Kwenda na mambu ke na kati

Kwenda na tansi ya malongi

 KAPU YA 91

Lazare Me Futumuka

Lazare Me Futumuka

YOANE 11:38-54

  • LUFUTUMUKU YA LAZARE

  • BANTU YA SANEDRENI ME WAKANA SAMBU NA KUFWA YEZU

Yezu me kutana ti Marta mpi Maria pene-pene ya Betania; na nima bo me kwenda na maziamu ya Lazare. Yo kele dibulu mosi ya bo me timunaka na kati ya ditadi, mpi ditadi kele na munoko na yo. Yezu me tuba nde: “Beno katula ditadi.” Marta ke bakisa ve mambu yina Yezu ke zola kusala, yo yina yandi me tubila diambu yina ke yangisa yandi. Yandi me songa Yezu nde: “Mfumu, ntangu yai yandi fwete basika nsudi, sambu bilumbu iya me luta.” Kansi, Yezu me zabisa yandi nde: “Keti mono songaka nge ve nde kana nge kwikila, nge ta mona nkembo ya Nzambi?”—Yoane 11:39, 40.

Yo yina, bo me katula ditadi. Na nima, Yezu me tala na zulu mpi me samba nde: “Tata, mono ke pesa nge matondo sambu nge ke waka mono. Ya kieleka, mono zabaka nde nge ke waka mono ntangu yonso; kansi mono ke tuba sambu na kimvuka ya bantu yina me telama awa, sambu bo kwikila nde nge muntu  tindaka mono.” Mutindu Yezu me samba na meso ya bantu ke monisa bantu yina ke tala nde mambu yina yandi ke zola kusala, yandi ta sala yo na ngolo ya Nzambi. Na nima, Yezu me tuba na ndinga ya ngolo nde: “Lazare, kwisa kubasika!” Lazare me basika, makulu mpi maboko ya kukanga ti bitende ya bilele, mpi luse na yandi ya kukanga ti lele. Yezu me tuba nde: “Beno kangula yandi mpi beno bika yandi, yandi kwenda.”—Yoane 11:41-44.

Bayuda mingi yina me kwisa kupesa Maria ti Marta kikesa me mona kimangu yai mpi bo me kwikila na Yezu. Kansi, bankaka me kwenda kuzabisa Bafarize mambu yina Yezu me sala. Bafarize ti bamfumu ya banganga-nzambi me vukisa Sanedreni ya mvimba, disongidila tribinale ya nene ya Bayuda. Nganga-nzambi ya nene Kaifa kele mpi na kati ya bantu yina. Bankaka na kati na bo me bokuta nde: “Beto fwete sala inki, sambu muntu yai ke sala bidimbu mingi? Kana beto bika yandi mutindu yai, bo yonso ta kwikila na yandi, mpi bantu ya Roma ta kwisa mpi ta katula kisika na beto mpi dikanda na beto.” (Yoane 11:47, 48) Ata bantu yina me monaka Yezu “ke sala bidimbu mingi” songaka bantu yai mambu yina salamaka, bo ke wa ve kiese sambu na mambu yina Nzambi ke sala na nzila na yandi. Kima ya ke yangisa bo kele mikumba mpi kiyeka yina bo kele ti yo.

Mutindu Lazare me futumuka ke bedisa ngolo basaduse sambu bo ke kwikilaka ve na lufutumuku. Ntangu yai Kaifa, yina kele Musaduse, me tuba nde: “Beno me zaba ve ata kima mosi, mpi beno ke bakisa ve nde yo kele sambu na mambote na beno nde muntu mosi kufwa sambu na bantu na kisika nde dikanda ya mvimba kufwa.”—Yoane 11:49, 50; Bisalu 5:17; 23:8.

Na kutadila kisalu ya santu yina Kaifa ke salaka, Nzambi muntu me pusa yandi na kutuba mambu yai, kansi yandi me tuba yo ve “na mabanza na yandi mosi.” Kaifa ke zola kutuba nde Yezu fwete fwa sambu yandi landa ve kubebisa kiyeka mpi lukumu ya bamfumu ya dibundu ya Bayuda. Ata mpidina, mbikudulu ya Kaifa ke monisa nde na nzila ya lufwa na yandi, Yezu ta pesa nkudulu sambu na Bayuda kaka ve, kansi mpi sambu na ‘bana yonso ya Nzambi yina me panzanaka’ na ntoto ya mvimba.—Yoane 11:51, 52.

Kaifa me nunga na kupusa Sanedreni ya mvimba na kuwakana sambu na kufwa Yezu. Keti Nikodemo, yina kele muntu ya Sanedreni mpi nduku ya Yezu, me zabisa yandi diambu yai? Beto me zaba ve, kansi mbala mosi Yezu me katuka na Yeruzalemi; mpidina yandi ta fwa ve na ntwala nde ntangu yina Nzambi me tulaka kulunga.