mambu ke na kati

Kwenda na tansi ya malongi

 KAPU YA 3

Muntu Yina Fwete Yidika Nzila Me Butuka

Muntu Yina Fwete Yidika Nzila Me Butuka

LUKA 1:57-79

  • YOANE MBOTIKI ME BUTUKA MPI BO ME PESA YANDI ZINA

  • ZEKARIA ME TUBILA KISALU YINA YOANE TA SALA

Elizabeti me kuma pene-pene ya kubuta. Mpangi na yandi Maria me zinga ti yandi bangonda tatu. Kansi sesepi yai, Maria ke zola kusala nzietelo ya nda sambu na kuvutuka na bwala na yandi Nazareti na nordi ya bangumba ya Yudea. Kiteso ya bangonda sambanu na nima, yandi mpi ta buta.

Maria me kwenda ebuna ntangu fioti na nima, Elizabeti me buta. Yo kele kibeni kiese na kumona nde Elizabeti me buta kukonda mpasi mpi yandi ti mwana na yandi kele na mavimpi ya mbote! Ntangu Elizabeti me songa mwana na yandi na bampangi na yandi mpi na bantu yina ke zingaka pene-pene ti yandi, bo yonso me yangalala.

Nzambi pesaka bantu ya Izraele nsiku nde kana nkento me buta mwana-bakala, bo fwete yotisa yandi na kilumbu nana; mpi bo fwete pesa yandi zina kaka kilumbu yina. (Levi 12:2, 3) Bantu ya nkaka tubaka nde bo fwete pesa mwana yina zina ya tata na yandi. Kansi Elizabeti tubaka na ndinga ya ngolo nde: “Ve! kansi zina na yandi Yoane.” (Luka 1:60) Yibuka nde, wanzio Gabriele tubaka nde bo fwete pesa mwana yina zina Yoane.

Kansi, bampangi na bo mpi bantu yina vandaka kuzinga pene-pene ti bo buyaka, bo tubaka nde: “Ata muntu mosi ve ya dibuta na nge kele ti zina yai.” (Luka 1:61) Bo salaka bidimbu sambu na kuyula Zekaria zina yina yandi ke zola kupesa mwana na yandi. Yandi lombaka dibaya mpi sonikaka nde: “Zina na yandi Yoane.”—Luka 1:63.

Na mbala mosi, Zekaria yantikaka diaka kutuba. Yibuka nde yandi vandaka diaka ve kutuba banda ntangu yandi ndimaka ve mambu yina wanzio tubaka, nde Elizabeti ta buta mwana. Yo yina ntangu Zekaria me tuba, bantu yina ke zingaka pene-pene ti bo me yituka mpi bo me kudiyula nde: “Mwana yai ta vanda nani?” (Luka 1:66) Bo monaka diboko ya Nzambi mutindu Zekaria ti Elizabeti pesaka Yoane zina.

Na nima, Zekaria fulukaka ti mpeve santu mpi tubaka nde: “Bika bo kumisa Yehowa, Nzambi ya  Izraele, sambu yandi me tudila bantu na yandi dikebi mpi me gulusa bo. Mpi yandi me basisila beto kibongo ya luguluku na nzo ya Davidi nsadi na yandi.” (Luka 1:68, 69) Ntangu Zekaria sadilaka bangogo “kibongo ya luguluku,” yandi vandaka kutubila Mfumu Yezu, yina zolaka kubutuka. Na nzila na yandi, Zekaria tubaka nde, “na nima ya kugulusa beto na maboko ya bambeni, [Nzambi] ta pesa beto dibaku ya kusadila yandi kisalu ya santu kukonda boma ti kwikama mpi lunungu na ntwala na yandi bilumbu na beto yonso.”—Luka 1:74, 75.

Na yina me tala mwana na yandi, Zekaria ke tuba nde: “Nge, mwana ya fioti, bo ta binga nge mbikudi ya Muntu ya Kuluta Zulu, sambu nge ta kwenda na ntwala ya Yehowa sambu na kuyidika banzila na yandi, sambu na kupesa bantu na yandi nzayilu ya luguluku na nzila ya ndolula ya masumu na bo, sambu na mawa ya nene ya Nzambi na beto. Sambu na mawa yai, beto ta mona nsemo ya me katuka na zulu yina ke sema bonso mwini ya suka-suka, sambu na kupesa nsemo na bantu yina me vanda na mpimpa mpi na kivudi ya lufwa mpi sambu na kunata makulu na beto na nzila ya ngemba.” (Luka 1:76-79) Mbikudulu yai ke pesa kibeni kikesa!

Ntangu yai Maria, yina vandaka me kwela ntete ve, kumaka na bwala na yandi Nazareti. Inki ta kumina yandi ntangu bantu ta zaba nde yandi kele na divumu?