Kwenda na mambu ke na kati

Kwenda na tansi ya malongi

 KAPU YA 78

Kapita ya Kwikama: Vanda ya Kuyilama!

Kapita ya Kwikama: Vanda ya Kuyilama!

LUKA 12:35-59

  • KAPITA YA KWIKAMA FWETE VANDA YA KUYILAMA

  • YEZU KWISAKA KUNATA KUKABWANA

Yezu me katuka kutendula nde kaka “kimvuka ya fioti” ta vanda na Kimfumu ya zulu. (Luka 12:32) Kansi, kubaka lusakumunu yai ya kitoko kele ve diambu ya pete. Nkutu yandi me monisa nde kana muntu ke zola kuvanda na Kimfumu yina, yandi fwete vanda ti bikalulu ya mbote.

Yo yina, Yezu me longisila balongoki na yandi na kuvanda ya kuyilama ntangu bo ke vingila kuvutuka na yandi. Yandi me songa bo nde: “Beno lwata bilele mpi beno vanda ya kuyilama mpi minda na beno kulanda kupela, mpi beno vanda bonso bantu yina ke vingila nde mfumu na bo kuvutuka na makwela sambu ntangu yandi ta kwisa mpi ta bula na kielo, bo kangudila yandi na mbala mosi. Kiese na bampika yina ntangu mfumu na bo ke kwisa, yandi kuta bo, bo ke kengila!”—Luka 12:35-37.

Balongoki lenda bakisa kukonda mpasi kikalulu yina Yezu ke tubila. Bansadi yina yandi me tubila kele ya kuyilama mpi bo ke vingila nde mfumu na bo kuvutuka. Yezu me tuba nde: “Kana [mfumu] kwisa na nsungi ya zole ya kukengila [yantika pene-pene ya ngunga ya uvwa ya mpimpa tii na midi ya mpimpa], to nkutu na nsungi ya tatu [yantika na midi ya mpimpa tii pene-pene ya ngunga ya tatu ya suka], mpi yandi kuta bo, bo ke sala mutindu yina, bo ta vanda na kiese!”—Luka 12:38.

Ndongisila yai ke tendula mambu mingi, yo ke tendula kaka ve nde bansadi fwete vanda kikesa. Yo ke monana pwelele na mambu yina Yezu, Mwana ya muntu, me tuba sambu na yandi mosi na mbandu yina. Yandi me songa balongoki na yandi nde: “Beno mpi, beno vanda ya kuyilama, sambu Mwana ya muntu ta kwisa na ntangu yina beno ke yindula ve.” (Luka 12:40) Yo yina na ntangu mosi buna, Yezu ta kwisa. Yandi ke zola nde balongoki na yandi kuvanda ya kuyilama, mingi-mingi bayina kele na kati ya “kimvuka ya fioti.”

Piere ke zola kubakisa mbote-mbote mambu yina Yezu ke tuba, yo yina yandi me yula yandi nde: “Mfumu, keti nge ke pesa mbandu yai sambu na beto to sambu na bantu yonso mpi?” Na kisika ya kupesa Piere mvutu mbala mosi, Yezu me pesa mbandu yai ya ke wakana ti mbandu yina ya ntete: “Nani kele kibeni kapita ya kwikama, ya mayele, yina mfumu na yandi ta tula na zulu ya kimvuka ya bansadi na yandi sambu na kulanda kupesa bo madia ya bo kele na yo mfunu na ntangu ya me fwana? Kiese na mpika yina kana mfumu na yandi kukwisa mpi kukuta yandi ke sala mutindu yina! Mono ke tubila beno ya kieleka nde, yandi ta tula yandi na zulu ya bima na yandi yonso.”—Luka 12:41-44.

Yo kele pwelele nde na mbandu ya ntete “mfumu” kele Yezu, Mwana ya muntu. Yo yina, “kapita ya kwikama” kele bantu yina kele na kati ya “kimvuka ya fioti,” bayina Nzambi ta pesa Kimfumu. (Luka 12:32) Na mbandu ya zole, Yezu me tuba nde bantu ya nkaka ya kele na kimvuka yai ta pesaka “kimvuka ya bansadi na yandi” bima, disongidila “madia ya bo kele na yo mfunu na ntangu ya me fwana.” Yo yina, Piere ti balongoki ya nkaka yina Yezu ke longa mpi ke pesa madia ya kimpeve lenda bakisa nde na nsungi mosi buna, Mwana ya muntu ta kwisa. Mpi na nsungi yango ngidika mosi ta salama sambu na kupesa madia ya kimpeve na balongoki ya Yezu, disongidila “kimvuka ya bansadi” ya Mfumu.

Yezu me monisa kikuma yina balongoki na yandi fwete vanda ya kuyilama mpi kukeba na bikalulu na bo. Sambu bankaka lenda yambula kutula dikebi mpi nkutu kumenga bampangi na bo ya babakala ti ya bankento, yandi me tuba nde: “Kansi kana mpika yina kutuba na ntima na yandi nde, ‘Mfumu na mono ke sukinina na kukwisa,’ ebuna yandi yantika kubula bansadi ya babakala ti ya bankento mpi yandi yantika kudia, kunwa, mpi kulawuka malafu, mfumu ya mpika yina ta kwisa na kilumbu yina yandi ke vingila yandi ve mpi na ntangu yina yandi ke zaba ve, ebuna yandi ta pesa yandi ndola ya ngolo kibeni mpi yandi ta tula yandi kisika mosi ti bantu ya kukonda kwikama.”—Luka 12:45, 46.

Yezu me tuba nde yandi me kwisa “sambu na kutula tiya na ntoto.” Yo salamaka kibeni mutindu yina; mambu ya nkaka yina yandi tubaka salaka nde tiya  to mavwanga ya ngolo kubasika mpi yo yokaka malongi ya luvunu ti bansiku ya bambuta. Nkutu yo nataka kukabwana na kati ya bantu yina ke zingaka na bumosi, ‘tata ti mwana na yandi ya bakala mpi mwana-bakala ti tata na yandi, mama ti mwana na yandi ya nkento mpi mwana-nkento ti mama na yandi, bokilo ya nkento ti nkento ya makwela mpi nkento ya makwela ti bokilo na yandi ya nkento.’—Luka 12:49, 53.

Mambu yai vandaka kutadila ntete-ntete balongoki na yandi. Na nima, Yezu me tala bimvuka ya bantu. Bantu mingi ke buya kundima na luzolo yonso banzikisa yina ke monisa nde yandi kele Mesia, yo yina yandi me songa bo nde: “Ntangu beno ke monaka dituti me basika na westi, na mbala mosi beno ke tubaka nde, ‘Mvula ya mupepe ya ngolo ke kwisa,’ mpi yo ke salamaka mutindu yina. Mpi ntangu beno ke monaka nde mupepe ya sudi ke bula, beno ke tubaka nde, ‘Mwini ta vanda ngolo,’ mpi yo ke vandaka mutindu yina. Bantu ya luvunu, beno me zaba kutala mbote-mbote mutindu ntoto ti zulu ke monika, kansi nki mutindu beno me zaba ve kutala mbote-mbote nsungi yai ya ntangu?” (Luka 12:54-56) Yo me monana pwelele nde bo kele ve ya kuyilama.