Kwenda na mambu ke na kati

Kwenda na tansi ya malongi

 KAPU YA 139

Yezu Me Nata Paladisu mpi Me Manisa Kisalu na Yandi

Yezu Me Nata Paladisu mpi Me Manisa Kisalu na Yandi

1 BAKORINTO 15:24-28

  • MAMBU YINA TA KUMINA MAMEME TI BANKOMBO

  • BANTU MINGI TA ZINGA NA PALADISU NA NTOTO

  • YEZU ME MONISA NDE YANDI KELE NZILA, KIELEKA, MPI LUZINGU

Yezu bakaka mbotika mpi ntangu fioti na nima, yandi kutanaka ti mbeni mosi yina vandaka ti lukanu ya kubwisa yandi na ntwala nkutu nde yandi yantika kisalu na yandi ya kusamuna. Ya kieleka, Diabulu sosaka mbala na mbala kupukumuna Yezu. Na nima, Yezu tubaka sambu na muntu yina ya mbi nde: “Mfumu ya nsi-ntoto ke kwisa, mpi yandi kele ve ti kiyeka na zulu na mono.”—Yoane 14:30.

Ntumwa Yoane monaka mbona-meso mosi ya ke tubila mambu yina ta kumina ‘dragoni ya nene, nioka ya ntama, yina bo ke bingaka Diabulu mpi Satana.’ Bo me kula mbeni yai ya nku na zulu, yo yina “yandi kele ti makasi ya ngolo, sambu yandi me zaba nde yandi kele ti ntangu fioti.” (Kusonga 12:9, 12) Beto Bakristu kele ti bikuma ya mbote ya kundima nde beto ke zinga na nsungi yina ya “ntangu fioti,” mpi nde kubika fioti bo ta losa “dragoni, nioka ya ntama,” na dibulu ya nda ebuna yandi ta kusa diaka ve bantu na nsungi ya bamvula 1000 yina Yezu ta yala na Kimfumu ya Nzambi.—Kusonga 20:1, 2.

Na ntangu yango, inki mambu ta salama awa na ntoto? Banani ta zinga awa mpi mambu ta vanda nki mutindu? Yezu yandi mosi me pesa mvutu. Na mbandu na yandi ya mameme ti bankombo, yandi monisaka mambu yina ke vingila bantu ya lunungu yina kele bonso mameme, bayina ke sala na bumosi ti yandi mpi ke sadila bampangi na yandi mambu ya mbote. Yandi monisaka mpi pwelele mambu yina ta kumina bantu yina ke sala ve mambu yai, bayina kele bonso bankombo. Yezu tubaka nde: “Bantu yai [bankombo] ta fwa lufwa ya mvula na mvula, kansi bantu ya lunungu [mameme] ta baka luzingu ya mvula na mvula.”—Matayo 25:46.

Yo me sadisa beto na kubakisa mambu yina Yezu tubilaka muntu mosi ya nku yina vandaka na  nti ya mpasi na lweka na yandi. Yezu pesaka ve muntu yina kivuvu yina yandi pesaka bantumwa na yandi ya kwikama, disongidila ya kuyala na Kimfumu ya zulu. Kansi, Yezu silaka muntu ya mbi yina balulaka ntima nde: “Ya kieleka mono ke tubila nge bubu yai nde, nge ta vanda ti mono na Paladisu.” (Luka 23:43) Na mutindu yina, muntu yina bakaka kivuvu ya kuzinga na paladisu, disongidila kilanga mosi ya kitoko kibeni. Ya kieleka, bantu yina ke monisa bubu yai nde bo kele bonso mameme mpi ta “baka luzingu ya mvula na mvula” ta vanda mpi na paladisu yina.

Yo ke wakana ti mambu yina ntumwa Yoane tubilaka ya ke monisa mutindu ntoto ta vanda na ntangu yina. Yandi tubaka nde: “Tenta ya Nzambi kele ti bantu, yandi ta zinga ti bo, mpi bo ta vanda bantu na yandi. Mpi Nzambi yandi mosi ta vanda ti bo. Mpi yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:3, 4.

Sambu muntu yina ya mbi kuzinga na paladisu, yandi fwete telama na bafwa. Yandi mosi mpamba ve ta futumuka. Yezu me monisa yo pwelele ntangu yandi me tuba nde: “Ntangu ke kwisa ntangu bantu yonso yina kele na maziamu ya kuyibuka ta wa ndinga na yandi mpi bo ta basika, bayina salaka mambu ya mbote sambu na lufutumuku ya luzingu, mpi bayina salaka mambu ya mbi sambu na lufutumuku ya kusambisa.”—Yoane 5:28, 29.

Kansi, inki beto lenda tuba sambu na bantumwa ya kwikama ya Yezu mpi bantu fioti ya nkaka yina ta vanda ti yandi na zulu? Biblia ke tuba nde: “Bo ta vanda banganga-nzambi ya Nzambi mpi ya Kristu, mpi bo ta yala bonso bantotila ti yandi bamvula 1000.” (Kusonga 20:6) Bantu yina ta yala ti Kristu kele babakala mpi bankento yina me katuka awa na ntoto. Yo yina, bamfumu yai ta yala na zulu ta wila kibeni bantu yina kele na ntoto mawa mpi ta bakisa bo mbote.—Kusonga 5:10.

Yezu ta sadila kimenga ya nkudulu na yandi sambu na bantu yina kele na ntoto mpi ta katula bo na disumu yina bo me bakaka. Yandi ti bantu yina ta yala ti yandi ta sala nde bantu yonso ya kwikama kukuma bantu ya kukuka. Na ntangu yina, bantu ta vanda ti luzingu yina Nzambi kanaka na luyantiku ntangu yandi zabisaka Adami ti Eva na kubuta bana mingi mpi kufulusa ntoto. Yo vanda lufwa yina bantu me bakaka sambu na disumu ya Adami ta vanda diaka ve.

Na mutindu yina, Yezu ta manisa kisalu yonso yina Yehowa pesaka yandi. Ntangu Luyalu na yandi ya Bamvula Funda ta kuma na nsuka, Yezu ta vutula Kimfumu mpi dibuta ya bantu ya kukuka na maboko ya tata na yandi. Sambu na diambu yai ya mbote ya ke monisa kudikulumusa ya Yezu, ntumwa Polo me sonika nde: “Ntangu Nzambi ta tula bima yonso na nsi na yandi, Mwana yandi mosi mpi ta kuditula na nsi ya Muntu yina tulaka bima yonso na nsi na yandi, sambu Nzambi kuvanda bima yonso sambu na bantu yonso.”—1 Bakorinto 15:28.

Yo kele pwelele nde Yezu kele ti mukumba ya nene na yina me tala kulungisa balukanu ya Nzambi. Mpi ntangu balukanu yango ta lungana sambu na kimakulu, Yezu ta monisa kibeni nde yandi me zinga na kuwakana ti mambu yina yandi tubaka sambu na yandi mosi nde: “Mono kele nzila mpi kieleka mpi luzingu.”—Yoane 14:6.