Kwenda na mambu ke na kati

Kwenda na tansi ya malongi

 KAPU YA 21

Yezu Kele na Sinagoga na Nazareti

Yezu Kele na Sinagoga na Nazareti

LUKA 4:16-31

  • YEZU KE TANGA RULO YA YEZAYA

  • BANTU YA NAZARETI KE SOSA KUFWA YEZU

Ntembe kele ve nde bantu kele na kiese mingi na Nazareti. Mvula mosi ti ndambu na ntwala nde Yezu kukatuka na Nazareti sambu na kukwenda na Yoane sambu na kubaka mbotika, yandi vandaka kusala kisalu ya mabaya kuna. Kansi ntangu yai, bantu me zaba nde yandi ke sala bimangu. Bantu ya Nazareti ke zola kibeni nde yandi sala mpi bimangu na bwala na bo.

Mpusa na bo me kuma ngolo ntangu bo me mona Yezu ke kwenda na sinagoga ya Nazareti, mutindu yo vandaka kikalulu na yandi. Na kati ya sinagoga, bo vandaka kusamba mpi kutanga mikanda yina Moize sonikaka, mutindu bo vandaka kusala yo “konso kisabatu . . . na basinagoga.” (Bisalu 15:21) Bo vandaka mpi kutanga mikanda ya bambikudulu. Ntangu Yezu me telama sambu na kutanga, ziku yandi me zaba bantu mingi yina yandi vandaka kumona na buleke ntangu yandi vandaka kukwenda na sinagoga. Bo me pesa yandi rulo ya mbikudi Yezaya. Yandi me kangula kisika yina bo ke tubila muntu yina Yehowa me tulaka mafuta na nzila ya mpeve na yandi. Bubu yai, yo kele na mukanda ya Yezaya 61:1, 2.

Yezu ke tanga mutindu muntu ya bo ke tubila na mbikudulu yai ta longa nde bampika ta baka kimpwanza, bifwa-meso ta mona, mpi kukwisa ya mvula yina Yehowa me ndimaka. Na nima ya kutanga, Yezu me pesa rulo yina na muntu yina ke salaka na sinagoga mpi yandi me vanda. Bantu yonso ke tala yandi na dikebi ya mingi. Ziku na nima ya mwa ntangu, yandi me tuba bangogo yai ya mfunu: “Bubu yai diambu yai ya bo me sonikaka na masonama ya santu yina beno me katuka kuwa me lungana.”—Luka 4:21.

Bantu me yituka sambu na “bangogo ya kitoko yina vandaka kubasika na munoko na yandi,” mpi bo me tuba bo na bo nde: “Keti yandi kele ve mwana ya Yozefi?” Kansi, sambu Yezu me zaba nde bo ke zola nde yandi sala bimangu bonso yina bo waka nde yandi salaka, yandi me tuba diaka nde: “Ya kieleka, beno ta sadila kingana yai sambu na mono: ‘Munganga, kudibelula. Sala mpi awa na bwala na nge mosi mambu ya beto waka yina salamaka na Kapernaumi.’” (Luka 4:22, 23) Bantu ya bwala ya Yezu monaka nde yandi fwete yantika kubelula bantu na bwala na yandi mosi, sambu na mambote ya bantu na yandi. Yo yina, ziku bo me mona nde Yezu me vweza bo.

Yezu me bakisa bangindu na bo, yo yina yandi me tubila mambu ya nkaka yina salamaka na Izraele. Na bilumbu ya Eliya, mifwidi vandaka mingi na Izraele kansi Nzambi tindaka yandi ve ata na mufwidi mosi. Yandi kwendaka na mufwidi yina vandaka ve muntu ya Izraele, yina vandaka kuzinga na mbanza ya Sarefati, pene-pene ya Sidoni. Yandi salaka kimangu yina gulusaka luzingu ya bantu. (1 Bantotila 17:8-16) Na bilumbu ya Elisha, bantu mingi vandaka kubela maladi ya lepre, kansi Elisha belulaka kaka Namani muntu ya Siria.—2 Bantotila 5:1, 8-14.

Bantu ya bwala ya Yezu me sala nki ntangu bo me bakisa nde masolo yina me monisa nde bo kele bantu ya bwimi mpi ya kukonda lukwikilu? Bantu yina kele na sinagoga me wa makasi, bo me telama mpi me kula Yezu na mbanza. Bo me nata yandi na nsongi ya ngumba yina bo tungaka Nazareti, mpi bo me sosa kulosa yandi. Kansi Yezu me katuka na maboko na bo mpi me tina. Na nima, Yezu me kulumuka na Kapernaumi, na nordi ya dibungu ya Nzadi-Mungwa ya Galilea.