Kwenda na mambu ke na kati

Kwenda na tansi ya malongi

 KAPU YA 75

Yezu Me Tubila Mambu Yina Ke Pesaka Kiese

Yezu Me Tubila Mambu Yina Ke Pesaka Kiese

LUKA 11:14-36

  • YEZU KE BASISA BADEMO NA NSADISA YA “MUSAPI YA NZAMBI”

  • MAMBU YINA KE PESAKA KIESE YA KIELEKA

Yezu me katuka kuvutukila malongi ya me tala kisambu. Yo kele mosi na kati ya malongi yina yandi vandaka kuvutukila mbala mingi na kisalu na yandi ya kusamuna. Ntangu Yezu vandaka kusala bimangu na Galilea, bo kusilaka yandi makambu nde yandi salaka yo na ngolo ya mfumu ya bademo. Ntangu yai, yandi kele na Yudea mpi bo me kusila yandi diaka diambu ya mutindu mosi.

Ntangu Yezu me basisa demo yina kangaka muntu mosi nzila ya kutuba, kimvuka ya bantu me yituka. Kansi, bambeni na yandi ve. Bo me tuba diaka diambu yina bo ke kusila yandi nde: “Yandi ke basisa bademo na nsadisa ya Belezebule, mfumu ya bademo.” (Luka 11:15) Bankaka ke sosa banzikisa sambu na kuzaba kana Yezu kele nani, yo yina bo me lomba yandi na kusonga bo kidimbu mosi ya me katuka na zulu.

Yezu me bakisa nde bo ke sosa kumeka yandi, yo yina yandi me pesa bo mvutu kaka mutindu yandi salaka ntangu bo kusilaka yandi makambu ya mutindu mosi na Galilea. Yandi me tuba nde konso Kimfumu yina kele ya kukabwana na kati na yo ta fwa, mpi yandi me tubila dibanza yai nde: “Kana Satana mpi me kabwana na kati na yandi, nki mutindu kimfumu na yandi ta zinga?” Na nima, Yezu me songa bo mbala mosi nde: “Kana mono ke basisaka bademo na nsadisa ya musapi ya Nzambi, yo ke songa nde Kimfumu ya Nzambi me kumina beno na kintulumukina.”—Luka 11:18-20.

Mutindu Yezu me tubila “musapi ya Nzambi” fwete yibusa bawi na yandi mambu yina salamaka na ntangu ya bantu ya Izraele. Ntangu Moize salaka bimangu, bantu yina vandaka na nzo ya ntotila Farao tubaka na ndinga ya ngolo nde: “Yo kele musapi ya Nzambi!” Diaka, “musapi ya Nzambi” muntu sonikaka Bansiku Kumi na zulu ya matadi zole. (Kubasika 8:19; 31:18) Mutindu mosi, “musapi ya Nzambi,” disongidila mpeve santu na yandi to ngolo na yandi ya ke salaka kisalu, muntu ke sadisa Yezu ntangu yai sambu na kubasisa bademo mpi kubelula bambefo. Kimfumu ya Nzambi me kumina kibeni bambeni yai na kintulumukina, sambu Yezu, muntu yina Nzambi me ponaka na kuvanda Ntotila ya Kimfumu yina, kele na kati-kati na bo mpi yandi ke sala mambu yai.

Ngolo ya Yezu ya kubasisa bademo ke monisa nde yandi me luta Satana; yo kele bonso muntu mosi ya ngolo yina me kwisa mpi me bedisa soda ya kele ti munduki mpi ya ke kengilaka nzo ya ntotila. Yezu me tubila diaka mbandu ya mpeve ya mbi yina basikaka na muntu mosi. Kana muntu yina kufulusa ve kisika yina me bikala mpamba ti mambu ya mbote, mpeve yina ta kwisa kuvutuka ti bampeve ya nkaka ya mbi nsambwadi mpi muntu yango ta kuma mbi kuluta mutindu yandi vandaka ntete. (Matayo 12:22, 25-29, 43-45) Diambu yai kuminaka dikanda ya Izraele.

Nkento mosi ya me wa mambu yina Yezu me tuba me tuba nde: “Kiese na divumu yina nataka nge mpi na mabele yina nwisaka nge!” Bankento ya Bayuda vandaka ti kivuvu ya kuvanda mama ya mbikudi, mingi-mingi ya Mesia. Ziku nkento yai ke yindula nde Maria lendaka kibeni kuwa kiese sambu yandi kele mama ya longi ya mutindu yai. Kansi, Yezu me sungika nkento yina mpi me tubila mambu yina ke pesaka kiese ya kieleka, yandi me tuba nde: “Ve, kansi kiese na bantu yina ke waka ndinga ya Nzambi mpi ke landaka yo!” (Luka 11:27, 28) Yezu tubaka ve ata fioti nde bo fwete pesa Maria lukumu ya mingi. Kansi, bakala to nkento ta vanda na kiese ya kieleka sambu yandi kele nsadi ya kwikama ya Nzambi, kansi ve sambu yandi kele na bangwisana ti muntu mosi buna to sambu yandi me sala kima mosi buna.

Mutindu Yezu salaka na Galilea, yandi me nganina bantu yina ke lomba yandi kidimbu ya me katuka na zulu. Yandi me tuba nde yandi ta pesa bo ve ata kidimbu mosi katula kaka “kidimbu ya Yonasi.” Yonasi vandaka kidimbu na mutindu yandi salaka bilumbu tatu na divumu ya mbisi mosi ya masa mpi na mutindu yandi longaka na kikesa yonso, mpidina bantu ya Ninive balulaka ntima. Yezu me tuba nde: “Kansi awa kele ti muntu yina me luta Yonasi.” (Luka 11:29-32) Diaka, Yezu me luta Salomo, yina ntotila-nkento ya bwala Sheba kwendaka kuwa mayele na yandi.

Yezu me tuba diaka nde: “Kana muntu me pedisa mwinda, yandi ke tulaka yo ve na kisika ya kubumbana to na nsi ya kitunga, kansi yandi ke tulaka yo na zulu ya kima ya kutudila mwinda.” (Luka 11:33) Ziku yandi ke  zola kutuba nde, kulonga mpi kusala bimangu na ntwala ya bantu yai kele bonso kubumba nsemo ya mwinda. Sambu meso na bo kele ve mbote, bo ke bakisa ve lukanu ya mambu yina yandi ke sala.

Yezu me katuka kubasisa demo mosi mpi me sala nde muntu yina vandaka kutuba ve kuyantika kutuba. Yo fwete pusa bantu na kukumisa Nzambi mpi kuzabisa bantu ya nkaka mambu yina Yehowa ke sala. Yo yina Yezu me pesa lukebisu yai: “Keba sambu nsemo yina kele na kati na nge kuvanda ve mpimpa. Yo yina, kana nitu na nge ya mvimba kele nsemo mpi ata kitini mosi ve kele mpimpa, yo yonso ta vanda nsemo bonso mwinda yina ke pesaka nge nsemo.”—Luka 11:35, 36.