Kwenda na mambu ke na kati

Kwenda na tansi ya malongi

 KAPU YA 72

Yezu Me Tinda Balongoki 70 na Kukwenda Kusamuna

Yezu Me Tinda Balongoki 70 na Kukwenda Kusamuna

LUKA 10:1-24

  • YEZU ME PONA BALONGOKI 70 MPI ME TINDA BO NA KUKWENDA KUSAMUNA

Beto me kuma na nsuka ya mvu 32 ya ntangu na beto mpi bamvula kiteso ya tatu me luta banda Yezu me baka mbotika. Yezu ti balongoki na yandi vandaka na Nkinsi ya Banzo-Ntenta na Yeruzalemi. Ntembe kele ve nde, bo kele kaka na babwala yina kele pene-pene na Yeruzalemi. (Luka 10:38; Yoane 11:1) Nkutu, Yezu me lutisa bangonda sambanu yina me bikala na kisalu ya kusamuna na Yudea to na simu ya Nzadi ya Yordani na distrike ya Perea. Yandi fwete samuna mpi na babwala yina.

Na nima ya Paki ya mvu 30 ya ntangu na beto, Yezu lutisaka mwa bangonda na kisalu ya kusamuna na Yudea mpi yandi kwendaka na Samaria. Na nima ntangu Paki ya mvu 31 ya ntangu na beto kumaka pene-pene, Bayuda na Yeruzalemi sosaka kufwa yandi. Na nsungi ya mvula mosi ti ndambu yina landaka, Yezu longaka mingi na nordi, disongidila na Galilea. Bantu mingi kumaka balongoki na yandi. Na Galilea, Yezu pesaka bantumwa na yandi formasio mpi tindaka bo na kisalu ya kusamuna ebuna yandi pesaka bo nsiku yai: “Beno samuna nde: ‘Kimfumu ya zulu me kuma pene-pene.’” (Matayo 10:5-7) Ntangu yai, yandi me yidika mambu sambu kisalu ya nene ya kusamuna kuyantika na Yudea.

Sambu na kuyantika kisalu yango, Yezu me pona balongoki 70 mpi me tinda bo zole-zole. Yandi me tinda bimvuka 35 ya bansamuni ya Kimfumu sambu na kukwenda kusamuna na teritware yina “bima ya kukatula na bilanga kele mingi, kansi bansadi kele fioti.” (Luka 10:2) Bo fwete kwenda na ntwala na bisika yina Yezu ta kwenda. Balongoki 70 ta belula bantu yina kele ti bimbefo mpi bo ta mwanga nsangu yina Yezu ke samuna.

Balongoki yai fwete kwenda ve kulonga na basinagoga. Yezu me songa bo na kukwenda na banzo ya bantu. Yandi me pesa bo nsiku yai: “Na konso kisika ya beno ke kota na nzo mosi, beno tuba ntete nde: ‘Ngemba kuvanda na nzo yai.’ Kana nduku ya ngemba kele pana, ngemba na beno ta vanda na yandi.” Inki nsangu bo fwete longa? Yezu me zabisa balongoki nde: “Beno tubila bo nde: ‘Kimfumu ya Nzambi me kuma pene-pene na beno.’”—Luka 10:5-9.

Bansiku yina Yezu me pesa balongoki yai 70 kele kiteso mosi ti yina yandi pesaka bantumwa 12, ntangu yandi tindaka bo na kukwenda kusamuna kiteso ya mvula mosi me luta. Yandi me zabisa bo nde bantu yonso ve ta yamba bo mbote. Kansi, bikesa yina bo ta sala ta yidika ntima ya bantu yina ta yamba bo na mpila nde ntangu Yezu ta kwisa na nima, bantu mingi kuvanda na kiese ya kukutana ti Mfumu mpi ya kulonguka na yandi.

Ntangu fioti na nima, bansamuni yai 70 me vutuka na Yezu. Bo me zabisa Yezu na kiese yonso nde: “Mfumu, ata bademo ke lemfukila beto ntangu beto ke sadila zina na nge.” Ntembe kele ve nde nsangu yai ya mbote me pesa Yezu kiese, yo yina yandi me  zabisa bo nde: “Mono me mona Satana me katuka na zulu mpi me bwa dezia bonso nzasi. Tala! Mono me pesa beno kiyeka ya kuniata na nsi ya makulu na beno banioka ti bankutu.”—Luka 10:17-19.

Yo yina, Yezu me siamisa balongoki na yandi nde bo ta niata banioka ti bankutu, disongidila bo ta nunga mambu ya mbi yina bantu ya nkaka ta tuba sambu na bo. Diaka, bo lenda vanda ti kivuvu nde na bilumbu ke kwisa, Satana ta katuka na zulu mpi ta bwa. Yezu me sadisa mpi balongoki 70 na kubakisa diambu yina kele kibeni mfunu na ntinu yina bo ke baka. Yandi me tuba nde: “Beno wa ve kiese sambu bampeve ke lemfukila beno, kansi beno wa kiese sambu bo me sonika bazina na beno na zulu.”—Luka 10:20.

Yezu me wa kiese mingi mpi yandi me kumisa Tata na yandi na meso ya bantu yonso sambu yandi me sadila bansadi na yandi yai ya kudikulumusa na mutindu ya kuyituka. Yandi me tala balongoki na yandi mpi me songa bo nde: “Kiese na meso yina ke mona mambu yina beno ke mona. Sambu mono ke tubila beno nde, bambikudi mingi ti bantotila mingi vandaka na nzala ya kumona mambu ya beno ke mona kansi bo monaka yo ve, mpi ya kuwa mambu ya beno ke wa kansi bo waka yo ve.”—Luka 10:23, 24.