Kwenda na mambu ke na kati

Kwenda na tansi ya malongi

 KAPU YA 10

Dibuta ya Yezu Ke Kwenda na Yeruzalemi

Dibuta ya Yezu Ke Kwenda na Yeruzalemi

LUKA 2:40-52

  • YEZU KELE TI BAMVULA 12 MPI KE YULA BALONGI BANGIUFULA

  • YEZU KE BINGA YEHOWA “TATA NA MONO”

Beto kele na nsungi ya madidi. Dibuta ya Yozefi, banduku na bo mpi bampangi na bo ke sala nzietelo yina bo ke salaka konso mvula sambu na kukwenda na Yeruzalemi. Bo ke kwenda na Yeruzalemi sambu na kusala nkinsi ya Paki mutindu Nsiku vandaka kutuba. (Kulonga 16:16) Kana nge katuka na Nazareti sambu na kukwenda na Yeruzalemi, nge lenda sala bakilometre 120. Nzietelo yango vandaka kulomba mambu mingi kansi yo vandaka ntangu mosi ya kiese sambu na konso muntu. Yezu me lungisa ntangu yai bamvula 12, mpi yandi ke vingila ti kiese kibeni nkinsi yai mpi dibaku ya kuvanda pene-pene ya tempelo.

Sambu na Yezu ti dibuta na yandi, Paki kele ve nkinsi ya kilumbu mosi kaka. Kilumbu yina me landa nkinsi ya Paki kele luyantiku ya Nkinsi ya Mampa ya Kukonda Levire, yina ke salaka bilumbu nsambwadi. (Marko 14:1) Yo vandaka mpi na kati ya nsungi ya nkinsi ya Paki. Nzietelo ya mvimba vandaka kusala bamposo zole, disongidila katuka nzo na bo na Nazareti tii na Yeruzalemi, tanga mpi bilumbu yina bo vandaka kulutisa na Yeruzalemi mpi na nima nzietelo yina bo vandaka kusala diaka sambu na kuvutuka na Nazareti. Kansi mvula yai, sambu na diambu mosi yina kuminaka Yezu, nzietelo yina bakaka bilumbu mwa mingi. Diambu yango salamaka ntangu bo vandaka kuvutuka na Nazareti.

Ntangu bo vandaka kuvutuka, Yozefi ti Maria vandaka kuyindula nde Yezu kele ti banduku mpi bampangi yina bo vandaka kuvutuka ti bo na nordi. Kansi, ntangu bo zolaka kupema sambu mpimpa bwaka, bo monaka nde Yezu kele ve. Yo yina, bo kwendaka kusosa yandi na banduku mpi na bampangi na bo, kansi bo monaka yandi ve. Bo sosaka yandi bisika yonso, kansi bo monaka yandi ve. Yo yina Yozefi ti Maria vutukaka na Yeruzalemi sambu na kusosa yandi.

Bo sosaka yandi kilumbu ya mvimba kansi bo monaka yandi ve. Na kilumbu ya zole mpi bo monaka yandi ve. Nsuka-nsuka, na kilumbu ya tatu, bo kwendaka kumona mwana na bo na tempelo yina vandaka ti basuku mingi. Bo monaka Yezu me vanda na kati-kati ya balongi ya Bayuda. Yandi vandaka kuwidikila bo, kuyula bo bangiufula, mpi bo vandaka kuyituka sambu na mayele na yandi.

Maria yulaka yandi nde: “Mwana, sambu na nki nge me sala beto mutindu yai? Tata na nge ti mono, beto me kudiyangisa mingi na kusosa nge.”—Luka 2:48.

Yezu yitukaka mutindu bo zabaka ve kisika yina yandi vandaka. Yandi yulaka bo nde: “Sambu na nki beno vandaka kusosa mono? Keti beno zabaka ve nde mono fwete vanda na nzo ya Tata na mono?”—Luka 2:49.

Yozefi ti Maria monaka Yezu, na nima bo vutukaka ti yandi na bwala na bo Nazareti mpi yandi landaka kulemfukila bo. Yandi landaka kuyela mpi kukuma mayele. Ata yandi vandaka leke, Nzambi mpi bantu vandaka kundima yandi. Ya kieleka, yantika bumwana na yandi, Yezu bikaka mbandu ya mbote na yina me tala kutula mambu ya kimpeve na kisika ya ntete mpi kuzitisa bibuti.