Kwenda na mambu ke na kati

Kwenda na tansi ya malongi

 KAPU YA 95

Malongi ya Me Tala Kufwa Makwela mpi Kuzola Bana

Malongi ya Me Tala Kufwa Makwela mpi Kuzola Bana

MATAYO 19:1-15 MARKO 10:1-16 LUKA 18:15-17

  • YEZU ME TUBILA DIBANZA YA NZAMBI NA YINA ME TALA KUFWA MAKWELA

  • DIKABU YA KIMPUMPA

  • KUVANDA BONSO BANA YA FIOTI KELE MFUNU

Yezu ti balongoki na yandi me katuka na Galilea, bo me sabuka Nzadi ya Yordani mpi bo me luta na Perea sambu na kukwenda na ndambu ya sudi. Ntangu Yezu vandaka na Perea na mbala ya me luta, yandi zabisaka Bafarize nsiku ya Nzambi na yina me tala kufwa makwela. (Luka 16:18) Ntangu yai bo me tubila diaka diambu yango sambu na kumeka yandi.

Moize sonikaka nde bakala lenda fwa makwela kana yandi me mona “diambu mosi ya nsoni” na nkento na yandi. (Kulonga 24:1) Bantu kele ti bangindu ya kuswaswana sambu na bikuma yina bo lenda fwa makwela. Bankaka ke kwikila nde bo lenda fwa makwela ata sambu na mambu ya kukonda mfunu. Yo yina, Bafarize me yula Yezu nde: “Keti bakala kele ti nswa ya kufwa makwela ti nkento na yandi sambu na konso kikuma?”—Matayo 19:3.

Na kisika ya kutadila mabanza ya bantu, na mayele yonso, Yezu me tubila dibanza ya Nzambi sambu na makwela. Yandi me tuba nde: “Keti beno me tangaka ve nde muntu yina gangaka bo katuka na luyantiku salaka bo bakala mpi nkento mpi yandi tubaka nde: ‘Yo yina bakala ta bikisa tata na yandi ti mama na yandi mpi yandi ta kangama ti nkento na yandi, ebuna bo zole ta vanda nsuni mosi’? Na mpila nde bo kele diaka ve zole, kansi nsuni mosi. Yo yina, bika nde muntu kukabula ve yina ya Nzambi me vukisaka.” (Matayo 19:4-6) Ntangu Nzambi yantikisaka makwela ya Adami ti Eva, yandi pesaka bo ve nswa ya kufwa makwela.

Bafarize me tulana ntembe ti Yezu nde: “Ebuna, sambu na nki Moize tubaka na kupesa nkento mukanda ya kukula yandi mpi na kufwa makwela ti yandi?” (Matayo 19:7) Yezu me songa bo nde: “Moize pesaka beno nzila ya kufwa makwela ti bankento na beno sambu na ntima-ngolo na beno, kansi yo vandaka ve mutindu yina katuka na luyantiku.” (Matayo 19:8) “Luyantiku” yina ke tadila ve bilumbu ya Moize kansi yo ke tadila ntangu yina Nzambi yantikisaka makwela na kilanga ya Edeni.

Na nima, Yezu me tubila kieleka yai ya mfunu kibeni: “Mono ke tubila beno nde konso muntu yina me fwa makwela ti nkento na yandi, katula kaka sambu na pite [na Kigreki, por·neiʹa], mpi me kwela nkento ya nkaka, yandi me sala bizumba.” (Matayo 19:9) Yo yina, pite kele kikuma mosi kaka yina Masonuku ke pesaka muntu nzila na kufwa makwela.

Ntangu balongoki me wa mambu yina Yezu me tuba, bo me songa yandi nde: “Kana yo kele mutindu yina sambu na bakala ti nkento na yandi, yo kele mbote ve na kukwela.” (Matayo 19:10) Yo kele pwelele nde, muntu yina ke zola kukwela fwete zaba nde makwela fwete zinga kimakulu.

Na yina me tala kimpumpa, Yezu me tuba nde bantu ya nkaka me butukaka batongu, disongidila bo lenda kwela ve. Bankaka me kudikumisaka batongu, disongidila bo kele diaka ve ti makuki ya kuvukisa nitu. Kansi, bankaka ke yalaka nzala na bo ya kuvukisa nitu. Bo yonso me salaka mutindu yina sambu bo kudipesa mingi na mambu ya me tala Kimfumu. Yezu me longisila bawi na yandi nde: “Bika muntu yina lenda ndima diambu yai [kimpumpa] kundima yo.”—Matayo 19:12.

Ntangu yai, bantu me kwisa kunatila Yezu bana na bo ya fioti. Kansi, balongoki me nganina bantu yina ziku bo ke zola ve nde bana yina ya fioti kuyangisa Yezu. Ntangu Yezu me mona mpidina, yandi me wa makasi mpi yandi me songa balongoki nde: “Beno bikisa bana ya fioti bo kwisa na mono; beno meka ve kukanga bo nzila, sambu Kimfumu ya Nzambi kele ya bantu yina kele bonso bo. Ya kieleka mono ke tubila beno nde, konso muntu yina ke yamba ve Kimfumu ya Nzambi bonso mwana ya fioti ta kota ve ata fioti na kati na yo.”—Marko 10:14, 15; Luka 18:15.

Yai kele dilongi ya mbote kibeni! Sambu na kuyamba Kimfumu ya Nzambi, beto fwete vanda bonso bana ya fioti disongidila beto fwete kudikulumusa mpi kundima nde bo longa beto. Ntangu yai sambu na kumonisa nde yandi ke zolaka bana ya fioti, Yezu me baka bo na maboko mpi me sakumuna bo. Yandi ke monisaka mpi zola ya mutindu yina na bantu yonso yina ‘ke yambaka Kimfumu ya Nzambi bonso bana ya fioti.’—Luka 18:17.