Kwenda na mambu ke na kati

Kwenda na tansi ya malongi

 KAPU YA 89

Yezu Ke Longa na Perea Ntangu Yandi Ke Kwenda na Yudea

Yezu Ke Longa na Perea Ntangu Yandi Ke Kwenda na Yudea

LUKA 17:1-10 YOANE 11:1-16

  • KUBUDISA MUNTU SAKUBA KELE MBI KIBENI

  • LOLULA MPI MONISA LUKWIKILU

Mwa bilumbu me luta banda Yezu kele na Perea na “simu ya Yordani.” (Yoane 10:40) Ntangu yai, yandi me kwenda na sudi na Yeruzalemi.

Yezu me kwenda ve yandi mosi. Yandi me kwenda ti balongoki na yandi, “bimvuka ya nene ya bantu,” bakalaki ya mpaku mpi bansumuki. (Luka 14:25; 15:1) Bafarize ti bansekudi, bayina ke vwezaka mambu yina Yezu ke tubaka mpi ke salaka, me kwenda mpi ti yandi. Yo fwete vanda nde, bo me yindula mingi na nima ya kuwa bambandu yina Yezu me pesa ya dimeme yina vilaka, ya mwana yina vilaka mpi ya mvwama ti Lazare.—Luka 15:2; 16:14.

Ziku sambu Yezu me yibuka nde bambeni na yandi me katuka kuvweza yandi mpi kuseka yandi, yandi me tula dikebi na yandi ntangu yai na balongoki na yandi. Yandi me vutukila malongi ya nkaka yina yandi longaka na Galilea.

Mu mbandu, yandi me tuba nde: “Mambu yina ke budisaka sakuba ta konda ve kukwisa. Kansi, mawa na muntu yina yo ke kwisa na nzila na yandi! . . . Beno keba. Kana mpangi na nge me sala disumu, nganina yandi, mpi kana yandi balula ntima, lolula yandi. Ata yandi me sadila nge disumu mbala nsambwadi na kilumbu mosi mpi yandi me vutuka na nge mbala nsambwadi, mpi me tuba nde, ‘Mono me balula ntima,’ nge fwete lolula yandi.” (Luka 17:1-4) Ziku, mambu yai Yezu me tuba na nsuka me yibusa Piere ngiufula yina yandi yulaka na yina me tala kulolula mpangi na yandi mbala nsambwadi.—Matayo 18:21.

Keti balongoki ta kuka kusala mambu na kuwakana ti mambu yai ya Yezu me tuba? Balongoki me lomba Yezu nde: “Pesa beto lukwikilu mingi.” Yandi me songa bo nde: “Kana beno vandaka ti lukwikilu ata ya fioti bonso nkeni ya mutarde, beno zolaka kutuba na nti yai ya miriye ya ndombe nde, ‘Tumuka awa mpi kunama na nzadi-mungwa!’ mpi yo zolaka kulemfukila beno.” (Luka 17:5, 6) Ya kieleka, ata lukwikilu ya fioti lenda sala mambu ya nene kibeni.

Na nima, Yezu me longa bantumwa na yandi mfunu ya kudikulumusa mpi ya kuditadila ti bukati-kati; yandi me tuba nde: “Nani na kati na beno ya kele ti mpika mosi ya ke bundula to ke tala mameme mpi yina ta tuba na yandi ntangu yandi me katuka na bilanga nde, ‘Kwisa kudia na mesa’? Keti yandi ta tubila yandi ve nde, ‘Yidikila mono ntete madia na mono ya nkokila, lwata lele ya kisalu mpi sadila mono tii kuna mono ta manisa kudia mpi kunwa; na nima, nge lenda dia mpi kunwa’? Yandi ta monisa ve ntonda na mpika yina sambu yandi me sala mambu yina bo lombaka yandi na kusala, mpidina ve? Mutindu mosi, kana beno me sala mambu yonso ya bo lombaka beno na kusala, beno tuba nde: ‘Beto kele bampika ya mpamba. Mambu ya beto me sala kele mambu yina yo lombaka nde beto sala.’”—Luka 17:7-10.

Konso nsadi ya Nzambi fwete bakisa mfunu ya kutula mambu ya Nzambi na kisika ya ntete. Diaka, konso muntu fwete vila ve dibaku yina yandi kele ti yo ya kusambila Nzambi mpi ya kuvanda na kati ya bantu na yandi.

Yo ke monana nde ntangu fioti na nima ya mambu yai, muntu mosi yina Maria mpi Marta me tinda me kuma. Bo kele bampangi ya Lazare mpi bo ke zingaka na Betania ya Yudea. Muntu yango me tuba nde: “Mfumu, muntu yina nge ke zolaka ke bela.”—Yoane 11:1-3.

Ata Yezu me wa nde nduku na yandi Lazare ke bela ngolo, yandi me bika ve nde mawa yina kulembisa yandi nitu. Kansi, yandi me tuba nde: “Lukanu ya maladi yai kele ve lufwa, kansi yo kele sambu na nkembo ya Nzambi, sambu Mwana ya Nzambi kubaka nkembo na nzila na yo.” Yezu me bikala bilumbu zole kisika yina yandi vandaka mpi na nima yandi me songa balongoki na yandi nde: “Beto kwenda diaka na Yudea.” Kansi bo me buya nde: “Rabi, ntama mingi ve bantu ya Yudea vandaka kusosa kulosila nge matadi, ebuna nge ke kwenda diaka kuna?”—Yoane 11:4, 7, 8.

Yezu me songa bo nde: “Kilumbu mosi ke vandaka ti bangunga 12, mpidina ve? Kana muntu ke tambula na mwini, yandi ke bulaka ve sakuba na konso kima yina, sambu yandi ke mona nsemo ya nsi-ntoto yai. Kansi kana muntu ke tambula na mpimpa,  yandi ke bulaka sakuba, sambu nsemo kele ve na yandi.” (Yoane 11:9, 10) Yezu ke zola kutuba nde, ntangu yina Nzambi tulaka sambu na kisalu na yandi me mana ntete ve. Na ntwala nde ntangu yango kulunga, Yezu fwete sadila mbote-mbote ntangu fioti yina yandi me bikala ti yo.

Na nima, Yezu me tuba nde: “Lazare nduku na beto ke lala, kansi mono ke kwenda kuna sambu na kutedimisa yandi.” Sambu balongoki me yindula nde Lazare ke pema mpi nde Yezu ta tedimisa yandi na mpongi, bo me tuba nde: “Mfumu, kana yandi ke lala, yandi ta beluka.” Yezu me songa bo pwelele nde: “Lazare me fwa . . . Kansi beto kwenda kisika yandi kele.”—Yoane 11:11-15.

Sambu Toma me zaba nde bo lenda fwa Yezu na Yudea mpi yandi ke zola nde bo sadisa yandi, yandi me longisila balongoki ya nkaka nde: “Beto mpi beto kwenda, sambu beto fwa ti yandi.”—Yoane 11:16.